ಕೊನೆ ಪಂದ್ಯ ಗೆದ್ದು ವಿಶ್ವಕಪ್​​​ ಅಭಿಯಾನ ಮುಗಿಸಿದ ಕೆರಿಬಿಯನ್ನರು​​​​​... ಅಫ್ಘಾನ್​ಗೆ ಸೋಲಿನ ಮುಖಭಂಗ

ವಿಶ್ವಕಪ್​​ನ ಕೊನೆಯ ಪಂದ್ಯದಲ್ಲಿ ಗೆಲುವು ದಾಖಲು ಮಾಡುವ ಮೂಲಕ ವೆಸ್ಟ್​ ಇಂಡೀಸ್​ ವಿದಾಯ ಹೇಳಿದ್ದು, ಎಲ್ಲ ಪಂದ್ಯಗಳಲ್ಲೂ ಸೋಲು ಕಾಣುವ ಮೂಲಕ ಅಫ್ಘಾನಿಸ್ತಾನ ನಿರಾಸೆ ಅನುಭವಿಸಿದೆ.

ಲೀಡ್ಸ್​​:ಐಸಿಸಿ ಏಕದಿನ ವಿಶ್ವಕಪ್​​ನ 42ನೇ ಪಂದ್ಯದಲ್ಲಿ ಅಫ್ಘಾನಿಸ್ತಾನದ ವಿರುದ್ಧ ಗೆಲುವು ದಾಖಲು ಮಾಡುವ ಮೂಲಕ ವೆಸ್ಟ್​ ಇಂಡೀಸ್​ ತನ್ನ ಅಭಿಯಾನ ಕೊನೆಗೊಳಿಸಿದ್ದು, ಸೋಲಿನ ಮುಖಭಂಗದೊಂದಿಗೆ ಅಫ್ಘಾನ್​ ವಿಶ್ವಕಪ್​ ಮಹಾಟೂರ್ನಿಗೆ ವಿದಾಯ ಹೇಳಿದೆ.

ಇಲ್ಲಿನ ಲೀಡ್ಸ್​ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್​ ಮಾಡಿದ ವೆಸ್ಟ್‌ ಇಂಡೀಸ್, ಶಾಯ್ ಹೋಪ್ (77), ಎವಿನ್ ಲೆವಿಸ್ (58) ಹಾಗೂ ನಿಕೋಲಸ್ ಪೂರನ್ (58) ಅರ್ಧಶತಕಗಳ ನೆರವಿನಿಂದ ನಿಗದಿತ 50 ಓವರ್‌ಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 311 ರನ್‌ಗಳ ಸ್ಪರ್ಧಾತ್ಮಕ ಮೊತ್ತ ಪೇರಿಸಿತು.

ಈ ಬೆನ್ನತ್ತಿದ್ದ ಅಫ್ಘಾನ್​ ತಂಡ ಆರಂಭಿಕ ನಬಿ ವಿಕೆಟ್​ ಬೇಗನೆ ಕಳೆದುಕೊಳ್ತು. ಇದಾದ ಬಳಿಕ ಒಂದಾದ ರಹಮತ್​​ ಶಾ ಹಾಗೂ ಇಕ್ರಾಂ​ ಅಲಿ ಜೋಡಿ ತಂಡಕ್ಕೆ 133 ರನ್​ಗಳ ಮಹತ್ವದ ಜೊತೆಯಾಟ ನೀಡಿದರು. ರಹಮತ್ 10 ಬೌಂಡರಿಗಳಿಂದ 62 ರನ್ ​ಗಳಿಸಿದರೆ, ಇಕ್ರಾಂ 8 ಬೌಂಡರಿಗಳೊಂದಿಗೆ 86 ರನ್ ​ಗಳಿಸಿದರು. ಈ ವೇಳೆ ಬೌಲಿಂಗ್ ದಾಳಿಗೆ ಇಳಿದ ಗೇಲ್​ 36ನೇ ಓವರ್​​ನಲ್ಲಿ ಇಕ್ರಾಂ(62) ಹಾಗೂ ನಜಿಬುಲ್ಲಾ (31) ವಿಕೆಟ್​ ಪಡೆದುಕೊಂಡರು. ಇದರಿಂದ ಪಂದ್ಯದಲ್ಲಿ ವೆಸ್ಟ್ ಇಂಡೀಸ್​ ಕಮ್​ಬ್ಯಾಕ್​ ಮಾಡಿತು.

