ಐಪಿಎಲ್​ ಭವಿಷ್ಯ, ಕಾರು ಚಲಾಯಿಸಿಕೊಂಡು ಫೇಸ್​ಬುಕ್​ ಲೈವ್​: ನಂಬರ್​ ಜ್ಯೋತಿಷಿ ಆರ್ಯವರ್ಧನ್ ವಿರುದ್ಧ ದೂರು!

ಜ್ಯೋತಿಷಿ,ಸಂಖ್ಯಾಶಾಸ್ತ್ರಜ್ಞ ಆರ್ಯವರ್ಧನ್ ವಿರುದ್ಧ ಸಂಚಾರಿ ನಿಯಮ ಉಲ್ಲಂಘಿಸಿದ್ದಾರೆ ಎಂದು ಆರೋಪಿಸಿ ಬೆಂಗಳೂರಿನಲ್ಲಿ ಕಬ್ಬನ್ ಪಾರ್ಕ್ ಪೊಲೀಸ್​ ಠಾಣೆಯಲ್ಲಿ ಆರ್ಮಿ ಫೋರಂ ಎನ್ನುವ ಸಂಸ್ಥೆ ಮುಖ್ಯಸ್ಥ ದೂರು ದಾಖಲಿಸಿದ್ದಾರೆ.

ಬೆಂಗಳೂರು: ಜ್ಯೋತಿಷಿ, ಸಂಖ್ಯಾಶಾಸ್ತ್ರಜ್ಞ ಆರ್ಯವರ್ಧನ್ ಐಪಿಎಲ್ ಕುರಿತು ಕಾರು ಓಡಿಸಿಕೊಂಡು ಫೇಸ್​ಬುಕ್ ಲೈವ್ ಮಾಡಿದ್ದಾರೆ ಎಂದು ಆರೋಪಿಸಿ ದೂರು ದಾಖಲಾಗಿದೆ.

ಈತ ನಿತ್ಯ ಖಾಸಗಿ ಮಾದ್ಯಮಗಳಲ್ಲಿ ಕಾಣಿಸುತ್ತಾನೆ. ಐಪಿಎಲ್ ಪಂದ್ಯದಲ್ಲಿ ಯಾರು ಗೆಲ್ಲುತ್ತಾರೆ, ಸೋಲುತ್ತಾರೆ ಎಂದು ಹೇಳುತ್ತಾನೆ. ನಿತ್ಯ ತನ್ನ ಕಾರಿನಲ್ಲಿ ಫೇಸ್​ಬುಕ್​ ಲೈವ್ ಮಾಡಿಕೊಂಡು ಗಾಡಿ ಓಡಿಸಿಕೊಂಡು ಎಲ್ಲರೊಂದಿಗೂ ಮಾತನಾಡಿ ಸಂಚಾರಿ ನಿಯಮ ಉಲ್ಲಂಘಿಸುತ್ತಿದ್ದಾನೆ ಎಂದು ಆರ್ಮಿ ಫೋರಂ ಎನ್ನುವ ಸಂಸ್ಥೆಯ ಮುಖ್ಯಸ್ಥ ಶಶಾಂಕ್ ಕಬ್ಬನ್ ಪಾರ್ಕ್ ಪೊಲೀಸರಿಗೆ ದೂರು ನೀಡಿದ್ದಾರೆ.

ಈ ವ್ಯಕ್ತಿ ಕಾರು ಚಾಲನೆ ಮಾಡುತ್ತಾ ಫೇಸ್​ಬುಕ್​ ಲೈವ್ ಮಾಡಿ ಜನರ ಪ್ರಾಣದ ಜೊತೆ ಆಟ ಆಡುತ್ತಿದ್ದಾನೆ . ಈ ಕೂಡಲೇ ಈ ವ್ಯಕ್ತಿ ವಿರುದ್ದ ಕಾನೂನು ಕ್ರಮ ಆಗಲೇಬೇಕು ಎಂದು ಒತ್ತಾಯಿಸಲಾಗಿದೆ. ಹಿಂದೊಮ್ಮೆ ಖ್ಯಾತ ನಟಿ ಒಬ್ಬರಿಗೆ ಬೆಂಗಳೂರು ಪೊಲೀಸರು ಬುದ್ದಿ ಹೇಳಿ ದಂಡ ಹಾಕಿದ್ದರು, ಹಾಗೆಯೇ ಈತನ ವಿರುದ್ದವೂ ಕ್ರಮ ಕೈಗೊಳ್ಳಬೇಕು ಎಂದು ದೂರಿನಲ್ಲಿ ಒತ್ತಾಯಿಸಲಾಗಿದೆ.