ಸೆಮೀಸ್ ವೇಳೆ ಧೋನಿ-ಜಡೇಜಾ ಬ್ಯಾಟಿಂಗ್‌ ನೋಡಿದ ವೀಕ್ಷಕರೆಷ್ಟು ಗೊತ್ತೆ? ದಾಖಲೆ ಪತನ!

ಎಂ.ಎಸ್.ಧೋನಿ ಹಾಗೂ ರವೀಂದ್ರ ಜಡೇಜಾ ಕೊನೆಯ ಹಂತದಲ್ಲಿ ಗೆಲುವಿನ ಆಸೆ ಮೂಡಿಸಿದ್ದರು. ಪರಿಣಾಮ 44ರಿಂದ 47ನೇ ಓವರ್​​ನ ವೇಳೆ ಹಾಟ್​​ಸ್ಟಾರ್ (OTT ಸ್ಟ್ರೀಮಿಂಗ್ ಸೇವೆ)​ ನಲ್ಲಿ ನೋಡುಗರ ಸಂಖ್ಯೆ ಗಣನೀಯವಾಗಿ ಏರಿಕೆ ಕಂಡಿದೆ.

ಲಂಡನ್: ಐಪಿಎಲ್​​ ಟೂರ್ನಿಯಲ್ಲಿ ದಾಖಲೆ ಪ್ರಮಾಣದಲ್ಲಿ ವೀಕ್ಷಕರನ್ನು ಸೆಳೆದಿದ್ದ ಹಾಟ್​ಸ್ಟಾರ್​​, ಇದೀಗ ವಿಶ್ವಕಪ್​​ ಟೂರ್ನಮೆಂಟ್​ನ ಮೊದಲ ಸೆಮಿಫೈನಲ್​ನಲ್ಲಿ ಭಾರಿ ಸಂಖ್ಯೆಯಲ್ಲಿ ನೋಡುಗರನ್ನು ಪಡೆಯುವಲ್ಲಿ ಸಫಲವಾಗಿದೆ.

ನ್ಯೂಜಿಲ್ಯಾಂಡ್ ನೀಡಿದ 240 ರನ್​ಗಳ ಗುರಿ ಬೆನ್ನತ್ತಿದ ಕೊಹ್ಲಿ ಬಳಗ ಆರಂಭಿಕ ಕುಸಿತ ಕಂಡಿತ್ತು. ಎಂ.ಎಸ್.ಧೋನಿ ಹಾಗೂ ರವೀಂದ್ರ ಜಡೇಜಾ ಕೊನೆಯ ಹಂತದಲ್ಲಿ ಗೆಲುವಿನ ಆಸೆ ಚಿಗುರಿಸಿದ್ದರು. 44ರಿಂದ 47ನೇ ಓವರ್​​ನ​​​ ವೇಳೆ ಹಾಟ್​​ಸ್ಟಾರ್​ನಲ್ಲಿ ನೋಡುಗರ ಸಂಖ್ಯೆ ಗಣನೀಯವಾಗಿ ಏರಿಕೆ ಕಂಡಿದೆ.

ಧೋನಿ-ಜಡೇಜಾ ಬ್ಯಾಟಿಂಗ್

44ನೇ ಓವರ್​ ವೇಳೆ 1 ಕೋಟಿ 80 ಲಕ್ಷ ಇದ್ದ ವೀಕ್ಷಕರ ಸಂಖ್ಯೆ 47ನೇ ಓವರ್ ವೇಳೆ 2 ಕೋಟಿ 50 ಲಕ್ಷಕ್ಕೆ ಏರಿಕೆಯಾಗಿದೆ. ಜಡೇಜಾ ಔಟ್ ಆದ ಬಳಿಕವೂ ಧೋನಿ ಕ್ರೀಸ್​​ನಲ್ಲಿದ್ದ ಕಾರಣ ನೋಡುಗರಲ್ಲಿ ಗೆಲುವಿನ ಆಸೆ ಕಮರಿರಲಿಲ್ಲ. ಹೀಗಾಗಿ ಪ್ರತಿ ಸೆಕೆಂಡ್​ ನೋಡುಗರ ಸಂಖ್ಯೆ ಲಕ್ಷದಲ್ಲಿ ಏರಿಕೆ ಕಂಡಿದೆ.

ಇಂಡೋ-ಪಾಕ್ ದಾಖಲೆ ಪತನ!

ಇದೇ ಹಾಟ್​​ಸ್ಟಾರ್​​ನಲ್ಲಿ ಜೂನ್​ 16ರಂದು ಭಾರತ- ಪಾಕಿಸ್ತಾನ ನಡುವಿನ ಪಂದ್ಯವನ್ನು ಒಂದೂವರೆ ಕೋಟಿ ನೋಡುಗರು ಕಣ್ತುಂಬಿಕೊಂಡಿದ್ದರು. ಆದರೆ ಸೆಮೀಸ್ ಪಂದ್ಯದ ವೇಳೆ ಈ ದಾಖಲೆ ಪತನವಾಗಿದೆ.