ಪಡಿಕ್ಕಲ್​ ವಿಚಾರವಾಗಿ ಅಸಮಾಧಾನ ಹೊರಹಾಕಿದ ವಿವಿಧ ಐಪಿಎಲ್​​ ಪ್ರಾಂಚೈಸಿಗಳು.. ಕಾರಣ?

ಪ್ರಸಕ್ತ ಸಾಲಿನ ಇಂಡಿಯನ್​ ಪ್ರೀಮಿಯರ್ ಲೀಗ್​ನಲ್ಲಿ ಪ್ಲೇಯರ್ಸ್​ಗೆ ಕೊರೊನಾ ಪ್ರೊಟೋಕಾಲ್​ ಕಡ್ಡಾಯಗೊಳಿಸಲಾಗಿದ್ದು, ಇದರ ಮಧ್ಯೆ ಪಡಿಕ್ಕಲ್​ ವಿಚಾರವಾಗಿ ಇದೀಗ ಇತರ ಪ್ರಾಂಚೈಸಿಗಳು ಗರಂ ಆಗಿವೆ.

ಚೆನ್ನೈ:ರಾಯಲ್​ ಚಾಲೆಂಜರ್ಸ್​ ಬೆಂಗಳೂರು ತಂಡದ ಆರಂಭಿಕ ಆಟಗಾರ ದೇವದತ್​ ಪಡಿಕ್ಕಲ್​ ವಿಚಾರವಾಗಿ ಉಳಿದ ತಂಡಗಳು ಅಸಮಾಧಾನ ಹೊರಹಾಕಿರುವ ವಿಚಾರ ಇದೀಗ ಬೆಳಕಿಗೆ ಬಂದಿದೆ.

ಕೊರೊನಾ ವೈರಸ್​ ಸೋಂಕಿಗೊಳಗಾಗಿದ್ದ ಪ್ಲೇಯರ್ ದೇವದತ್ ಪಡಿಕ್ಕಲ್​ ವರದಿ ಈಗಾಗಲೇ ನೆಗೆಟಿವ್​ ಬಂದಿದೆ. ಇದಾದ ಬಳಿಕ ಅವರಿಗೆ ಏಳು ದಿನಗಳ ಕಡ್ಡಾಯ ಕ್ವಾರಂಟೈನ್​ ನೀಡುವ ಬದಲು ತಂಡದಲ್ಲಿ ಸೇರ್ಪಡೆ ಮಾಡಿಕೊಂಡಿರುವುದು ಇತರ ತಂಡಗಳ ಅಸಮಾಧಾನಕ್ಕೆ ಕಾರಣವಾಗಿದೆ ಎಂದು ತಿಳಿದು ಬಂದಿದೆ.

ಆರ್​ಸಿಬಿ ತಂಡ ಈಗಾಗಲೇ ಬಯೋ ಬಬಲ್​ಗೆ ಪ್ರವೇಶ ಪಡೆದುಕೊಂಡಿದ್ದು, ದೇವದತ್​ ಪಡಿಕ್ಕಲ್​ ಕೂಡ ಇದರಲ್ಲಿದ್ದಾರೆ. ಇದು ಇತರ ಪ್ರಾಂಚೈಸಿಗಳ ಕೆಂಗಣ್ಣಿಗೆ ಗುರಿಯಾಗಿದೆ. ಮಾರ್ಚ್​​ 22ರಂದು ಕೋವಿಡ್​​ ಸೋಂಕಿಗೊಳಗಾಗಿದ್ದ ಈ ಪ್ಲೇಯರ್​ ಕ್ವಾರಂಟೈನ್​​ಗೊಳಗಾಗಿದ್ದರು. ಆದಾದ ಬಳಿಕ ನೆಗೆಟಿವ್ ವರದಿ ಬಂದಿದ್ದು, ಏಪ್ರಿಲ್​ 7ರಂದು ಬೆಂಗಳೂರಿನಿಂದ ನೇರವಾಗಿ ಚೆನ್ನೈಗೆ ಬಂದು ಬಯೋ ಬಬಲ್​ ಸೇರಿಕೊಂಡಿದ್ದಾರೆ. ಇದೇ ವಿಚಾರ ಇತರ ಪ್ರಾಂಚೈಸಿಗಳ ಕೆಂಗಣ್ಣಿಗೆ ಗುರಿಯಾಗಿದೆ.

