ಅಹ್ಮದಾಬಾದ್:ಆರ್ಸಿಬಿಯ ಸ್ಟಾರ್ ಆಟಗಾರ ಎಬಿ ಡಿ ವಿಲಿಯರ್ಸ್ ಅವರನ್ನು ನಿಯಂತ್ರಿಸುವ ಉದ್ದೇಶವನ್ನು ಹೊಂದಿದ್ದೆ, ಆದರೆ ಯೋಜನೆಯ ಸಂಪೂರ್ಣ ಜಾರಿಯಿಂದಾಗಿ ದಕ್ಷಿಣ ಆಫ್ರಿಕಾದ ಬ್ಯಾಟ್ಸ್ಮನ್ರ ವಿಕೆಟ್ ಪಡೆಯಲು ಸಾಧ್ಯವಾಗಿದ್ದು ಅದೃಷ್ಟ ಎಂದು ಪಂಜಾಬ್ ಕಿಂಗ್ಸ್ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ ಹರ್ಪ್ರೀತ್ ಬ್ರಾರ್ ತಿಳಿಸಿದ್ದಾರೆ.
ಶುಕ್ರವಾರ ನಡೆದ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಪಂಜಾಬ್ ಕಿಂಗ್ಸ್ ನಾಯಕ ಕೆಎಲ್ ರಾಹುಲ್ ಅವರು ಅಜೇಯ 91 ರನ್ಗಳ ನೆರವಿನಿಂದ 179 ರನ್ಗಳಿಸಿತ್ತು. 180 ರನ್ಗಳ ಗುರಿ ಬೆನ್ನಟ್ಟಿದ ಆರ್ಸಿಬಿ ಕೇವಲ 145 ರನ್ಗಳಿಸಲಷ್ಟೇ ಶಕ್ತವಾಗಿ 34 ರನ್ಗಳ ಸೋಲು ಕಂಡಿತು.
ಒಂದೇ ಪಂದ್ಯದಲ್ಲಿ ವಿರಾಟ್ ಕೊಹ್ಲಿ, ಗ್ಲೇನ್ ಮ್ಯಾಕ್ಸ್ವೆಲ್ ಮತ್ತು ಎಬಿಡಿ ವಿಲಿಯರ್ಸ್ ಅಂತಹ ಮಹಾನ್ ಬ್ಯಾಟ್ಸ್ಮನ್ಗಳ ವಿಕೆಟ್ ಪಡೆಯುವುದು ಯಾವುದೇ ಒಬ್ಬ ಬೌಲರ್ಗೆ ಸುಲಭದ ಮಾತಲ್ಲ. ಆದರೆ, ಈ ವಿಶೇಷ ಸಾಧನೆಗೆ ಪಾತ್ರರಾದ ಬ್ರಾರ್ ಇದು ಅಮೂಲ್ಯವಾದ ಕ್ಷಣ ಎಂದಿದ್ದಾರೆ.
"ಚೆಂಡು ಸ್ವಲ್ಪ ನನ್ನ ಹಿಡಿತದಲ್ಲಿದ್ದ ಕಾರಣ ಡಿವಿಲಿಯರ್ಸ್ಗೆ ಆಪ್ ಸೈಡ್ ಸ್ಟಂಪ್ನಲ್ಲಿ ಬೌಲಿಂಗ್ ಮಾಡಲು ಬಯಸಿದ್ದೆ. ಅದಕ್ಕಾಗಿ ನಾನು ಸ್ಲಿಪ್ ಅನ್ನು ನಿಲ್ಲಿಸಿಕೊಂಡಿದೆ ಮತ್ತು ಕವರ್ನಲ್ಲಿ ಒಬ್ಬ ಫೀಲ್ಡರ್ ಹೊಂದಿದ್ದೆ. ಅವರಿಗೆ ಡಾಟ್ ಬಾಲ್ಗಳನ್ನು ಮಾಡಲು ನಾನು ಬಯಸಿದ್ದೆ, ಆದರೆ ವಿಕೆಟ್ ಪಡೆಯಲು ಯಶಸ್ವಿಯಾದೆ, ಇದಕ್ಕೆ ನಾನು ಧನ್ಯನಾಗಿದ್ದೇನೆ" ಎಂದು 19ರನ್ಗಳಿಗೆ 3 ವಿಕೆಟ್ ಪಡೆದ ಬ್ರಾರ್ ಪಂದ್ಯದ ನಂತರ ತಿಳಿಸಿದ್ದಾರೆ.
ಇನ್ನು ಕೊಹ್ಲಿ ವಿಕೆಟ್ ಕೂಡ ಯೋಜನೆಯಂತೆಯೇ ಪಡೆದಿದ್ದಾಗಿ 23 ವರ್ಷದ ಬೌಲರ್ ತಿಳಿಸಿದ್ದಾರೆ. ನನ್ನ ತಂತ್ರವೇನಿದ್ದರೂ ಒಳ್ಳೆಯ ಲೆಂತ್ನಲ್ಲಿ ಚೆಂಡನ್ನು ಎಸೆಯಬೇಕೆಂಬುದಾಗಿತ್ತು. ಈ ವೇಳೆ ಅವರು(ಕೊಹ್ಲಿ) ದಂಡಿಸಿದರೂ ನನಗೆ ಚಿಂತೆಯಿರಲಿಲ್ಲ. ಈ ಸಂದರ್ಭದಲ್ಲಿ ಬ್ಯಾಟ್ಸ್ಮನ್ ಡೌನ್ ದ ಟ್ರ್ಯಾಕ್ ಆಡಲು ಪ್ರಯತ್ನಿಸಿದರೆ ವಿಕೆಟ್ ಸಿಗಬಹುದು ಎಂದುಕೊಂಡಿದ್ದೆ, ಅದು ಯಶಸ್ವಿಯಾಯಿತು ಎಂದು ಬ್ರಾರ್ ಕೊಹ್ಲಿಯನ್ನು ಬೌಲ್ಡ್ ಮಾಡಿದ ಘಟನೆಯನ್ನು ಸ್ಮರಿಸಿಕೊಂಡರು.
ಈ ಹಿಂದೆ ಮೂರು ಪಂದ್ಯಗಳನ್ನಾಡಿದ್ದ ಬ್ರಾರ್ ಒಂದು ವಿಕೆಟ್ ಪಡೆದಿರಲಿಲ್ಲ, ಆದರೆ ನಿನ್ನೆ ಒಂದೇ ಪಂದ್ಯದಲ್ಲಿ ಪ್ರಮುಖ 3 ವಿಕೆಟ್ ಪಡೆದು ಪಂದ್ಯದ ಗತಿಯನ್ನೇ ಬದಲಿಸಿದರು.
