ಮೊದಲ ದಿನದಾಟಕ್ಕೆ ಮಳೆ ಅಡ್ಡಿ: ರೋಹಿತ್ ಶತಕದ ಸೊಗಸು, ಮಯಾಂಕ್​ ಫಿಫ್ಟಿ!

ದಕ್ಷಿಣ ಆಫ್ರಿಕಾ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್​​ ಪಂದ್ಯದಲ್ಲಿ ಟೀಂ ಇಂಡಿಯಾ ಉತ್ತಮ ಮೊತ್ತದತ್ತ ಮುನ್ನುಗುತ್ತಿದ್ದು, ಭಾರತದ ಆಸೆಗೆ ಮಳೆರಾಯ ಅಡ್ಡಿಯಾಗಿದ್ದಾನೆ. ಇನ್ನು 30 ಓವರ್​ ಬಾಕಿ ಇರುವಾಗಲೇ ಮೊದಲ ದಿನದಾಟ ಮುಗಿದಿದೆ.

ವಿಶಾಖಪಟ್ಟಣಂ:ದಕ್ಷಿಣ ಆಫ್ರಿಕಾ ವಿರುದ್ಧ ನಡೆಯುತ್ತಿರುವ ಮೊದಲ ಟೆಸ್ಟ್​ ಪಂದ್ಯದ ಆರಂಭಿಕ ದಿನ ಮಳೆಯಿಂದಾಗಿ ರದ್ದಾಗಿದ್ದು, ರೋಹಿತ್​ ಶರ್ಮಾ ಆಕರ್ಷಕ ಶತಕ (115) ಹಾಗೂ ಕನ್ನಡಿಗ ಮಯಾಂಕ್​ ಅಗರವಾಲ್​ (84) ರನ್​ ನೆರವಿನಿಂದ 59.1 ಓವರ್​ಗಳಲ್ಲಿ 202ರನ್​ಗಳಿಕೆ ಮಾಡಿದ್ದು, ನಾಳೆಗೆ ಬ್ಯಾಟಿಂಗ್​ ಕಾಯ್ದುಕೊಂಡಿದೆ.

ಆಂಧ್ರಪ್ರದೇಶದ ವೈ ಎಸ್​​ ರಾಜಶೇಖರ್​ ರೆಡ್ಡಿ ಕ್ರಿಕೆಟ್​ ಮೈದಾನದಲ್ಲಿ ನಡೆದ ಟೆಸ್ಟ್​​ ಪಂದ್ಯದಲ್ಲಿ ಟಾಸ್​ ಗೆದ್ದ ಭಾರತ ಬ್ಯಾಟಿಂಗ್ ಆಯ್ದುಕೊಂಡಿತು. ಟೆಸ್ಟ್​ ಕ್ರಿಕೆಟ್​​ನಲ್ಲೂ ಆರಂಭಿಕನಾಗಿ ಕಣಕ್ಕಿಳಿದ ರೋಹಿತ್​ ಶರ್ಮಾ 84 ಎಸೆತಗಳಲ್ಲಿ ಅರ್ಧಶತಕ ಹಾಗೂ 160 ಎಸೆತಗಳಲ್ಲಿ ಶತಕ ಪೂರೈಸಿದ್ದು​ 173 ಎಸೆತಗಳಲ್ಲಿ ಅಜೇಯ 115 ರನ್​ ಗಳಿಸಿದ್ರು.ಇದು ರೋಹಿತ್​ ಟೆಸ್ಟ್​ ವೃತ್ತಿ ಜೀವನದ 4ನೇ ಟೆಸ್ಟ್​ ಶತಕವಾಗಿದೆ.

ರೋಹಿತ್​ ಶರ್ಮಾ

ರೋಹಿತ್‌ಗೆ ಸಾಥ್​ ನೀಡಿದ ಮಯಾಂಕ್​ ಅಗರವಾಲ್​ ಕೂಡ ಉತ್ತಮ ಪ್ರದರ್ಶನ ನೀಡಿದರು. ತಾವು ಎದುರಿಸಿದ 183 ಎಸೆತಗಳಲ್ಲಿ 11 ಬೌಂಡರಿ ಹಾಗೂ ಎರಡು ಸಿಕ್ಸರ್​ ಸೇರಿ 84 ರನ್ ಗಳಿಸಿದ್ದು, ನಾಳೆಗೆ ಬ್ಯಾಟಿಂಗ್​ ಕಾಯ್ದಿರಿಸಿಕೊಂಡಿದ್ದಾರೆ.

ರೋಹಿತ್​ ಶರ್ಮಾ

ಟೀಂ ಇಂಡಿಯಾ 202 ರನ್​ಗಳಿಕೆ ಮಾಡುತ್ತಿದ್ದಂತೆ ಸುರಿದ ಮಳೆ ಹಾಗೂ ಮಂದ ಬೆಳಕಿನ ಕಾರಣದಿಂದಾಗಿ ಮೊದಲ ದಿನದಾಟ ರದ್ಧು ಪಡಿಸಲಾಗಿದೆ. ನಾಳೆ ಆಟ ಮುಂದುವರಿಯಲಿದೆ. ಇನ್ನು 30 ಓವರ್​ಗಳ ಆಟ ಬಾಕಿ ಇದ್ದ ಕಾರಣ, ಟೀಂ ಇಂಡಿಯಾ ಬೃಹತ್​ ಮೊತ್ತ ಪೇರಿಸುವ ಕನಸು ಕಾಣುತ್ತಿತ್ತು. ಆದರೆ ಇದಕ್ಕೆ ಮಳೆರಾಯ ಅಡ್ಡಿಪಡಿಸಿದ್ದಾನೆ.