Uncle's ನ ಹೊಡಿಬೇಕು ಸುಬ್ಬಿ... ಆರ್​ಸಿಬಿ ಅಭಿಮಾನಿಗಳ ಸಂದೇಶ

ಕನ್ನಡಿಗ ದೇವದತ್ ಪಡಿಕ್ಕಲ್ ಮತ್ತು ಪವನ್ ದೇಶಪಾಂಡೆ ಫೋಟೋಗಳೊಂದಿಗೆ ಕನ್ನಡದಲ್ಲೇ ಟ್ವೀಟ್​ ಮಾಡಿರುವ ಆರ್​ಸಿಬಿ ತಂಡಕ್ಕೆ ಹಲವು ರೀತಿಯಲ್ಲಿ ವಿಶ್ ಮಾಡಿರುವ ಅಭಿಮಾನಿಗಳು, ವಿಭಿನ್ನವಾಗಿ ಶುಭ ಕೋರುತ್ತಿದ್ದಾರೆ.

ಹೈದರಾಬಾದ್:13ನೇ ಆವೃತ್ತಿಯ ಐಪಿಎಲ್ ಆರಂಭಕ್ಕೆ ದಿನಗಣನೆ ಶುರುವಾಗಿದ್ದು, ಈಗಾಗಲೇ ವೇಳಾಪಟ್ಟಿ ಪ್ರಕಟಗೊಂಡಿದೆ. ಸೆ. 19 ರಂದು ನಡೆಯಲಿರುವ ಮೊದಲ ಪಂದ್ಯದಲ್ಲಿ ಮುಂಬೈ ಹಾಗೂ ಚೆನ್ನೈ ತಂಡ ಮುಖಾಮುಖಿ ಆಗಲಿವೆ. ಇತ್ತ ಆರ್​ಸಿಬಿ ತಂಡ ಸೆ.21 ರಂದು ಹೈದರಾಬಾದ್​ ವಿರುದ್ಧ ತನ್ನ ಮೊದಲ ಪಂದ್ಯ ಆಡಲಿದೆ.

ಕಳೆದ 12 ವರ್ಷಗಳಿಂದ ಟ್ರೋಫಿಗಾಗಿ ಸೆಣಸಾಡುತ್ತಿರುವ ಬೆಂಗಳೂರು ತಂಡ ಈ ಬಾರಿ ಕಪ್​ ಗೆಲ್ಲುವ ಫೇವರಿಟ್​ ತಂಡಗಳಲ್ಲಿ ಒಂದಾಗಿದೆ. ಯಾವಾಗಲು ಕನ್ನಡಿಗರಿಲ್ಲದೆ ಅಭಿಮಾನಿಗಳ ಆಕ್ರೋಶಕ್ಕೆ ಗುರಿಯಾಗುತ್ತಿದ್ದ ತಂಡದಲ್ಲಿ ಈ ಬಾರಿ ಇಬ್ಬರು ಕನ್ನಡಿಗರಿದ್ದಾರೆ. ಉತ್ತಮ ಫಾರ್ಮ್​ನಲ್ಲಿರುವ ದೇವದತ್​ ಪಡಿಕ್ಕಲ್ ಆಡುವ 11ರ ಬಳಗದಲ್ಲಿ ಅವಕಾಶ ಪಡೆಯಲಿದ್ದಾರೆ ಎಂಬ ನಿರೀಕ್ಷೆ ಇದೆ.

ಈ ಮಧ್ಯೆ ಕನ್ನಡಿಗ ದೇವದತ್ ಪಡಿಕ್ಕಲ್ ಮತ್ತು ಪವನ್ ದೇಶಪಾಂಡೆ ಫೋಟೋಗಳೊಂದಿಗೆ ಕನ್ನಡದಲ್ಲೇ ಟ್ವೀಟ್​ ಮಾಡಿರುವ ಆರ್​ಸಿಬಿ ತಂಡ ನಮ್ಮ ಕರ್ನಾಟಕದ ಹುಡುಗರಿಗೆ ಯಾವ ಸಂದೇಶವನ್ನು ನೀಡಲು ನೀವು ಬಯಸುತ್ತೀರಿ? ಎಂದು ಕೇಳಿದೆ.

ಬೆಂಗಳೂರು ತಂಡದ ಟ್ವೀಟ್​ಗೆ ಪ್ರತಿಕ್ರಿಯಿಸಿರುವ ಅಭಿಮಾನಿಗಳು ತರಹೇವಾರಿ ವಿಶ್ ಮಾಡಿದ್ದಾರೆ. ಕೆಲವರು ನಾವು ನಮ್ಮ ಆಟಗಾರರಿಗೆ ಯಾವುದೇ ಸಲಹೆ ನೀಡಲು ಬಯಸುವುದಿಲ್ಲ. ಆದರೆ 11ರ ಬಳಗದಲ್ಲಿ ಆಡಿಸುವಂತೆ ನಿಮಗೆ ಸಲಹೆ ನೀಡುತ್ತೇವೆ ಎಂದಿದ್ದಾರೆ.

ಇನ್ನೂ ಕೆಲವರು ನಾವು ಕಪ್​ಗೆಲ್ಲದಿದ್ದರೂ ಪರವಾಗಿಲ್ಲ ಆದರೆ ಸಿಎಸ್​ಕೆ ತಂಡವನ್ನು ಸೋಲಿಸಬೇಕು ಎಂದ್ರೆ. ಮತ್ತೊಬ್ಬರು ಟ್ವೀಟ್​ ಮಾಡಿ Uncle's ನ ಹೊಡಿಬೇಕು ಸುಬ್ಬಿ ಎಂದು ಟಗರು ಸಿನಿಮಾದ ಡೈಲಾಗ್​ನಲ್ಲೇ ಸಂದೇಶ ನೀಡಿದ್ದಾರೆ.​ ಮತ್ತೆ ಕೆಲವರು ಈ ಸಾರಿ ಕಪ್ ನಮ್ದೆ ಗುರೂ ಎಂದಿದ್ದಾರೆ.

ಕಳೆದ ಒಂದು ವಾರದಿಂದ ಆರ್​ಸಿಬಿ ಆಟಗಾರರು ಭರ್ಜರಿ ಅಭ್ಯಾಸದಲ್ಲಿ ನಿರತರಾಗಿದ್ದು, ಕಪ್ ಗೆಲ್ಲುವ ವಿಶ್ವಾಸದಲ್ಲಿದ್ದಾರೆ.