ಆದರೆ, ಆರ್​ಸಿಬಿ ಮ್ಯಾನೆಜ್​ಮೆಂಟ್ ಹೇಳುವ ಪ್ರಕಾರ ಬಿಸಿಸಿಐ ನೀಡಿರುವ ಎಲ್ಲ ಪ್ರೊಟೋಕಾಲ್​ ನಾವು ಅನುಸರಣೆ ಮಾಡಿದ್ದು, ಪಡಿಕ್ಕಲ್​ ಅವರ ಮೂರು ವರದಿ ನೆಗೆಟಿವ್​ ಬಂದಿವೆ. ಇದರ ಸುರಕ್ಷತೆ ಹಾಗೂ ಯೋಗಕ್ಷೇಮದ ಬಗ್ಗೆ ಖಚಿತಪಡಿಸಿಕೊಳ್ಳಲು ವೈದ್ಯಕೀಯ ತಂಡ ನಿರಂತರ ಸಂಪರ್ಕದಲ್ಲಿತ್ತು ಎಂದಿದ್ದಾರೆ.

ನಿಯಮ ಹೇಳಿದ್ದೇನು!?

ಬಿಸಿಸಿಐ ಪ್ರೊಟೋಕಾಲ್​ ಪ್ರಕಾರ ತಂಡ ಸೇರಲು ಆಗಮಿಸುವ ಪ್ಲೇಯರ್ಸ್​​ ಬಯೋ ಬಬಲ್​​ ಸೇರುವ ಮೊದಲು ಏಳು ದಿನ ಹೋಟೆಲ್​ನಲ್ಲಿ ಕ್ವಾರಂಟೈನ್​ ಆಗುವುದು ಕಡ್ಡಾಯ. ಅಭ್ಯಾಸ ಚಟುವಟಿಕೆಗಳಲ್ಲಿ ಭಾಗಿಯಾಗುವ ಮೊದಲು ಆರ್​ಟಿ-ಪಿಸಿಆರ್​​ ಪರೀಕ್ಷೆ ಮಾಡಿಸಿಕೊಳ್ಳಬೇಕು ಎಂದಿದೆ.

ಆದರೆ ದೇವದತ್​ ಪಡಿಕ್ಕಲ್​ ಕೊರೊನಾ ಕ್ವಾರಂಟೈನ್​ ವೇಳೆ ಬೆಂಗಳೂರಿನಲ್ಲಿದ್ದು, ವರದಿ ನೆಗೆಟಿವ್​ ಬರುತ್ತಿದ್ದಂತೆ ಚೆನ್ನೈಗೆ ಬಂದು ತಂಡ ಸೇರಿಕೊಂಡಿದ್ದಾರೆ. ಇವರು ಏಳು ದಿನ ಕ್ವಾರಂಟೈನ್​ಗೊಳಗಾಗಿಲ್ಲ ಎಂಬುದು ಇತರ ಪ್ರಾಂಚೈಸಿಗಳ ಕೆಂಗಣ್ಣಿಗೆ ಗುರಿಯಾಗಿದೆ. ಇನ್ನು ಮುಂಬೈ ವಿರುದ್ಧದ ಮೊದಲ ಪಂದ್ಯದಿಂದ ದೇವದತ್ ಪಡಿಕ್ಕಲ್​ ಹೊರಗೆ ಉಳಿದಿದ್ದಾರೆ.