ಟೆಸ್ಟ್​​ನಲ್ಲಿ ವಿರಾಟ್​ ಪಡೆ ಸಾಧನೆ: ಸತತ ಮೂರನೇ ವರ್ಷ ಟೆಸ್ಟ್ ಚಾಂಪಿಯನ್ ಶಿಪ್ ‘ಗದೆ’ ಭಾರತದ ಪಾಲು!

ಏಪ್ರಿಲ್​ 1ರ ವೇಳಗೆ ಟೆಸ್ಟ್​​ ಕ್ರಿಕೆಟ್ ಶ್ರೇಯಾಂಕ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ತಂಡಕ್ಕೆ ಟೆಸ್ಟ್​​ ಚಾಂಪಿಯನ್​​ಶಿಪ್​​ ಪ್ರಶಸ್ತಿಯನ್ನು(ಗದೆ) ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ನೀಡುತ್ತದೆ.

ಮುಂಬೈ: ಪ್ರತಿ ವರ್ಷ ಐಸಿಸಿ ನೀಡುವ ಟೆಸ್ಟ್ ಚಾಂಪಿಯನ್ ಶಿಪ್ ಟ್ರೋಫಿ ಗದೆ ಭಾರತದ ಪಾಲಾಗಿದೆ. ಅಂತಾರಾಷ್ಟ್ರೀಯ ಟೆಸ್ಟ್​ ರ‍್ಯಾಂಕಿಂಗ್​​ನಲ್ಲಿ ನಂಬರ್​ ಒನ್​ ಸ್ಥಾನದಲ್ಲಿರುವ ವಿರಾಟ್​ ಕೊಹ್ಲಿ ನೇತೃತ್ವದ ಟೀಂ ಇಂಡಿಯಾ ಸತತ ಮೂರನೇ ವರ್ಷ ಟೆಸ್ಟ್​ ಚಾಂಪಿಯನ್​ ಶಿಪ್​ ಗದೆ ತನ್ನದಾಗಿಸಿಕೊಂಡಿದೆ.

ಏಪ್ರಿಲ್​ 1ರ ವೇಳಗೆ ಟೆಸ್ಟ್​​ ಕ್ರಿಕೆಟ್ ಶ್ರೇಯಾಂಕ ಪಟ್ಟಿಯಲ್ಲಿ ಅಗ್ರಸ್ಥಾನದಲ್ಲಿರುವ ತಂಡಕ್ಕೆ ಟೆಸ್ಟ್​​ ಚಾಂಪಿಯನ್​​ಷಿಪ್​​ ಪ್ರಶಸ್ತಿಯನ್ನು(ಗದೆ) ಅಂತಾರಾಷ್ಟ್ರೀಯ ಕ್ರಿಕೆಟ್ ಮಂಡಳಿ ನೀಡುತ್ತದೆ. ಈ ಪ್ರಶಸ್ತಿಯನ್ನು 2003 ರಿಂದ ಐಸಿಸಿ ನೀಡುತ್ತಾ ಬಂದಿದೆ. ಟೆಸ್ಟ್​ನಲ್ಲಿ ಈ ಚಾಂಪಿಯನ್​ಶಿಪ್​ ಗದೆ ಗೆಲ್ಲುವ ತಂಡಕ್ಕೆ ಐಸಿಸಿಯಿಂದ 6,92,62,500.00 (6.92 ಕೋಟಿ )ರೂ ಮೊತ್ತ ಸಿಗಲಿದೆ. ಇದೀಗ ಇಷ್ಟೊಂದು ಹಣ ಭಾರತೀಯ ಕ್ರಿಕೆಟ್​ ಮಂಡಳಿ ಪಾಲಾಗಿದೆ.

ಇದರ ಜತೆಗೆ ಟೀಂ ಇಂಡಿಯಾ ಕ್ಯಾಪ್ಟನ್​ ವಿರಾಟ್​ ಕೊಹ್ಲಿಗೆ ವಿಶ್ವದ ನಂಬರ್​ ಒನ್​ ಟೆಸ್ಟ್​ ಬ್ಯಾಟ್ಸ್​ಮನ್​ ಎಂಬ ಪಟ್ಟವನ್ನೂ ನೀಡಿ ಗೌರವಿಸಿದೆ. ಇತ್ತ ಟೆಸ್ಟ್​ ಶ್ರೇಯಾಂಕದಲ್ಲಿ 2ನೇ ಸ್ಥಾನದಲ್ಲಿರುವ ನ್ಯೂಜಿಲ್ಯಾಂಡ್​ 3,46,31,250.00(3.46ಕೋಟಿ) ರೂ ಮೊತ್ತ ಹಾಗೂ ಮೂರನೇ ಸ್ಥಾನದಲ್ಲಿರುವ ದಕ್ಷಿಣ ಆಫ್ರಿಕಾ 1,38,52,500.00 ರೂ ಮೊತ್ತ ಹಾಗೂ 4ನೇ ಸ್ಥಾನದಲ್ಲಿರುವ ಆಸ್ಟ್ರೇಲಿಯಾ 69,26,500.00(69ಲಕ್ಷ) ರೂ ಮೊತ್ತ ಪಡೆದುಕೊಳ್ಳಲಿದೆ.

ಇದೇ ವಿಷಯವಾಗಿ ಮಾತನಾಡಿರುವ ಟೀಂ ಇಂಡಿಯಾ ಕ್ಯಾಪ್ಟನ್​ ಕೊಹ್ಲಿ, ಐಸಿಸಿ ಟೆಸ್ಟ್​ ಚಾಂಪಿಯನ್​ಶಿಪ್​ ಮತ್ತೊಮ್ಮೆ ಪಡೆದುಕೊಂಡಿದ್ದಕ್ಕಾಗಿ ಹೆಮ್ಮೆ ಇದೆ. ಟೆಸ್ಟ್​​ನಲ್ಲಿ ನಮ್ಮ ತಂಡದ ಅದ್ಭುತ ಪ್ರದರ್ಶನ ನೀಡುತ್ತಿದೆ. ಮುಂದಿನ ದಿನಗಳಲ್ಲೂ ಇದು ಮುಂದುವರೆಯಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.