ಹೈದರಾಬಾದ್:ಕಳೆದ ಕೆಲವು ದಿನಗಳಿಂದ, ಕ್ರಿಕೆಟ್ ತಜ್ಞರು ಮತ್ತು ಅಭಿಮಾನಿಗಳು ಐಪಿಎಲ್ ಬಗ್ಗೆ ಸಾಕಷ್ಟು ಚರ್ಚೆ ನಡೆಸುತ್ತಿದ್ದಾರೆ. ಇಂಡಿಯನ್ ಪ್ರೀಮಿಯರ್ ಲೀಗ್ ಹರಾಜು ಪ್ರಕ್ರಿಯೆಗಾಗಿ ಈಗಾಗಲೆ ಹಲವು ಆಟಗಾರರನ್ನು ರಿಲೀಸ್ ಮಾಡಿರುವ ತಂಡಗಳು, ಸಮರ್ಥ ಆಟಗಾರರನ್ನು ಖರೀದಿಸುವತ್ತ ಗಮನ ಹರಿಸಿವೆ.
ಜಾಲತಾಣದಲ್ಲಿ ಐಪಿಎಲ್ ಬಗ್ಗೆ ಸಾಕಷ್ಟು ಚರ್ಚೆ ನಡೆಯುತ್ತಿದ್ದು, ಆರ್ಸಿಬಿ ಅಭಿಮಾನಿಯೊಬ್ಬ, ಕೆ.ಎಲ್ ರಾಹುಲ್ ಅವರನ್ನು ಆರ್ಸಿಬಿ ತಂಡಕ್ಕೆ ಹಿಂದಿರುಗಿಸಿ ಎಂದು ಕಿಂಗ್ಸ್ ಇಲೆವೆನ್ ಪಂಜಾಬ್ ತಂಡದ ಬ್ಯಾಟಿಂಗ್ ಕೋಚ್ ವಾಸೀಮ್ ಜಾಫರ್ ಅವರಿಗೆ ಮನವಿ ಮಾಡಿದ್ದಾನೆ.
ಆತನ ಟ್ವೀಟ್ಗೆ ಪ್ರತಿಕ್ರಿಯಿಸಿರುವ ವಾಸೀಮ್ ಜಾಫರ್, ರಾಹುಲ್ ಅವರನ್ನು ಕಳುಹಿಸಿ ಕೊಟ್ಟರೆ ನಮ್ಮ ಬಳಿ ಏನು ಉಳಿಯುತ್ತದೆ? ಎಂದು ಪ್ರಶ್ನಿಸಿದ್ದಾರೆ. ಇಷ್ಟಕ್ಕೆ ಸುಮ್ಮನಾಗದ ಮತ್ತೋರ್ವ ಅಭಿಮಾನಿ, ಗೇಲ್ ಅವರನ್ನಾದರೂ ಕಳುಹಿಸಿ ಎಂದಿದ್ದಾರೆ. ಈ ಟ್ವೀಟ್ಗೂ ಪ್ರತಿಕ್ರಿಯಿಸಿರುವ ಜಾಫರ್, ಗೇಲ್ ಗಂಟೆ ಬಾರಿಸುತ್ತಿರುವ ಫೋಟೋ ಟ್ವೀಟ್ ಮಾಡುವ ಮೂಲಕ ಸಾಧ್ಯವಿಲ್ಲ ಎಂದು ಹೇಳಿದ್ದಾರೆ.
ಹಲವು ಸೀಸನ್ಗಳ ಕಾಲ ಆರ್ಸಿಬಿ ತಂಡವನ್ನು ಪ್ರತಿನಿಧಿಸಿದ್ದ ಗೇಲ್, ಐಪಿಎಲ್ನಲ್ಲಿ ಅಬ್ಬರಿಸಿದ್ದರು. ಬೆಂಗಳೂರು ತಂಡದಲ್ಲಿದ್ದಾಗ ಯೂನಿವರ್ಸ್ ಬಾಸ್ ಹಲವು ದಾಖಲೆ ಬರೆದಿದ್ದರು. ಉತ್ತಮ ಪ್ರದರ್ಶನ ತೋರದ ಕಾರಣ ಆರ್ಸಿಬಿ ರಾಹುಲ್ ಅವರನ್ನೂ ತಂಡದಿಂದ ಕೈಬಿಟ್ಟಿತ್ತು. ಆದರೆ, ಪಂಜಾಬ್ ತಂಡ ಸೇರಿಕೊಂಡು ಅಬ್ಬರಿಸುತ್ತಿರುವ ರಾಹುಲ್, ಕಳೆದ ಸೀಸನ್ನಲ್ಲಿ ಅತಿಹೆಚ್ಚು ರನ್ ಗಳಿಸಿದ ಆಟಗಾರ ಎಂಬ ಕೀರ್ತಿಗೆ ಪಾತ್ರರಾಗಿದ್ರು.