ಮುಂಬೈ: ಟೂರ್ನಿಯಲ್ಲಿ ಅದ್ಭುತವಾಗಿ ಆಡಿದರೂ ಸೆಮಿ ಫೈನಲ್ನಲ್ಲಿ ಅನುಭವಿಸಿದ ಆಘಾತಕಾರಿ ಸೋಲು ನನ್ನನ್ನು ಹಾಗೂ ತಂಡದ ಆಟಗಾರರನ್ನು ಇನ್ನೂ ಕಾಡುತ್ತಿದೆ ಎಂದು ಕನ್ನಡಿಗ ಕೆಎಲ್ ರಾಹುಲ್ ತಿಳಿಸಿದ್ದಾರೆ.
ಟೂರ್ನಿಯಲ್ಲಿ ಅಗ್ರಸ್ಥಾನ ಪಡೆದಿದ್ದ ಭಾರತ ಸೆಮಿಫೈನಲ್ನಲ್ಲಿ ನ್ಯೂಜಿಲ್ಯಾಂಡ್ ನೀಡಿದ 240ರನ್ಗಳನ್ನು ಚೇಸ್ ಮಾಡಲಾಗದೆ 221 ರನ್ಗಳಿಗೆ ಆಲೌಟ್ ಆಗುವ ಮೂಲಕ 18 ರನ್ಗಳಿಂದ ಸೋಲನುಭವಿಸಿತ್ತು. ಆರಂಭಿಕರಾದ ರಾಹುಲ್(1), ರೋಹಿತ್(1) ಹಾಗೂ ಕೊಹ್ಲಿ(1) ರನ್ಗೆ ವಿಕೆಟ್ ಒಪ್ಪಿಸಿ ನಿರಾಶೆ ಮೂಡಿಸಿದ್ದರು.
ಈ ಕುರಿತು ಚಾಟ್ ಶೋ ದಿ ಮೈಂಡ್‌ ಬಿಹೈಂಡ್‌ ನಲ್ಲಿ ಮಾತನಾಡಿರುವ ರಾಹುಲ್, ಈ ಹಿಂದೆ ಮುಗಿದು ಹೋಗಿರುವ ಪಂದ್ಯಗಳಲ್ಲಿ ಫಲಿತಾಂಶ ಬದಲಾಯಿಸುವ ಅವಕಾಶ ಒದಗಿ ಬಂದರೆ, ಯಾವುದೇ ಅನುಮಾನವಿಲ್ಲದೆ ಹೇಳುವೆ, ಅದು 2019ರ ವಿಶ್ವಕಪ್ ಸೆಮಿಫೈನಲ್ ಪಂದ್ಯ ಎಂದಿದ್ದಾರೆ.
" ಆ ಸೋಲು ತಂಡದ ಬಹುತೇಕ ಆಟಗಾರರಿಗೆ ಇಂದಿಗೂ ಅರಗಿಸಿಕೊಳ್ಳಲಾಗುತ್ತಿಲ್ಲ. ಈಗಲೂ ಕೆಲ ಸಂದರ್ಭಗಳಲ್ಲಿ ಅದು ನಮ್ಮನ್ನು ಕಾಡುತ್ತಿರುತ್ತದೆ" ಎಂದು ಅವರು ಹೇಳಿದ್ದಾರೆ.
"ಈ ಕುರಿತು ಹಿರಿಯ ಆಟಗಾರರು ಏನನಭವಿಸಿದ್ದಾರೊ ನನಗೆ ಊಹಿಸಲು ಸಾಧ್ಯವಿಲ್ಲ. ಆದರೆ ವಿಶ್ವಕಪ್ ಟೂರ್ನಮೆಂಟ್ ಉದ್ದಕ್ಕೂ ನಾವು ಚೆನ್ನಾಗಿ ಆಡಿದ್ದೇವೆ ಎಂದು ತಿಳಿದುಕೊಳ್ಳುವುದು ಕಷ್ಟಕರವಾಗುತ್ತದೆ. ನಾನು ಇಂದಿಗೂ ಕೆಲವೊಮ್ಮೆ ಆ ದುಸ್ವಪ್ನಕ್ಕೆ ನಿದ್ದೆಯಿಂದ ಕೆಲವೊಮ್ಮೆ ಎಚ್ಚರಗೊಳ್ಳುತ್ತಿದ್ದೇನೆ "ಎಂದು ಅವರು ತಿಳಿಸಿದ್ದಾರೆ.