ಅಗಲಿಕೆಯ ನೋವು... ಪತ್ನಿಯ ತಿಂಗಳ ತಿಥಿಯಂದೇ ರೈಲಿಗೆ ತಲೆ ಕೊಟ್ಟ ಗಂಡ!

ಪತ್ನಿಯ ಅಗಲಿಕೆಯ ನೋವು ತಾಳಲಾರದೇ ಗಂಡ ರೈಲಿಗೆ ತಲೆ ಕೊಟ್ಟು ಆತ್ಮಹತ್ಯೆಗೆ ಶರಣಾಗಿರುವ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ.

ಆನೇಕಲ್: ಹೆಂಡತಿ ಅಕಾಲಿಕ ಮರಣವನ್ನಪ್ಪಿದ್ದ ಹಿನ್ನೆಲೆ ದುಃಖದಲ್ಲಿಯೇ ಕೊರಗುತ್ತಿದ್ದ ಗಂಡ ರೈಲಿಗೆ ತಲೆಕೊಟ್ಟು ಆತ್ಮಹತ್ಯೆ ಮಾಡಿಕೊಂಡಿದ್ದಾನೆ. ಆನೇಕಲ್-ಹೊಸೂರು ರೈಲ್ವೆ ರಸ್ತೆಯ ಸಮಂದೂರು ರೈಲ್ವೆ ಗೇಟ್ ಸಮೀಪ ರೈಲಿನ ಹಳಿ ಮೇಲೆ ಶವವಾಗಿ ಪತ್ತೆಯಾಗಿದ್ದಾನೆ.

ಆನೇಕಲ್-ಜಿಗಣಿ ಮುಖ್ಯ ರಸ್ತೆಯ ಸುರಗಜಕ್ಕನಹಳ್ಳಿ ನಿವಾಸಿ ಮುನಿರಾಜು (29) ಪ್ರಾಣ ಕಳೆದುಕೊಂಡ ವ್ಯಕ್ತಿ. ಜಿಗಣಿ ಮೈಲಾನ್ ಕಂಪೆನಿಯಲ್ಲಿ ಖಾಯಂ ಉದ್ಯೋಗಿಯಾಗಿದ್ದ ಮುನಿರಾಜುವಿಗೆ ಆರು ವರ್ಷದ ಹೆಣ್ಣು ಮಗು ಹಾಗೂ ಇಬ್ಬರು ಸಹೋದರರು ಇದ್ದಾರೆ.

ಎಂಟು ವರ್ಷದ ಹಿಂದೆ ಆನೇಕಲ್​ನ ಮಾರನಾಯಕನಹಳ್ಳಿಯ ಯುವತಿಯನ್ನು ಮದುವೆ ಮಾಡಿಕೊಂಡಿದ್ದ . ಕಳೆದ ತಿಂಗಳು ಆಕೆ ಸಾವಿಗೀಡಾಗಿದ್ದರು. ಈ ಹಿನ್ನೆಲೆ ನಿನ್ನೆ ಆಕೆಯ ತಿಂಗಳ ತಿಥಿ ಕಾರ್ಯ ಮುಗಿಸಿದ್ದ. ರಾತ್ರಿ ಮಾರನಾಯಕನಹಳ್ಳಿಯಿಂದ ಸ್ನೇಹಿತನನ್ನು ಸುರಗಜಕ್ಕನಹಳ್ಳಿಗೆ ಕಾರಿನಲ್ಲಿ ಬಿಟ್ಟು ಮತ್ತೆ ಮಾರನಾಯಕನಹಳ್ಳಿಯ ಕಡೆಗೆ ಮುನಿರಾಜು ಪ್ರಯಾಣ ಬೆಳೆಸಿದ್ದ. ಈ ನಡುವೆ ಸ್ನೇಹಿತರ ಜತೆ ಹೆಂಡತಿಯ ಬಗ್ಗೆ ಮಧ್ಯರಾತ್ರಿಯವರೆಗೂ ಮಾತನಾಡಿದ್ದ ಎಂದು ತಿಳಿದು ಬಂದಿದೆ.

ಆದರೆ, ಮುಂಜಾನೆ ಆಗುವಷ್ಟರಲ್ಲಿ ಇಹಲೋಕ ತ್ಯಜಿಸಿದ್ದಾನೆ. ಮುಂಜಾನೆ 4 ಗಂಟೆಯ ಹೊತ್ತಿನಲ್ಲಿ ರೈಲಿಗೆ ತಲೆಕೊಟ್ಟು ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ತಿಳಿದು ಬಂದಿದೆ. ಸ್ಥಳಕ್ಕೆ ರೈಲ್ವೇ ಪೊಲೀಸರು ಧಾವಿಸಿ ಪರಿಶೀಲನೆ ನಡೆಸಿದ್ದಾರೆ. ಇನ್ನು ಈ ದಂಪತಿಗೆ ಆರು ವರ್ಷದ ಮಗಳಿದ್ದು, ಈಗ ಅನಾಥೆ ಆಗಿದ್ದಾಳೆ.