ಶಕಿಬ್​, ರಹೀಮ್​ ಅರ್ಧಶತಕ... ಅಫ್ಘಾನಿಸ್ತಾನಕ್ಕೆ 263 ರನ್​ಗಳ ಟಾರ್ಗೆಟ್​ ನೀಡಿದ ಬಾಂಗ್ಲಾದೇಶ

ಹಿರಿಯ ಕ್ರಿಕೆಟಿಗರಾದ ಶಕಿಬ್​ ಅಲ್​ ಹಸನ್​ ಹಾಗೂ ಮುಶ್ಫಿಕರ್​ ರಹೀಮ್​ ಅರ್ಧಶತಕದ ನೆರವಿನಿಂದ ಬಾಂಗ್ಲಾದೇಶ ತಂಡ 262 ರನ್​ಗಳಿಸಿದೆ.

ಸೌಥಾಂಪ್ಟನ್​​: ಶಕಿಬ್​​(51) ಹಾಗೂ ಮುಶ್ಫಿಕರ್​ ರಹೀಮ್​(83) ರ ಅರ್ಧಶತಕದ ನೆರವಿನಿಂದ ಬಾಂಗ್ಲಾದೇಶ ತಂಡ ಅಫ್ಘಾನಿಸ್ತಾನದ ವಿರುದ್ಧ 263 ರನ್​ಗಳ ಟಾರ್ಗೆಟ್​ ನೀಡಿದೆ.

ಟಾಸ್​ ಗೆದ್ದ ಅಫ್ಘಾನಿಸ್ತಾನ ಬಾಂಗ್ಲಾದೇಶಕ್ಕೆ ಬ್ಯಾಟಿಂಗ್​​ ನೀಡಿತು. ಬ್ಯಾಟಿಂಗ್​ ಆರಂಭಿಸಿದ ಬಾಂಗ್ಲಾದೇಶ ಆರಂಭಿಕನಾಗಿ ಬಡ್ತಿ ಪಡೆದು ಬಂದಿದ್ದ ಲಿಟ್ಟನ್​ ದಾಸ್​ ಕೇವಲ 16 ರನ್​ಗಳಿಗೆ ವಿಕೆಟ್​ ಒಪ್ಪಿಸಿದರು. ಆದರೆ, ಹಿರಿಯ ಆಟಗಾರ ತಮೀಮ್​(36) ಹಾಗೂ ಶಕಿಬ್​(51) ಎರಡನೇ ವಿಕೆಟ್​ಗೆ 59 ರನ್​ಗಳ ಜೊತೆಯಾಟ ನೀಡಿದರು.

53 ಎಸೆತಗಳಲ್ಲಿ 36 ರನ್​ಗಳಿಸಿದ್ದ ತಮೀಮ್​ರನ್ನು ನಬಿ ಕ್ಲೀನ್​ ಬೌಲ್ಡ್​ ಮಾಡಿದರು. ಇವರ ಬೆನ್ನಲ್ಲೇ ಶಕಿಬ್​ 69 ಎಸೆತಗಳಲ್ಲಿ 1 ಬೌಂಡರಿ ಸಿಡಿಸಿ 51 ರನ್​ಗಳಿಸಿದ್ದ ಶಕಿಬ್​ ಅಲ್​ ಹಸನ್​ ಕೂಡ ಔಟಾದರು. ನಂತರ ಬಂದ ಸೌಮ್ಯ ಸರ್ಕಾರ್​ 3 ರನ್​ಗಳಿಗೆ ವಿಕೆಟ್​ ಒಪ್ಪಿಸಿದರು.

ಈ ಹಂತದಲ್ಲಿ ಒಂದಾದ ವಿಕೆಟ್​ ಕೀಪರ್​ ರಹೀಮ್​ ಹಾಗೂ ಮೊಹಮ್ಮದ್​ ಉಲ್ಲಾ 6 ನೇ ವಿಕೆಟ್​ಗೆ 56 ರನ್​ ಸೇರಿಸುವ ಮೂಲಕ ತಂಡಕ್ಕೆ ಚೇತರಿಕೆ ನೀಡಿದರು. 27 ರನ್​ಗಳಿಸಿದ್ದ ಮಹಮದುಲ್ಲಾರನ್ನು ನೈಬ್​ ಔಟ್​ ಮಾಡಿದರು. ಕೊನೆಯಲ್ಲಿ ರಹೀಮ್ 87 ಎಸೆತಗಳಲ್ಲಿ 83​ ಹಾಗೂ ಮೊಸದ್ದೆಕ್​ ಹುಸೇನ್ 24 ಎಸೆತಗಳಲ್ಲಿ 35 ರನ್​ಗಳಿಸಿ ತಂಡದ ಮೊತ್ತ 250ರ ಗಡಿ ದಾಟಲು ನೆರವಾದರು.​

ಕಳೆದ ಪಂದ್ಯದಲ್ಲಿ ಶತಕ ಸಿಡಿಸಿದ್ದ ರಹೀಮ್ ಇಂದಿನ ಪಂದ್ಯದಲ್ಲೂ 83 ರನ್​ಗಳಿಸಿ ಮಿಂಚಿದರು. ಇವರ ಇನ್ನಿಂಗ್ಸ್​ನಲ್ಲಿ 4 ಬೌಂಡರಿ ಹಾಗೂ 1 ಸಿಕ್ಸರ್​ ಒಳಗೊಂಡಿತ್ತು.

ಅಫ್ಘಾನ್​ ಪರ ಮುಜೀಬ್​ ಉರ್​ ರಹಮಾನ್​ 3, ಗುಲ್ಬದ್ದೀನ್​ ನೈಬ್​ 2, ನಬಿ, ದವ್ಲಾತ್​ ಜಾಡ್ರನ್​ ತಲಾ ಒಂದು ವಿಕೆಟ್​ ಪಡೆದರು.