ಡಿ.ಜೆ.ಹಳ್ಳಿ, ಕೆ.ಜಿ.‌ಹಳ್ಳಿ ಠಾಣಾ ವ್ಯಾಪ್ತಿಯಲ್ಲಿ ಕಟ್ಟೆಚ್ಚರ: ಈವರೆಗೆ 52 ಎಫ್​ಐಆರ್ ದಾಖಲು

ಡಿ.ಜೆ.ಹಳ್ಳಿ ಹಾಗೂ ಕೆ.ಜಿ.‌ಹಳ್ಳಿ ಠಾಣಾ ವ್ಯಾಪ್ತಿಯ ಬಳಿ ಪರಿಸ್ಥಿತಿ ಗಂಭೀರವಾಗಿದೆ ಎಂಬ ‌ಮಾಹಿತಿಯ‌ನ್ನು ಗುಪ್ತಚಾರ ಇಲಾಖೆ ‌ನೀಡಿದೆ. ಹೀಗಾಗಿ ಸದ್ಯ ಈ ಎರಡು ಸ್ಥಳಗಳನ್ನು ಅತಿ ಸೂಕ್ಷ್ಮಪ್ರದೇಶ ಎಂದು ಪರಿಗಣಿಸಿ ಪೊಲೀಸರು ಕಟ್ಟೆಚ್ಚರ ವಹಿಸಿದ್ದಾರೆ.

ಬೆಂಗಳೂರು: ಗಲಭೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಬಂಧಿತರ ಸಂಖ್ಯೆ ಹೆಚ್ಚಾಗುತ್ತಿದಂತೆ ಡಿ.ಜೆ.ಹಳ್ಳಿ ಠಾಣಾ ವ್ಯಾಪ್ತಿಯ ಬಳಿ ಆರೋಪಿಗಳ ಪೋಷಕರು ಸೇರುತ್ತಿದ್ದಾರೆ. ಬಂಧಿತರ ಪೈಕಿ ಕೆಲವರು ಅಮಾಯಕರು ಎಂದು ಅಳುತ್ತಾ ಮಹಿಳೆಯೋರ್ವಳು ಕುಸಿದು ಬಿದ್ದ ಘಟನೆ ನಡೆಯಿತು.

ಠಾಣೆಯ ಬಳಿ ಆರೋಪಿಗಳ ಪೋಷಕರ ಆಗ್ರಹ:

ಈ ವೇಳೆ ಅಂದಾಜು 50ಕ್ಕೂ ಹೆಚ್ಚು ಮಹಿಳೆಯರು ಠಾಣೆಯ ಬಳಿ ಬಂದು ತಮ್ಮ ಮಕ್ಕಳನ್ನು ಬಿಡುವಂತೆ ಗೋಗರೆದ ದೃಶ್ಯ ಕಂಡುಬಂತು. ಈ ವೇಳೆ ಪೊಲೀಸರು ಪ್ರತಿಕ್ರಿಯಿಸಿ, ತಪ್ಪು ಮಾಡದೇ ಇದ್ದರೆ ಖಂಡಿತಾ ಅವರು ಬರುತ್ತಾರೆ. ಇಲ್ಲವಾದಲ್ಲಿ ಶಿಕ್ಷೆ ಅನುಭವಿಸ್ತಾರೆ ಎಂದು ತಿಳಿಸಿದರು.

52 ಕೇಸು ದಾಖಲು:

ಇಲ್ಲಿಯವರೆಗೆ 52 ಆರೋಪಿಗಳ ವಿರುದ್ಧ ಕೇಸು ದಾಖಲಾಗಿದೆ. ಅದರಲ್ಲಿ 38 ಡಿ.ಜೆ.ಹಳ್ಳಿ ಠಾಣೆ ಹಾಗೂ 14 ಕೆ.ಜಿ ಹಳ್ಳಿ ಠಾಣಾ ವ್ಯಾಪ್ತಿಯಲ್ಲಿ ಎಫ್​​ಐಆರ್ ದಾಖಲಾಗಿದ್ದು, ಪೊಲೀಸರು ತನಿಖೆ ಮುಂದುವರೆಸಿದ್ದಾರೆ.

ಡಿ.ಜೆ.ಹಳ್ಳಿ, ಕೆ.ಜಿ.ಹಳ್ಳಿಯಲ್ಲಿ ಪರಿಸ್ಥಿತಿ ಗಂಭೀರ:

ಡಿ.ಜೆ.ಹಳ್ಳಿ ಹಾಗೂ ಕೆ.ಜಿ.‌ಹಳ್ಳಿ ಠಾಣಾ ವ್ಯಾಪ್ತಿಯ ಬಳಿ ಮತ್ತಷ್ಟು ಪರಿಸ್ಥಿತಿ ಗಂಭೀರವಾಗಿದೆ ಎಂಬ ‌ಮಾಹಿತಿಯ‌ನ್ನು ಗುಪ್ತಚಾರ ಇಲಾಖೆ ನೀಡಿದೆ. ಹೀಗಾಗಿ ಈ ಎರಡೂ ಸ್ಥಳವನ್ನು ಅತಿ ಸೂಕ್ಷ್ಮವಾದ ಪ್ರದೇಶ ಎಂದು ಪರಿಗಣಿಸಿ ಪೊಲೀಸರು ಕಟ್ಟೆಚ್ಚರ ವಹಿಸಿದ್ದಾರೆ.

ಅಂಗಡಿಗಳನ್ನು ತೆರೆಯದಂತೆ ಸೂಚನೆ:

ಮುಂಜಾನೆ ತೆರೆಯಲಾಗಿದ್ದ ಅಂಗಡಿ ಮುಂಗಟ್ಟುಗಳನ್ನು ಮುಚ್ಚುವಂತೆ ಪೊಲೀಸರು ಆದೇಶ ನೀಡಿದ್ದಾರೆ.

ವಿನಾಕಾರಣ ಸುತ್ತಾಡಿದರೆ ಕ್ರಮ:

ಪೂರ್ವ ವಿಭಾಗ ಡಿಸಿಪಿ ಶರಣಪ್ಪ ಅವರ ನೇತೃತ್ವ ಪೊಲೀಸ್ ತಂಡ ಮುಂಜಾಗ್ರತಾ ಕ್ರಮವಾಗಿ ಎರಡೂ ಠಾಣೆಗಳ ಗಲ್ಲಿ-ಗಲ್ಲಿ ವ್ಯಾಪ್ತಿಗಳಲ್ಲಿ ಪಥ ಸಂಚಲನ ನಡೆಸಿದ್ದಾರೆ. ಈ ವೇಳೆ, ವಿನಾಕಾರಣ ಜನರು ಓಡಾಡ ಮಾಡಬಾರದು. ನಿಯಮ ಮೀರಿ ಹೊರ ಬಂದ್ರೆ ಪೊಲೀಸರು ನಿಮ್ಮನ್ನು ಅರೆಸ್ಟ್‌ ಮಾಡುತ್ತಾರೆ ಎಂದು ಎಚ್ಚರಿಕೆ ನೀಡಿದ್ದಾರೆ.

ಆರೋಪಿ ನವೀನ್ ಹಾಗು ಶಾಸಕ ಅಖಂಡ ಶ್ರೀನಿವಾಸ್ ಮೂರ್ತಿಯವರ ಮನೆಗೆ ಹೆಚ್ಚಿನ ಪೊಲೀಸ್‌ ಭದ್ರತೆ ಒದಗಿಸಲಾಗಿದೆ.