ಇಂದೋರ್(ಮಧ್ಯಪ್ರದೇಶ):ಭಾರತ ಮತ್ತು ಆಫ್ಘಾನಿಸ್ತಾನ ನಡುವಿನ ಎರಡನೇ ಟಿ-20 ಪಂದ್ಯ ಮಧ್ಯಪ್ರದೇಶ ಇಂದೋರ್ನಲ್ಲಿ ಇಂದು ನಡೆಯಲಿದ್ದು, ಹೋಳ್ಕರ್ ಮೈದಾನ ಸಜ್ಜಾಗಿದೆ. ಮೊದಲ ಪಂದ್ಯವನ್ನು ಗೆದ್ದುಕೊಂಡಿರುವ ಭಾರತ ಈ ಮ್ಯಾಚ್ ಜಯಿಸಿ ಸರಣಿ ಗೆಲುವಿನ ಸಂಭ್ರಮಾಚರಣೆಯ ತವಕದಲ್ಲಿದೆ. ವಿಶೇಷವೆಂದರೆ, ವೈಯಕ್ತಿಕ ಕಾರಣಕ್ಕಾಗಿ ಮೊದಲ ಪಂದ್ಯದಿಂದ ಹೊರಗುಳಿದಿದ್ದ ವಿರಾಟ್ ಕೊಹ್ಲಿ ವಾಪಸ್ ಆಗಿದ್ದು, ರೋಚಕತೆ ಹೆಚ್ಚಿಸಿದೆ.
ಮೊದಲ ಪಂದ್ಯದಲ್ಲಿ ಯುವ ಆಟಗಾರರಾದ ಶಿವಂ ದುಬೆಯ ಆಲ್ರೌಂಡ್ ಪ್ರದರ್ಶನ, ತಿಲಕ್ ವರ್ಮಾ, ಜಿತೇಶ್ ಶರ್ಮಾ, ರಿಂಕು ಸಿಂಗ್ರ ಬ್ಯಾಟಿಂಗ್ ಖದರ್ಗೆ ಆಫ್ಘನ್ ಬೌಲರ್ಗಳು ಬೆಂಡಾಗಿದ್ದರು. ಅಕ್ಸರ್ ಪಟೇಲ್, ಮುಖೇಶ್ ಕುಮಾರ್, ಅರ್ಷದೀಪ್ ಸಿಂಗ್ ಬೌಲಿಂಗ್ ಬೌಲಿಂಗ್ ಲಯ ಮುಂದುವರಿಸಬೇಕಿದೆ. ಮೂರು ಪಂದ್ಯಗಳ ಸರಣಿಯಲ್ಲಿ ಭಾರತ 1-0 ಮುನ್ನಡೆಯಲ್ಲಿದೆ.
ನಿರೀಕ್ಷೆ ಹೆಚ್ಚಿಸಿದ ವಿರಾಟ್:ವರ್ಷಗಳಿಂದ ಚುಟುಕು ಮಾದರಿಯ ಕ್ರಿಕೆಟ್ನಿಂದ ದೂರವಿದ್ದ ಬ್ಯಾಟಿಂಗ್ ಕಿಂಗ್ ವಿರಾಟ್ ಕೊಹ್ಲಿ ಈ ಪಂದ್ಯಕ್ಕೆ ಲಭ್ಯರಿದ್ದಾರೆ. ಮೊದಲ ಪಂದ್ಯವನ್ನು ತಪ್ಪಿಸಿಕೊಂಡಿದ್ದ ಅವರು, ಇಂದು ತಮ್ಮ ಬ್ಯಾಟಿಂಗ್ ಬಲ ತೋರಿಸಬೇಕಿದೆ. ಭರ್ಜರಿ ಲಯದಲ್ಲಿರುವ ವಿರಾಟ್ ಟಿ20 ವಿಶ್ವಕಪ್ಗೆ ತಾವೂ ಸಿದ್ಧ ಎಂಬುದನ್ನು ಸರಣಿಯಲ್ಲಿ ಸಾಬೀತು ಮಾಡಬೇಕಿದೆ. ಇವರ ಜೊತೆಗೆ ನಾಯಕ ರೋಹಿತ್ ಶರ್ಮಾ ಕೂಡ ಉತ್ತಮ ಪ್ರದರ್ಶನ ನೀಡಬೇಕಿದೆ.
ಮೊದಲ ಪಂದ್ಯದಲ್ಲಿ ಶೂನ್ಯಕ್ಕೆ ಔಟಾಗಿದ್ದ ರೋಹಿತ್ ನಿರಾಸೆ ಮೂಡಿಸಿದರು. ಇಬ್ಬರು ಹಿರಿಯ ಆಟಗಾರರಿಗೆ ಈ ಸರಣಿ ಮಹತ್ವದ್ದಾಗಿದೆ. ಯುವ ಆಟಗಾರರ ಸವಾಲಿನ ಮಧ್ಯೆ ತಮ್ಮ ತೋಳ್ಬಲ ಪ್ರದರ್ಶಿಸಬೇಕಿದೆ.
ಕಮ್ಬ್ಯಾಕ್ ಮಾಡುತ್ತಾ ಆಫ್ಘನ್ ಪಡೆ?:ಮೊದಲ ಪಂದ್ಯದಲ್ಲಿ ಸೋಲು ಅನುಭವಿಸಿರುವ ಆಫ್ಘನ್ ಪಡೆ ಈ ಪಂದ್ಯದಲ್ಲಿ ಕಮ್ಬ್ಯಾಕ್ ಮಾಡುವ ಹುಮ್ಮಸ್ಸಿನಲ್ಲಿದೆ. ತಂಡ ಹೆಚ್ಚಾಗಿ ಯುವ ತಾರೆ ರೆಹಮಾನುಲ್ಲಾ ಗುರ್ಬಾಜ್, ನಾಯಕ ಇಬ್ರಾಹಿಂ ಝದ್ರಾನ್, ಅಜ್ಮತುಲ್ಲಾ ಓಮರ್ಝೈ, ಮೊಹಮದ್ ನಬಿ ಅವರ ಮೇಲೆ ಆಧಾರವಾಗಿದೆ. ಬೌಲಿಂಗ್ನಲ್ಲಿ ಮುಜೀಬ್ ಉರ್ ರೆಹಮಾನ್ ಉತ್ತಮ ಪ್ರದರ್ಶನ ನೀಡುತ್ತಿದ್ದರೆ, ತಂಡದ ಸ್ಟಾರ್ ಆಟಗಾರ ರಶೀದ್ ಖಾನ್ ಅನುಪಸ್ಥಿತಿಯಲ್ಲಿ ಸ್ಪಿನ್ ಬೌಲಿಂಗ್ ಪಡೆಯನ್ನು ಬಲಪಡಿಸಲು ನೂರ್ ಅಹ್ಮದ್ ಅವರನ್ನು ಆಯ್ಕೆ ಮಾಡುವ ಸಾಧ್ಯತೆ ಇದೆ.