ರಿಷಭ್ ಪಂತ್ ನಾಯಕತ್ವದಲ್ಲಿ ಧೋನಿಯ ಕೆಲವು ಗುಣಗಳು ಕಾಣುತ್ತಿವೆ: ಕುಲ್ದೀಪ್ ಯಾದವ್​

ಕುಲದೀಪ್ ಯಾದವ್​ ಅವರನ್ನು ಮೆಗಾಹರಾಜಿನಲ್ಲಿ 2 ಕೋಟಿ ರೂ ಗಳಿಗೆ ಖರೀದಿಸಿತ್ತು. ಸುದೀರ್ಘ ಕಾಲ ಕ್ರಿಕೆಟ್ ಆಡದಿದ್ದ ನನಗೆ ಡೆಲ್ಲಿ ಫ್ರಾಂಚೈಸಿ ತುಂಬಾ ಬೆಂಬಲ ನೀಡುತ್ತಿರುವುದರಿಂದ ಉತ್ತಮ ಪ್ರದರ್ಶನ ತೋರಲು ಸಾಧ್ಯವಾಗಿದೆ ಎಂದರು.

ಮುಂಬೈ: 15ನೇ ಆವೃತ್ತಿಯಲ್ಲಿ ತಮ್ಮ ಬೌಲಿಂಗ್ ಸುಧಾರಣೆಗೆ ರಿಷಭ್​ ಪಂತ್​ ನಾಯಕತ್ವ ಪ್ರಮುಖ ಪಾತ್ರವಹಿಸಿದೆ ಎಂದಿರುವ ಟೀಮ್ ಇಂಡಿಯಾ ಸ್ಪಿನ್ನರ್ ಕುಲದೀಪ್ ಯಾದವ್​, ಡೆಲ್ಲಿ ಕ್ಯಾಪಿಟಲ್ಸ್ ನಾಯಕನ ಕೆಲವು ಆಲೋಚನೆಗಳು ಎಂ.ಎಸ್.ಧೋನಿಯ ನಾಯಕತ್ವವನ್ನು ಹೋಲುತ್ತಿವೆ ಎಂದು ತಿಳಿಸಿದ್ದಾರೆ.

27 ವರ್ಷದ ಚೈನಾಮನ್ 2022ರಲ್ಲಿ 13 ವಿಕೆಟ್​ ಕಬಳಿಸಿದ್ದಾರೆ. ಕಳೆದ ಎರಡೂ ವರ್ಷಗಳಿಂದ ವಿವಿಧ ಕಾರಣಗಳಿಂದ ಬೆರಳೆಣಿಕೆಯಷ್ಟು ಪಂದ್ಯಗಳನ್ನು ಮಾತ್ರ ಆಡಿರುವ ಕುಲದೀಪ್ ಯಾದವ್​ಗೆ ಡೆಲ್ಲಿ ಕ್ಯಾಪಿಟಲ್ಸ್​ನಲ್ಲಿ ಎಲ್ಲಾ ಪಂದ್ಯಗಳಲ್ಲೂ ಆಡುವ ಅವಕಾಶ ಸಿಕ್ಕಿದೆ. ಕುಲ್ದೀಪ್ ಅಂತಾರಾಷ್ಟ್ರೀಯ ವೃತ್ತಿ ಜೀವನದ ದಿನಗಳಲ್ಲಿ ಅವರ ಯಶಸ್ಸಿನ ಹಿಂದೆ ಧೋನಿ ಇದ್ದರು. ಇದರ ಬಗ್ಗೆ ಅವರು ಸಾಕಷ್ಟು ಬಾರಿ ಹೇಳಿಕೊಂಡಿದ್ದಾರೆ. ಇದೀಗ ಪಂತ್​ ಕೂಡ ಧೋನಿಯಂತೆಯೇ ತಮಗೆ ನೆರವಾಗುತ್ತಿದ್ದಾರೆ ಎಂದು ಅವರು ಹೇಳಿದರು.

