ಲಕ್ನೋ (ಉತ್ತರ ಪ್ರದೇಶ):16ನೇ ಆವೃತ್ತಿಯ ಐಪಿಎಲ್ ಪ್ರಾರಂಭವಾದಾಗಿನಿಂದ ಧೋನಿ ನಿವೃತ್ತಿಯ ಬಗ್ಗೆ ಊಹಾಪೊಹಗಳು ಹರಿದಾಡುತ್ತಲೇ ಇವೆ. ಕೆಲ ಪಂದ್ಯಗಳ ಹಿಂದೆ ಧೋನಿಯೇ ನಿವೃತ್ತಿಯ ಬಗ್ಗೆ ಮುನ್ಸೂಚನೆ ನೀಡುವ ರೀತಿಯ ಮಾತುಗಳನ್ನು ಆಡಿದ್ದರು. ಲಕ್ನೋ ವಿರುದ್ಧದ ಪಂದ್ಯದ ವೇಳೆ ಮತ್ತೆ ಕಾಮೆಂಟೇಟರ್ ಮತ್ತು ಮಾಜಿ ಕ್ರಿಕೆಟಿಗ ಡ್ಯಾನಿ ಮಾರಿಸನ್ ಧೋನಿಯನ್ನು ಈ ಪ್ರಶ್ನೆ ಕೇಳಿದ್ದಾರೆ. ಧೋನಿ ಇದಕ್ಕೆ ನೀಡಿರುವ ಉತ್ತರದ ಪ್ರಕಾರ ಅವರು ನಿವೃತ್ತಿ ತೆಗೆದುಕೊಳ್ಳುವುದು ಅನುಮಾನವಾಗಿದೆ.
ಚೆನ್ನೈ ಎಲ್ಲೇ ಆಡಲು ಹೋದರೂ ಸೂಪರ್ ಕಿಂಗ್ಸ್ ತಂಡಕ್ಕೆ ಧೋನಿ ಅಭಿಮಾನಿಗಳು ಬರುತ್ತಿದ್ದಾರೆ. ಐಪಿಎಲ್ನಲ್ಲಿ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ಚೆನ್ನೈಗೆ ಇದು ಬೇರೆ ಪಿಚ್ನಲ್ಲಿ ಆಡಲು ಸಹಕಾರಿಯಾಗಿದೆ. ಪಂದ್ಯದ ನಂತರ ಧೋನಿಯ ಮಾತುಗಳಿಗಾಗಿ ಕಾದು ನಂತರ ಜನ ತೆರಳುತ್ತಿದ್ದಾರೆ. ಕೆಲ ಪಂದ್ಯಗಳ ಹಿಂದೆ ಮ್ಯಾಚ್ ಮುಗಿದ ನಂತರ ಪ್ರಶಸ್ತಿ ಪ್ರದಾನ ಕಾರ್ಯಕ್ರಮದವರೆಗೂ ಅಭಿಮಾನಿಗಳಿದ್ದರು. ಈ ವೇಳೆ ಧೋನಿಗೆ ನಿಮ್ಮ ಮಾತಿಗಾಗಿ ಜನ ಕಾಯುತ್ತಿದ್ದಾರೆ ಎಂದಿದ್ದಕ್ಕೆ, ಧೋನಿ ಭಾವನಾತ್ಮಕವಾಗಿ "ನನಗಾಗಿ ಇಷ್ಟು ಪ್ರೀತಿ ತೋರಿಸುವ ಎಲ್ಲರಿಗೂ ಧನ್ಯವಾದ, ನಾನು ಎಷ್ಟು ಎಂದು ಆಡಲು ಸಾಧ್ಯ" ಎಂದಿದ್ದರು.
ಇಂದು ಡ್ಯಾನಿ ಮಾರಿಸನ್ ಟಾಸ್ ಸಮಯದಲ್ಲಿ,"ಇದು ನಿಮ್ಮ ಕೊನೆಯ ಆವೃತ್ತಿಯಾ, ನೀವು ಅದನ್ನು ಹೇಗೆ ಆನಂದಿಸುತ್ತಿದ್ದೀರಿ? ಎಂದು ಕೇಳಿದ್ದಾರೆ. ಇದಕ್ಕೆ ಉತ್ತರಿಸಿದ ಧೋನಿ "ಇದು ನನ್ನ ಕೊನೆಯ ಐಪಿಎಲ್ ಎಂದು ನೀವು ನಿರ್ಧರಿಸಿದ್ದೀರಿ, ನಾನಲ್ಲ" ಎಂದಿದ್ದಾರೆ. ಈ ಮೂಲಕ ಧೋನಿ ಕ್ರಿಕೆಟ್ ನಲ್ಲಿ ಮುಂದುವರೆಯುವ ಬಗ್ಗೆ ಸೂಚನೆ ನೀಡಿದ್ದಾರೆ. ಇದು ಎಂಎಸ್ಡಿ ಅಭಿಮಾನಿಗಳಿಗೆ ಸಂತೋಷವನ್ನು ಇಮ್ಮಡಿಗೊಳಿಸುವುದಂತೂ ಕಂಡಿತ.