ರೋಹಿತ್​ ಶರ್ಮಾ ಬಾರಿಸಿದ ಸಿಕ್ಸರ್​​ನಿಂದ ಬಾಲಕಿಗೆ ಪೆಟ್ಟು.. ಪುಟಾಣಿ ಆರೋಗ್ಯ ವಿಚಾರಿಸಿದ ಹಿಟ್​ಮ್ಯಾನ್​!

ರೋಹಿತ್​ ಶರ್ಮಾ ಸಿಡಿಸಿರುವ ಸಿಕ್ಸರ್​​ವೊಂದು ಆರು ವರ್ಷದ ಬಾಲಕಿಗೆ ಬಿದ್ದ ಘಟನೆ ನಿನ್ನೆ ನಡೆದಿತ್ತು. ಪಂದ್ಯ ಮುಗಿದ ನಂತರ ಪುಟಾಣಿ ಬಳಿ ತೆರಳಿರುವ ರೋಹಿತ್​ ಆಕೆಯ ಆರೋಗ್ಯ ವಿಚಾರಿಸಿದ್ದಾರೆಂದು ವರದಿಯಾಗಿದೆ.

ದಿ ಓವೆಲ್​​(ಇಂಗ್ಲೆಂಡ್​): ಇಂಗ್ಲೆಂಡ್​ ವಿರುದ್ಧ ನಡೆದ ಮೊದಲ ಏಕದಿನ ಪಂದ್ಯದ ವೇಳೆ ಬ್ಯಾಟಿಂಗ್​ ಮಾಡ್ತಿದ್ದ ರೋಹಿತ್​ ಶರ್ಮಾ ಸಿಡಿಸಿರುವ ಸಿಕ್ಸರ್​​​ವೊಂದು ಪುಟಾಣಿಗೆ ಬಿದ್ದ ಘಟನೆ ನಡೆದಿತ್ತು. ಇದರ ಬೆನ್ನಲ್ಲೇ ಪುಟಾಣಿಯನ್ನ ಹಿಟ್​ಮ್ಯಾನ್​ ಭೇಟಿ ಮಾಡಿದ್ದು, ಆರೋಗ್ಯ ವಿಚಾರಿಸಿದ್ದಾರೆಂದು ತಿಳಿದು ಬಂದಿದೆ. ಲಂಡನ್​​ನ ದಿ ಓವೆಲ್​​ನಲ್ಲಿ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ರೋಹಿತ್ ಶರ್ಮಾ ಭರ್ಜರಿ ಬ್ಯಾಟಿಂಗ್​ ಪ್ರದರ್ಶನ ನೀಡಿದರು. ಅಜೇಯ 76 ರನ್​​ಗಳಿಕೆ ಮಾಡಿದ ಈ ಪ್ಲೇಯರ್​ ಭರ್ಜರಿ ಹೊಡೆತಗಳ ಮೂಲಕ ಪ್ರೇಕ್ಷಕರನ್ನ ರಂಜಿಸಿದ್ದರು.

ಡೇವಿಡ್​ ವಿಲ್ಲಿ ಎಸೆದ ಓವರ್​​ನಲ್ಲಿ ಬ್ಯಾಕ್​​ವರ್ಡ್​ ಸ್ಕ್ವೇರ್​​ ಲೆಗ್​ ಕಡೆಗೆ ರೋಹಿತ್ ಭರ್ಜರಿ ಸಿಕ್ಸರ್ ಹೊಡೆದಿದ್ದರು. ಅದು ನೇರವಾಗಿ ಸ್ಟ್ಯಾಂಡ್​​ನಲ್ಲಿ ಕುಳಿತಿದ್ದ 6 ವರ್ಷದ ಪುಟಾಣಿಗೆ ಬಿದ್ದಿತ್ತು. ಇದು ಕ್ಯಾಮೆರಾದಲ್ಲಿ ಸಹ ಸೆರೆಯಾಗಿತ್ತು. ತಕ್ಷಣವೇ ಇಂಗ್ಲೆಂಡ್ ತಂಡದ ಫಿಸಿಯೋ ಹಾಗೂ ತಂಡದ ವೈದ್ಯರು ಬಾಲಕಿ ಬಳಿಗೆ ಹೋಗಿ, ತಪಾಸಣೆ ನಡೆಸಿದ್ದರು. ಇದು ರೋಹಿತ್​ ಶರ್ಮಾ ಗಮನಕ್ಕೆ ಬಂದಿದೆ.

ಪಂದ್ಯ ಮುಕ್ತಾಯಗೊಂಡ ಬಳಿಕ ನೇರವಾಗಿ ಬಾಲಕಿ ಬಳಿ ತೆರಳಿರುವ ರೋಹಿತ್​ ಶರ್ಮಾ, ಆಕೆಯ ಆರೋಗ್ಯ ವಿಚಾರಿಸಿದ್ದಾರೆ. ಇದರ ಬಗ್ಗೆ ಇಂಗ್ಲೆಂಡ್​​ನ ಬಾರ್ಮಿ ಆರ್ಮಿ ಮಾಹಿತಿ ಹಂಚಿಕೊಂಡಿದೆ. ದಿ ಓವೆಲ್​ ಮೈದಾನದಲ್ಲಿ ನಿನ್ನೆ ನಡೆದ ಮೊದಲ ಏಕದಿನ ಪಂದ್ಯದಲ್ಲಿ ರೋಹಿತ್ ಶರ್ಮಾ ನಾಯಕತ್ವದ ಟೀಂ ಇಂಡಿಯಾ 10 ವಿಕೆಟ್​ಗಳ ಗೆಲುವು ದಾಖಲು ಮಾಡಿದೆ. ಈ ಮೂಲಕ ಸರಣಿಯಲ್ಲಿ 1-0 ಅಂತರದ ಮುನ್ನಡೆ ಕಾಯ್ದುಕೊಂಡಿದೆ.