"ರಿಷಭ್ ಪಂತ್ ಸ್ಟಂಪ್​ಗಳ ಹಿಂದೆ ನಿಂತು ಧೋನಿಯ ಕೆಲವು ಗುಣಗಳನ್ನು ತೋರಿಸುತ್ತಿದ್ದಾರೆ ಎಂದು ನಾನು ಭಾವಿಸುತ್ತೇನೆ. ವಿಕೆಟ್​ ಕೀಪರ್​​ಗಳು ಸ್ಪಿನ್​ ಬೌಲರ್​ಗಳ ಯಶಸ್ಸಿನಲ್ಲಿ ಪ್ರಮುಖ ಪಾತ್ರವಹಿಸುತ್ತಾರೆ. ಈ ಆವೃತ್ತಿಯ ಐಪಿಎಲ್​ನಲ್ಲಿ ನನ್ನ ಪ್ರದರ್ಶನದ ಕ್ರೆಡಿಟ್​ ಪಂತ್​ಗೂ ಸಲ್ಲಬೇಕು" ಎನ್ನುತ್ತಾರೆ ಉತ್ತರ ಪ್ರದೇಶದ ಸ್ಪಿನ್ನರ್.

"ನಿಮ್ಮ ಭಾವನೆಯನ್ನು ವ್ಯಕ್ತಪಡಿಸಲು ನಿಮಗೆ ಸ್ವಾತಂತ್ರ್ಯವನ್ನು ನೀಡಿದಾಗ ನೀವು ಎಲ್ಲವನ್ನೂ ಆನಂದಿಸಲು ಪ್ರಾರಂಭಿಸುತ್ತೀರಿ. ನಾನು ಅಭ್ಯಾಸದ ಸಂದರ್ಭದಲ್ಲಿ ರಿಕಿ ಪಾಂಟಿಂಗ್ ಜೊತೆ ಮಾತನಾಡಿದ್ದೇನೆ. ಅವರು ನೀವು ಉತ್ತಮವಾಗಿ ಬೌಲಿಂಗ್ ಮಾಡುತ್ತಿದ್ದೀರಿ, ನಾನು ಎಲ್ಲಾ 14 ಲೀಗ್​ ಪಂದ್ಯಗಳಲ್ಲೂ ಇದನ್ನೇ ನಿರೀಕ್ಷಿಸುತ್ತಿರುವುದಾಗಿ ಹೇಳಿದ್ದಾರೆ. ಅವರ ಜೊತೆಗಿನ ಸಂವಾದ ನನ್ನನ್ನು ಮತ್ತಷ್ಟು ಪ್ರೇರೇಪಿಸಿದೆ" ಎಂದು ಡೆಲ್ಲಿ ಕ್ಯಾಪಿಟಲ್ಸ್ ಪೋಡ್​ಕಾಸ್ಟ್​ನಲ್ಲಿ 2014ರಿಂದ 20121 ರವರೆಗೆ ಕೆಕೆಆರ್ ಪರ ಆಡಿದ್ದ ಸ್ಪಿನ್ನರ್ ಹೇಳಿದ್ದಾರೆ.

ಡೆಲ್ಲಿ ಕ್ಯಾಪಿಟಲ್ಸ್​ 15ನೇ ಅವೃತ್ತಿಯಲ್ಲಿ ನಿರೀಕ್ಷಿತ ಯಶಸ್ಸನ್ನು ಪಡೆಯಲಾಗುತ್ತಿಲ್ಲ. ಆಡಿರುವ 7 ಪಂದ್ಯಗಳಲ್ಲಿ 3 ಗೆಲುವು ಮತ್ತು 4 ಸೋಲು ಕಂಡು ನಿರಾಶೆಯನುಭವಿಸಿದೆ. ಗುರುವಾರ ಕೋಲ್ಕತ್ತಾ ನೈಟ್​ ರೈಡರ್ಸ್​ ವಿರುದ್ಧ ಕಣಕ್ಕಿಳಿಯುತ್ತಿದೆ.

ಇದನ್ನೂ ಓದಿ:ಆರ್​ಸಿಬಿಗೆ ಭಾರಿ ಮುಖಭಂಗ: ಎಂಟೇ ಓವರ್​ಗಳಲ್ಲಿ ಚೇಸ್​ ಮಾಡಿ 2ನೇ ಸ್ಥಾನಕ್ಕೇರಿದ ಹೈದರಾಬಾದ್​