ಹೈದರಾಬಾದ್ (ತೆಲಂಗಾಣ):ಏಕದಿನ ವಿಶ್ವಕಪ್ ಕ್ರಿಕೆಟ್‌ನಮೊದಲ ಪಂದ್ಯದಲ್ಲಿ ಹಾಲಿ ಚಾಂಪಿಯನ್ ಇಂಗ್ಲೆಂಡ್ ತಂಡವನ್ನು ಮಣಿಸಿದ್ದ ಕಿವೀಸ್ಗೆ ಇಂದು 'ಕ್ರಿಕೆಟ್ ಶಿಶು' ನೆದರ್ಲೆಂಡ್‌ ಕಠಿಣ ಬೌಲಿಂಗ್ ದಾಳಿ ನಡೆಸಿತು. ಅಭ್ಯಾಸ ಮತ್ತು ಉದ್ಘಾಟನಾ ಪಂದ್ಯದಲ್ಲಿ ಅಬ್ಬರಿಸಿದ್ದ ಬ್ಲಾಕ್ಕ್ಯಾಪ್ ಬಾಯ್ಸ್ ಇಂದು ಸ್ವಲ್ಪ ಮಂಕಾದರು. ನಿಗದಿತ 50 ಓವರ್‌ಗಳಂತ್ಯಕ್ಕೆ ನ್ಯೂಜಿಲೆಂಡ್ 7 ವಿಕೆಟ್ ನಷ್ಟಕ್ಕೆ 322 ರನ್ ಗಳಿಸಿತು. ಈ ಮೂಲಕ ಡಚ್ಚರ ಗೆಲುವಿಗೆ 323 ರನ್ ಬೇಕಿದೆ.
ಟಾಸ್ ಸೋತ ಕಿವೀಸ್ ಮೊದಲು ಬ್ಯಾಟಿಂಗ್ ಮಾಡಿತು. ನ್ಯೂಜಿಲೆಂಡ್ ಅಬ್ಬರದ ಇನ್ನಿಂಗ್ಸ್ ಮೂಲಕ ದೊಡ್ಡ ಗುರಿ ನೀಡುವ ನಿರೀಕ್ಷೆ ಇತ್ತು. ಆದರೆ ಡಚ್ಚರು ತಮ್ಮ ನಾಯಕನ ಕ್ಷೇತ್ರ ರಕ್ಷಣೆಯ ನಿರ್ಧಾರಕ್ಕೆ ತಕ್ಕಂತೆ ಪ್ರದರ್ಶನ ನೀಡಿದರು. ಅರ್ಹತಾ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್ ತಂಡವನ್ನು ಮಣಿಸಿ ಆಡುವ 10 ತಂಡಗಳಲ್ಲಿ ಸ್ಥಾನ ಪಡೆದ ತಂಡದ ಸಾಮರ್ಥ್ಯ ಇಂದಿನ ಪಂದ್ಯದಲ್ಲಿ ಕಂಡುಬಂತು.
ನ್ಯೂಜಿಲೆಂಡ್ನ ಆರಂಭಿಕರಾದ ಡೆವೊನ್ ಕಾನ್ವೆ ಮತ್ತು ವಿಲ್ ಯಂಗ್ ಮೊದಲ ಪವರ್ ಪ್ಲೇವರೆಗೆ ಉತ್ತಮವಾಗಿ ಕ್ರೀಸ್ ಹಂಚಿಕೊಂಡು 67 ರನ್ ಜೊತೆಯಾಟವಾಡಿದರು. ಮೊದಲ ಪಂದ್ಯದಲ್ಲಿ ಶತಕ ದಾಖಲಿಸಿದ್ದ ಕಾನ್ವೆ ಇಂದು 32 ರನ್ಗೆ ವಿಕೆಟ್ ಕೊಟ್ಟರು. ಎರಡನೇ ವಿಕೆಟ್ಗೆ ವಿಲ್ ಯಂಗ್ ಮತ್ತು ರಚಿನ್ ರವೀಂದ್ರ 77 ರನ್ಗಳ ಜೊತೆಯಾಟ ನೀಡಿದರು. ಕಳೆದ ಪಂದ್ಯದಲ್ಲಿ ಶೂನ್ಯಕ್ಕೆ ವಿಕೆಟ್ ಒಪ್ಪಿಸಿದ್ದ ಯಂಗ್ 77 ರನ್ಗಳ ಇನ್ನಿಂಗ್ಸ್ ಕಟ್ಟಿದರು.