ವೆಸ್ಟ್​ ಇಂಡೀಸ್​ ಸಂಭ್ರಮ

ಇದಾದ ಬಳಿಕ ಅಸ್ಗರ್​ ಅಫ್ಘನ್​ 40 ರನ್ ​ಗಳಿಕೆ ಮಾಡಿ ತಂಡವನ್ನ ಗೆಲುವಿನತ್ತ ಮುನ್ನಡೆಸಿದ ಪ್ರಯತ್ನ ಸಹ ವಿಫಲವಾಯಿತು. ಆದರೆ ಉಳಿದ ಬ್ಯಾಟ್ಸ್​​ಮನ್​ಗಳಾದ ಮೊಹಮ್ಮದ್​ ನಬಿ(2), ಶಿರವಾನಿ(6), ರಶೀದ್​ ಖಾನ್(9), ದಾವ್ಲತ್ ಖದ್ರಾನ್(1) ರನ್ ​ಗಳಿಸಿ ವಿಕೆಟ್​ ಒಪ್ಪಿಸಿ ನಿರಾಸೆ ಮೂಡಿಸಿದರು.

ಕೊನೆಯದಾಗಿ ಅಬ್ಬರಿಸಿದ ಶಿರ್ಜಾದ್​ 17 ಎಸೆತಗಳಲ್ಲಿ 25 ರನ್​ ಗಳಿಸಿ ಗೆಲುವಿನ ಆಸೆ ಮೂಡಿಸಿದ್ರೂ ಪ್ರಯೋಜನವಾಗಲಿಲ್ಲ. ಹೀಗಾಗಿ ತಂಡ ತನ್ನೆಲ್ಲಾ ವಿಕೆಟ್​ ಕಳೆದುಕೊಂಡು 288 ರನ್​ಗಳಿಕೆ ಮಾಡುವ ಮೂಲಕ 23 ರನ್​ಗಳ ಸೋಲು ಅನುಭವಿಸಿತು. ವೆಸ್ಟ್​ ಇಂಡೀಸ್​ ಪರ ಬ್ರಾತ್​ವೈಟ್​ 4 ವಿಕೆಟ್​​, ಕೆಮ್ರಾನ್​ ರೂಚ್​ 3 ವಿಕೆಟ್​, ಗೇಲ್​ 1ವಿಕೆಟ್​ ಹಾಗೂ ಥಾಮಸ್​ 1 ವಿಕೆಟ್​ ಪಡೆದುಕೊಂಡರು.

ಈ ಸೋಲಿನೊಂದಿಗೆ ಅಫ್ಘಾನಿಸ್ತಾನ ವಿಶ್ವಕಪ್​ ಟೂರ್ನಿಯಲ್ಲಿ ತಾನಾಡಿರುವ ಎಲ್ಲ ಪಂದ್ಯಗಳಲ್ಲೂ ಸೋತ ಸಾಧನೆ ಮಾಡಿದ್ದರೆ, ವೆಸ್ಟ್​ ಇಂಡೀಸ್​ 9 ಪಂದ್ಯಗಳಲ್ಲಿ 2ರಲ್ಲಿ ಗೆದ್ದು, 6 ಪಂದ್ಯಗಳಲ್ಲಿ ಸೋತು, ಒಂದು ಪಂದ್ಯ ಡ್ರಾ ಮಾಡಿಕೊಂಡಿದೆ.