ಡಾಕಾ: ವಿಶ್ವಕಪ್ ನಂತರ ಕೋಚ್ಗಳನ್ನು ಬದಲಾಯಿಸುತ್ತಿರುವ ಬಾಂಗ್ಲಾದೇಶ ತಂಡ ನ್ಯೂಜಿಲ್ಯಾಂಡ್ನ ಮಾಜಿ ಸ್ಪಿನ್ನರ್ ಡೇನಿಯಲ್ ವಿಟೋರಿ ಹಾಗೂ ದಕ್ಷಿಣ ಆಫ್ರಿಕಾ ಚಾರ್ಲ್ ಲಾಂಗ್ವೆಲ್ಡ್ರನ್ನು ಬೌಲಿಂಗ್ ಕೋಚ್ಗಳಾಗಿ ಆಯ್ಕೆ ಮಾಡಿಕೊಂಡಿದೆ.
ವಿಶ್ವಕಪ್ವರೆಗೆ ಬೌಲಿಂಗ್ ಕೋಚ್ ಆಗಿದ್ದ ಕಾರ್ಟ್ನಿ ವಾಲ್ಸ್ ಬದಲಿಗೆ ಚಾರ್ಲ್ ಲಾಂಗ್ವೆಲ್ಡ್ ಆಗಿ ಆಯ್ಕೆಯಾಗಿದ್ದಾರೆ. ಕಿವೀಸ್ ಮಾಜಿ ಸ್ಪಿನ್ನರ್ ಡೇನಿಯಲ್ ವಿಟೋರಿ 100 ದಿನಗಳ ಅಲ್ಪಾವಧಿ ಸ್ಪಿನ್ ಬೌಲಿಂಗ್ ಕೋಚ್ ಆಗಿ ಆಯ್ಕೆಯಾಗಿದ್ದಾರೆ. ಇವರ ಕೋಚಿಂಗ್ ಅವಧಿ 2020ರ ಟಿ20 ವಿಶ್ವಕಪ್ವರೆಗೆ ಇರುತ್ತದೆ ಎಂದು ಬಿಸಿಬಿ ಅಧ್ಯಕ್ಷ ನಜ್ಮುಲ್ ಹಸನ್ ತಿಳಿಸಿದ್ದಾರೆ.
ವಿಟೋರಿ ಇತ್ತೇಚಿಗೆ ಆರ್ಸಿಬಿ ಹೆಡ್ ಕೋಚ್ ಹುದ್ದೆಯಿಂದ ಹೊರಬಂದಿದ್ದರು. ಜೊತೆಗೆ ಬಿಬಿಎಲ್ನ ಬ್ರಿಸ್ಬೇನ್ ಹೀಟ್ಸ್ ಬೌಲಿಂಗ್ ಕೋಚ್ ಅವಧಿ ಮುಗಿದಿದ್ದರಿಂದ ಅದನ್ನು ರಿನಿವಲ್ ಮಾಡಿಕೊಂಡಿರಲಿಲ್ಲ, ಇದೀಗ ಬಾಂಗ್ಲದೇಶದ ಬೌಲಿಂಗ್ ಕೋಚ್ ಆಗಲು ಒಪ್ಪಿಗೆ ಸೂಚಿಸಿದ್ದಾರೆ.
ದಕ್ಷಿಣ ಆಫ್ರಿಕಾ ಪರ 72 ಏಕದಿನ, 6 ಟೆಸ್ಟ್ ಹಾಗೂ 12 ಟಿ20 ಪಂದ್ಯಗಳನ್ನಾಡಿರುವ ಲಾಂಗ್ವೆಲ್ಡ್ 2010 ರಲ್ಲಿ ತಮ್ಮ ವೃತ್ತಿ ಬದುಕಿಗೆ ನಿವೃತ್ತ ಘೋಷಿಸಿದ್ದರು. ಈ ಹಿಂದೆ ದಕ್ಷಿಣ ಆಫ್ರಿಕಾ ಹಾಗೂ ಅಫ್ಘಾನಿಸ್ತಾನ ತಂಡಗಳ ಬೌಲಿಂಗ್ ಕೋಚ್ ಆಗಿ ಸೇವೆ ಸಲ್ಲಿಸಿದ್ದಾರೆ.
ಇನ್ನು ಬಾಂಗ್ಲಾದೇಶ ತಂಡ ಮುಖ್ಯ ತರಬೇತುದಾರ ಸ್ಥಾನಕ್ಕೆ ಇನ್ನು ಯಾರು ಆಯ್ಕೆಯಾಗಿಲ್ಲ. ಈಗಾಗಲೆ ಕೆಲವರ ಹೆಸರನ್ನು ಪಟ್ಟಿ ಮಾಡಿದ್ದು, ಕೆಲವೇ ದಿನಗಳಲ್ಲಿ ಕೋಚ್ ಹೆಸರನ್ನು ಅಂತಿಮಗೊಳಿಸಲಾಗುವುದು ಎಂದು ಹಸನ್ ತಿಳಿಸಿದ್ದಾರೆ.
