ದೊಡ್ಡಬಳ್ಳಾಪುರ : ರಾಜಧಾನಿ ಸನಿಹದಲ್ಲಿರೋದು ನಗರಕ್ಕೆ ವರವಾಗಿದೆ. ಆದರೆ, ಬೃಹತ್ ಬೆಂಗಳೂರಿನ ಕಸ ಮಾತ್ರ ಶಾಪವಾಗಿದೆ. ಬೆಂಗಳೂರಿನ ಕಸ ವಿಲೇವಾರಿ ಮಾಡುವ ತಾಣಗಳಾಗಿ ತಾಲೂಕು ಬಲಿಯಾಗುತ್ತಿದೆ. ಈಗಾಗಲೇ ಗುಂಡ್ಲಹಳ್ಳಿ ಟೇರಾಫಾರ್ಮ್ ನಲ್ಲಿ ಬೆಂಗಳೂರಿನ ಕಸ ಬೆಟ್ಟದಂತೆ ಬೆಳದಿದೆ. ಈಗ ತಾಲೂಕಿನ ಶಿರವಾರ ಗ್ರಾಮ ಕಸದ ಡಂಪ್ಪಿಂಗ್ ಯಾರ್ಡ್ ಆಗುತ್ತಿದೆ.
ಬೆಂಗಳೂರಿನ ಬಿಬಿಎಂಪಿ ತ್ಯಾಜ್ಯ ಕಸದಿಂದ ಹೈರಾಣದ ಗ್ರಾಮಸ್ಥರು; ಲಾರಿ ತಡೆದು ಪ್ರತಿಭಟನೆ
ಶಿರವಾರ ಗ್ರಾಮದ ಗೋಮಾಳ ಜಾಗದಲ್ಲಿ ರಾತ್ರೋರಾತ್ರಿ ಬೆಂಗಳೂರಿನ ಕಸ ಸುರಿದು ಲಾರಿಗಳು ಪರಾರಿಯಾಗುತ್ತಿವೆ. ಯಲಹಂಕದ ಆನಂದ್ ರೆಡ್ಡಿ ಎಂಬುವರಿಗೆ ಸೇರಿದ 10 ಎಕರೆ ಜಾಗದಲ್ಲಿ ಬೆಂಗಳೂರಿನ ತ್ಯಾಜ ಕಸವನ್ನು ಲಾರಿಯಲ್ಲಿ ತಂದು ಸುರಿಯುತ್ತಿದ್ದಾರೆ. ಈಗಾಗಲೇ 15ಕ್ಕೂ ಹೆಚ್ಚು ಲಾರಿಗಳು ಕಸವನ್ನು ಸುರಿದು ಸುತ್ತಮುತ್ತಲಿನ ಪ್ರದೇಶವನ್ನು ಗಬ್ಬು ನಾರುವಂತೆ ಮಾಡಿದೆ. ಇದೀಗ ಮಧ್ಯರಾತ್ರಿಯಲ್ಲಿ ಕಸವನ್ನು ಸುರಿದು ಪರಾರಿಯಾಗುತ್ತಿದ್ದ ಲಾರಿಗಳನ್ನ ತಡೆದಿರುವ ಗ್ರಾಮಸ್ಥರು ಟೈರ್ ಗಳಲ್ಲಿನ ಗಾಳಿ ತೆಗೆದು, ಕಸವನ್ನು ಇಲ್ಲಿಂದ ತೆಗೆದುಕೊಂದು ಹೋಗುವಂತೆ ಪ್ರತಿಭಟನೆ ನಡೆಸಿದ್ದಾರೆ.