ಮುಂಬೈ: ಶ್ರೀಲಂಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ 6 ವಿಕೆಟ್ ಪಡೆಯುವ ಮೂಲಕ ವಿಶ್ವಕಪ್ ಗೆದ್ದ ನಾಯಕ ಕಪಿಲ್ ದೇವ್ ಅವರನ್ನು ಹಿಂದಿಕ್ಕಿದ ರವಿಚಂದ್ರನ್ ಅಶ್ವಿನ್, ಭಾರತದ ಪರ ಅತಿ ಹೆಚ್ಚು ಟೆಸ್ಟ್ ವಿಕೆಟ್ ಪಡೆದ 2ನೇ ಬೌಲರ್ ಎಂಬ ದಾಖಲೆಗೆ ಪಾತ್ರರಾಗಿದ್ದಾರೆ.
ಕಪಿಲ್ 132 ಟೆಸ್ಟ್ ಪಂದ್ಯಗಳಿಂದ 434 ವಿಕೆಟ್ ಪಡೆದಿದ್ದರು. ಶ್ರೀಲಂಕಾ ವಿರುದ್ಧದ ಟೆಸ್ಟ್ ನಂತರ ಅಶ್ವಿನ್ ವಿಕೆಟ್ ಸಂಖ್ಯೆ 436ಕ್ಕೆ ಏರಿಕೆಯಾಗಿದ್ದು, ಕನ್ನಡಿಗ ಅನಿಲ್ ಕುಂಬ್ಳೆ(619) ನಂತರ ಭಾರತದ ಗರಿಷ್ಠ ಟೆಸ್ಟ್ ವಿಕೆಟ್ ಪಡೆದ ಬೌಲರ್ ಎನಿಸಿಕೊಂಡಿದ್ದಾರೆ.
ಈ ಕುರಿತು ಖಾಸಗಿ ಸುದ್ದಿ ಮಾಧ್ಯಮಕ್ಕೆ ಪ್ರತಿಕ್ರಿಯಿಸಿರುವ 1983ರ ವಿಶ್ವಕಪ್ ನಾಯಕ, ಅಶ್ವಿನ್ಗೆ ಸರಿಯಾದ ಅವಕಾಶಗಳು ಸಿಕ್ಕಿದ್ದಿದ್ದರೆ ಈ ಹಿಂದೆಯೇ ತಮ್ಮ ದಾಖಲೆಯನ್ನು ಬ್ರೇಕ್ ಮಾಡುತ್ತಿದ್ದರು ಎಂದರು.
"ಇದೊಂದು ಶ್ರೇಷ್ಠ ಸಾಧನೆ. ಏಕೆಂದರೆ ಆತನಿಗೆ ಇತ್ತೀಚೆಗೆ ಸರಿಯಾದ ಅವಕಾಶಗಳು ಸಿಕ್ಕಿರಲಿಲ್ಲ. ಒಂದು ವೇಳೆ ಆತನಿಗೆ ಆ ಅವಕಾಶಗಳು ಸಿಕ್ಕಿದ್ದಿದ್ದರೆ ಖಂಡಿತ ಈ ಹಿಂದೆಯೇ 434ರ ಗಡಿಯನ್ನು ಆತ ದಾಟುತ್ತಿದ್ದ. ಆತನ ಸಾಧನೆಯ ಬಗ್ಗೆ ನನಗೆ ತುಂಬಾ ಖುಷಿಯಿದೆ. ನಾನೇಕೆ ಆ ಸ್ಥಾನವನ್ನು ಉಳಿಸಿಕೊಳ್ಳಬೇಕು? ನನ್ನ ಸಮಯ ಎಂದೋ ಮುಗಿದು ಹೋಗಿದೆ" ಎಂದು ಕಪಿಲ್ ದೇವ್ ಹೇಳಿದರು.
63 ವರ್ಷ ಮಾಜಿ ಆಲ್ರೌಂಡರ್ ಅಶ್ವಿನ್ ಅವರಿಂದ 500 ವಿಕೆಟ್ಗಳ ಮೈಲುಗಲ್ಲನ್ನು ನಿರೀಕ್ಷಿಸುವುದಾಗಿಯೂ ಹೇಳಿದ್ದಾರೆ.
ಅಶ್ವಿನ್ ಒಬ್ಬ ಅಸಾಧಾರಣ ಕ್ರಿಕೆಟಿಗ, ಶ್ರೇಷ್ಠ ಮತ್ತು ಬುದ್ದಿವಂತ ಸ್ಪಿನ್ನರ್. ಅವರು ಟೆಸ್ಟ್ ಕ್ರಿಕೆಟ್ನಲ್ಲಿ 500 ವಿಕೆಟ್ ಪಡೆಯುವ ಗುರಿಯನ್ನಿಟ್ಟುಕೊಳ್ಳಬೇಕು. ಅವರು ಅದಕ್ಕಾಗಿ ಪ್ರಯತ್ನಿಸುತ್ತಾರೆ ಮತ್ತು ಅದನ್ನು ಸಾಧಿಸಲಿದ್ದಾರೆ ಎನ್ನುವ ವಿಶ್ವಾಸ ನನಗಿದೆ. ಬಹುಶಃ ಅದಕ್ಕಿಂತಲೂ ಹೆಚ್ಚು ವಿಕೆಟ್ ಪಡೆಯಬಹುದು ಎಂದು ಕಪಿಲ್ ದೇವ್ ಇದೇ ವೇಳೆ ಆಶಿಸಿದರು.
ಇದನ್ನೂ ಓದಿ:ಪಾಕ್ ಕ್ರಿಕೆಟ್ ತಂಡದ ನಾಯಕಿ ಬಿಸ್ಮಾ ಮರೂಫ್ ಮಹಿಳಾ ಕ್ರಿಕೆಟಿಗರಿಗೆ ಸ್ಫೂರ್ತಿ: ಸ್ಮೃತಿ ಮಂಧಾನ
