ನವದೆಹಲಿ:ವನಿತೆಯರ ಚುಟುಕು ವಿಶ್ವಕಪ್ಗೆ ದಿನಗಣನೆ ಆರಂಭವಾಗಿದೆ. ಮಹಿಳಾ ಟಿ-20 ವಿಶ್ವಕಪ್ ಚಾಂಪಿಯನ್ ಶಿಪ್ಗಾಗಿ ಹತ್ತು ತಂಡಗಳು ದಕ್ಷಿಣ ಆಫ್ರಿಕಾ ಪಿಚ್ಗಳಲ್ಲಿ ಸೆಣಸಾಟ ನಡೆಸಲಿದೆ. ಮೊದಲ ಪಂದ್ಯ ಆತಿಥೇಯ ದಕ್ಷಿಣ ಆಫ್ರಿಕಾ ಮತ್ತು ವೆಸ್ಟ್ ಇಂಡೀಸ್ ನಡುವೆ ನಡೆಯಲಿದೆ. ಫೆಬ್ರವರಿ 10 ರಿಂದ ಆರಂಭವಾಗುವ ವಿಶ್ವಕಪ್ 17 ದಿನ ನಡೆಯಲಿದ್ದು, ಫೈನಲ್ ಪಂದ್ಯ ಫೆಬ್ರವರಿ 26 ರಂದು ಆಯೋಜಿಸಲಾಗಿದೆ.
ಎರಡು ಗುಂಪುಗಳಾಗಿ ವಿಂಗಡಣೆ:ವಿಶ್ವಕಪ್ನಲ್ಲಿ ಭಾಗವಹಿಸುವ ಎಲ್ಲ ತಂಡಗಳನ್ನು ಎರಡು ಗುಂಪುಗಳಾಗಿ ವಿಂಗಡಿಸಲಾಗಿದೆ. ಆತಿಥೇಯ ದಕ್ಷಿಣ ಆಫ್ರಿಕಾ, ನ್ಯೂಜಿಲ್ಯಾಂಡ್ , ಬಾಂಗ್ಲಾದೇಶ ಮತ್ತು ಶ್ರೀಲಂಕಾ ಜೊತೆಗೆ ಆಸ್ಟ್ರೇಲಿಯಾ ಎ ಗುಂಪಿನಲ್ಲಿದೆ. ಬಿ ಗುಂಪಿನಲ್ಲಿ ಭಾರತ, ಪಾಕಿಸ್ತಾನ, ಇಂಗ್ಲೆಂಡ್, ಐರ್ಲೆಂಡ್ ಮತ್ತು ವೆಸ್ಟ್ ಇಂಡೀಸ್ ಇದೆ.
15 ವರ್ಷಗಳಿಂದ ಆಯೋಜನೆ ಗೊಳ್ಳುತ್ತಿರುವ ವನಿತೆಯರ ವಿಶ್ವಕಪ್ನಲ್ಲಿ ಮೂರು ರಾಷ್ಟ್ರಗಳು ಮಾತ್ರ ಕಪ್ ಗೆದ್ದುಕೊಂಡಿದೆ. ಅದರಲ್ಲಿ ಆಸ್ಟ್ರೇಲಿಯಾದ ವನಿತೆಯರ ಪ್ರಾಬಲ್ಯ ಹೆಚ್ಚಿದೆ. ಇದುವರೆಗೂ ಕಾಂಗರೂ ನಾಡಿನ ಮಹಿಳಾ ಕ್ರಿಕೆಟಿಗರು ಐದು (2010, 2012, 2014, 2018, 2020) ಬಾರಿ ಟಿ-20 ವಿಶ್ವಕಪ್ ಚಾಂಪಿಯನ್ ಆಗಿದ್ದಾರೆ. ಇಂಗ್ಲೆಂಡ್ (2009) ಮತ್ತು ವೆಸ್ಟ್ ಇಂಡೀಸ್ (2016) ತಲಾ ಒಂದು ಬಾರಿ ಚಾಂಪಿಯನ್ ಆಗಿವೆ. 15 ವರ್ಷಗಳಿಂದ ಚಾಪಿಯನ್ ಪಟ್ಟಕ್ಕಾಗಿ ಭಾರತೀಯ ವನಿತೆಯರು ಸೆಣಸುತ್ತಿದ್ದು ಗೆಲುವು ದಾಖಲಿಸಲಾಗಿಲ್ಲ. 2016ರಲ್ಲಿ ಭಾರತದಲ್ಲಿ ಆಯೋಜಿಸಲಾಗಿದ್ದರೂ ಗೆಲುವು ವೆಸ್ಟ್ ಇಂಡೀಸ್ ವನಿತೆಯರದ್ದಾಗಿತ್ತು. ಮೊದಲ ಆವೃತ್ತಿಯನ್ನು ಇಂಗ್ಲೆಂಡ್ ಗೆದ್ದುಕೊಂಡಿತು.