ನವದೆಹಲಿ:ಚೊಚ್ಚಲ ಆವೃತ್ತಿಯ ಮಹಿಳಾ ಪ್ರೀಮಿಯರ್ ಲೀಗ್ 2023 ಅಂತಿಮ ಹಂತಕ್ಕೆ ಬಂದಿದೆ. ಚೊಚ್ಚಲ ಚಾಂಪಿಯನ್ ಯಾರು ಎಂದು ತಿಳಿಯಲು ಎರಡು ಹೆಜ್ಜೆ ಮಾತ್ರ ಬಾಕಿ ಇದೆ. ನಿನ್ನೆ ಯುಪಿ ವಾರಿಯರ್ಸ್ ಎದುರು ಪಂದ್ಯವನ್ನು ಗೆದ್ದ ಡೆಲ್ಲಿ ಕ್ಯಾಪಿಟಲ್ಸ್ ನೇರ ಫೈನಲ್ ಪ್ರವೇಶ ಪಡೆದುಕೊಂಡರೆ, ಮುಂಬೈ ಮತ್ತು ಯುಪಿ ಮಾರ್ಚ್ 24ರಂದು ನಡೆಯುವ ಎಲಿಮಿನೇಟರ್ ಆಡಬೇಕಿದೆ. ಇದರಲ್ಲಿ ಗೆದ್ದ ತಂಡ ಫೈನಲ್ನಲ್ಲಿ ಡಿಸಿಯೊಟ್ಟಿಗೆ ಮುಖಾಮುಖಿಯಾಗಲಿದೆ.
ಈ ಆವೃತ್ತಿಯ ಎಲಿಮಿನೇಟರ್ ಪಂದ್ಯವು ಮಾರ್ಚ್ 24 ರಂದು ಶುಕ್ರವಾರ ಡಿವೈ ಪಾಟೀಲ್ ಕ್ರಿಕೆಟ್ ಸ್ಟೇಡಿಯಂನಲ್ಲಿ ಸಂಜೆ 7.30ಕ್ಕೆ ಆರಂಭವಾಗಲಿದೆ. ಫೈನಲ್‌ಗೆ ತಲುಪಲು ಮುಂಬೈ ಮತ್ತು ಯುಪಿ ಮಹಿಳಾ ತಂಡಗಳ ನಡುವೆ ಕಠಿಣ ಪೈಪೋಟಿ ನಡೆಯಲಿದೆ. ಲೀಗ್ ಹಂತದಲ್ಲಿ 20 ಪಂದ್ಯಗಳು ನಡೆದಿದ್ದು, ಡಬಲ್ ರೌಂಡ್ ರಾಬಿನ್ ಸುತ್ತಿನಂತೆ ಡೆಲ್ಲಿ, ಮುಂಬೈ ಮತ್ತು ಯುಪಿ ವಾರಿಯರ್ಸ್ ಅಂಕ ಪಟ್ಟಿಯ ಅಗ್ರ ಮೂರು ಸ್ಥಾನ ಪಡೆದಿದ್ದು ಕ್ವಾಲಿಫೈ ಆಗಿವೆ. ಕೊನೆಯ ಎರಡರಲ್ಲಿ ಉಳಿದ ಆರ್ಸಿಬಿ ಮತ್ತು ಗುಜರಾತ್ ಲೀಗ್ ಹಂತದಿಂದ ಹೊರಬಿದ್ದಿವೆ.
ವುಮೆನ್ಸ್ ಪ್ರೀಮಿಯರ್ ಲೀಗ್ ಮಾರ್ಚ್ 4 ರಂದು ಆರಂಭವಾಯಿತು. ಮಂಗಳವಾರ ಡೆಲ್ಲಿ-ಯುಪಿ ಮ್ಯಾಚ್ ಕೊನೆಯದ್ದಾಗಿತ್ತು. ಈ ಲೀಗ್ ಸುತ್ತಿನಲ್ಲಿ 5 ತಂಡಗಳು ಡಬಲ್ ರಾಬಿನ್ ರೌಂಡ್ ಸುತ್ತಿನಂತೆ ತಲಾ 8 ಪಂದ್ಯಗಳನ್ನು ಆಡಲಾಗಿದೆ. ಇದರಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಮುಂಬೈ ಇಂಡಿಯನ್ಸ್ 6 ಪಂದ್ಯಗಳಲ್ಲಿ ಗೆಲುವು ಸಾಧಿಸಿವೆ. ರನ್ ರೇಟ್ ಆಧಾರದಲ್ಲಿ ಡೆಲ್ಲಿ ಕ್ಯಾಪಿಟಲ್ಸ್ ನೇರ ಫೈನಲ್ ಪ್ರವೇಶ ಪಡೆದುಕೊಂಡಿದೆ. ಯುಪಿ ವಾರಿಯರ್ಸ್ 4 ಪಂದ್ಯದಲ್ಲಿ ಗೆದ್ದು, ಮೂರನೇ ಸ್ಥಾನದಲ್ಲಿದೆ.