ಬ್ರಿಸ್ಬೇನ್(ಆಸ್ಟ್ರೇಲಿಯಾ): ಅಫ್ಘಾನಿಸ್ತಾನ ಮಾಡು ಇಲ್ಲವೇ ಮಡಿ ಪಂದ್ಯದಲ್ಲಿ ಸೋಲನುಭವಿಸಿ ಸೆಮಿಫೈನಲ್ ರೇಸ್‌ನಿಂದ ಹೊರಬಿದ್ದಿದೆ. ಶ್ರೀಲಂಕಾ ತಂಡವು ಅಫ್ಘಾನ್ ನೀಡಿದ 144ರನ್ ಗುರಿಯನ್ನು ಧನಂಜಯ ಡಿ ಸಿಲ್ವ ಅವರ ಅರ್ಧ ಶತಕದ ನೆರವಿನಿಂದ 18.3 ಓವರ್ನಲ್ಲಿ 4 ವಿಕೆಟ್ ನಷ್ಟದಿಂದ ಸುಲಭವಾಗಿ ಜಯಿಸಿತು. ಸೂಪರ್ 12 ಹಂತದ ಎರಡನೇ ಗೆಲುವು ಸಾಧಿಸಿರುವ ಲಂಕಾ ಸೆಮಿಸ್ನ ಆಸೆ ಜೀವಂತ ಉಳಿಸಿಕೊಂಡಿದೆ.
ಮೊದಲು ಬ್ಯಾಟ್ ಮಾಡಿದ ಅಫ್ಘಾನಿಸ್ತಾನ 8 ವಿಕೆಟ್ ನಷ್ಟಕ್ಕೆ 144 ರನ್ ಗಳಿಸಿತು. ಆರಂಭಿಕರಾದ ಗುರ್ಬಾಜ್(28), ಘನಿ(27) ಮತ್ತು ಇಬ್ರಾಹಿಂ ಜದ್ರಾನ್ (22) ಸಾಧಾರಣ ಪ್ರದರ್ಶನ ನೀಡಿದರು. ನಂತರ ಮಧ್ಯಮ ಕ್ರಮಾಂಕದ ಆಟಗಾರರು ಕ್ರಿಸ್ನಲ್ಲಿ ನಿಲ್ಲಲಿಲ್ಲ. ನಜೀಬುಲ್ಲಾ ಜದ್ರಾನ್(18), ಗುಲ್ಬದಿನ್ ನೈಬ್(12) ಮತ್ತು ನಾಯಕ ನಬಿ 13ಕ್ಕೆ ವಿಕೆಟ್ ಚೆಲ್ಲಿದರು.
ಶ್ರೀಲಂಕಾ ಪರ ವನಿಂದು ಹಸರಂಗ ಮೂರು ವಿಕೆಟ್ ಪಡೆದರು. ಲಹಿರು ಕುಮಾರ ಎರಡು ಮತ್ತು ಧನಂಜಯ ಡಿ ಸಿಲ್ವ, ಕಸುನ್ ರಜಿತ ತಲಾ ಒಂದು ವಿಕೆಟ್ ಪಡೆದರು.