ಸಂತ್ರಸ್ತರಿಗೆ ಮೊದಲು ಶೆಡ್​ ನಿರ್ಮಿಸಿ, ಆಮೇಲೆ ಮನೆ ನೀಡಿ: ಎಸ್.ಆರ್.ಪಾಟೀಲ್​​

ಬಾಗಲಕೋಟೆ ಜಿಲ್ಲೆಯ ಸಂತ್ರಸ್ತರ ಪರಿಹಾರ ಕೇಂದ್ರಕ್ಕೆ ಭೇಟಿ ನೀಡಿದ ಮಾಜಿ ಸಚಿವ ಎಸ್.ಆರ್.ಪಾಟೀಲ್,​​ ಸಂತ್ರಸ್ತರಿಗೆ ಮೊದಲು ಶೆಡ್​​​ ನಿರ್ಮಾಣ ಮಾಡಿಕೊಡಬೇಕು. ನಂತರ ಶಾಶ್ವತ ಪರಿಹಾರ ಸರ್ಕಾರ ಕಲ್ಪಿಸಿಕೊಡಬೇಕು ಎಂದು ಒತ್ತಾಯಿಸಿದ್ದಾರೆ.

ಬಾಗಲಕೋಟೆ: ಜಿಲ್ಲೆಯಲ್ಲಿ ಉಂಟಾಗಿರುವ ಪ್ರವಾಹ ಕಡಿಮೆ ಆಗಿದ್ದರೂ ಸಂತ್ರಸ್ತರು ಈಗಲೇ ಮನೆಗೆ ಹೋಗಲು ಸಾಧ್ಯವಿಲ್ಲ. ಇಂತಹ ಸಂತ್ರಸ್ತರಿಗೆ ಮೊದಲು ಶೆಡ್​​​ ನಿರ್ಮಾಣ, ನಂತರ ಶಾಶ್ವತ ಪರಿಹಾರ ಸರ್ಕಾರ ಕಲ್ಪಿಸಿಕೊಡಬೇಕು ಎಂದು ಮಾಜಿ ಸಚಿವ ಎಸ್.ಆರ್.ಪಾಟೀಲ್ ಒತ್ತಾಯಿಸಿದರು.

ಸಂತ್ರಸ್ತರ ಪರಿಹಾರ ಕೇಂದ್ರಕ್ಕೆ ಭೇಟಿ ನೀಡಿ ಪರಿಶೀಲನೆ ಮಾಡಿದ ಬಳಿಕ ಈಟಿವಿ ಭಾರತದೊಂದಿಗೆ ಮಾತನಾಡಿದ ಎಸ್​​.ಆರ್​.ಪಾಟೀಲ್​​, ಜಿಲ್ಲಾಡಳಿತ, ಸರ್ಕಾರ ನೇರೆ ಸಂತ್ರಸ್ತರಿಗೆ ಈಗಾಗಲೇ ಎಲ್ಲ ಸೌಲಭ್ಯ ನೀಡಿದ್ದು, ಜಿಲ್ಲಾಡಳಿತ ಪ್ರವಾಹದ ಸಂದರ್ಭದಲ್ಲಿ ಚೆನ್ನಾಗಿ ಕೆಲಸ ಮಾಡಿದೆ ಎಂದು ಪ್ರಶಂಸೆ ವ್ಯಕ್ತಪಡಿಸಿದರು. ಕೇಂದ್ರದಿಂದ ಅನುದಾನ‌ ಬರುವ ಬಗ್ಗೆ ರಾಜಕೀಯ ಮಾಡಲ್ಲ. ಏಕೆಂದರೆ ಪ್ರವಾಹ ಸಂದರ್ಭದಲ್ಲಿ ರಾಜಕೀಯ ಮಾಡಿದರೆ ಸಂತ್ರಸ್ತರ ಬಾಳು ಹಾಳಾಗುತ್ತದೆ.

ಈ ಹಿನ್ನೆಲೆ ನೀರು ಕಡಿಮೆ ಆದ ಬಳಿಕ ಒಂದು ವಾರದೊಳಗೆ ಸಂತ್ರಸ್ತರಿಗೆ ಶೆಡ್​​​ ನಿರ್ಮಾಣ ಸೇರಿದಂತೆ ಇತರ ಸೌಲಭ್ಯ ಒದಗಿಸಬೇಕು ಎಂದ ಅವರು, ಈ ಹಿಂದೆ 2009ರಲ್ಲಿ ನಿರ್ಮಾಣ ಆಗಿರುವ ಆಸರೆ ಮನೆಗಳು ವಾಸ ಮಾಡಲಿಕ್ಕೆ ಯೋಗ್ಯ ಇಲ್ಲ. ಬಾದಾಮಿ ತಾಲೂಕಿನ ಕೆಲ ಪ್ರದೇಶಗಳಲ್ಲಿ ನಿರ್ಮಾಣ ಮಾಡಿದ್ದ ಮನೆಗಳು ಹಾಳಾಗಿವೆ. ಆದ್ದರಿಂದ ಸರ್ಕಾರ ಗುಣಮಟ್ಟದ ಮನೆಗಳು ಸೇರಿದಂತೆ ಶಾಶ್ವತ ಪರಿಹಾರ ನೀಡುವುದು ಅಗತ್ಯವಿದೆ ಎಂದರು.