ಸೀರೆಯುಟ್ಟು, ಬ್ಯಾಟ್​ ಹಿಡಿದು ಬಾಂಗ್ಲಾ ಕ್ರಿಕೆಟರ್ ಮದುವೆ ಫೋಟೋಶೂಟ್​

ಕ್ರಿಕೆಟರ್‌ ಸಂಜಿದಾ, ಕಿತ್ತಳೆ ಬಣ್ಣದ ಸೀರೆ ಉಟ್ಟು, ಕೈತುಂಬ ಬಳೆ, ಮೈತುಂಬ ಆಭರಣ ಹಾಕಿಕೊಂಡು ಕ್ರಿಕೆಟ್ ಮೈದಾನದಲ್ಲಿ ಬ್ಯಾಟ್ ಹಿಡಿದು ಫೋಟೋಗೆ ಫೋಸ್ ನೀಡಿದ್ದಾರೆ. ಈ ಫೋಟೋಗಳನ್ನು ಐಸಿಸಿ ತನ್ನ ಅಧಿಕೃತ ಟ್ವಿಟರ್​ನಲ್ಲಿ ಶೇರ್ ಮಾಡಿಕೊಂಡಿದೆ.

ಹೈದರಾಬಾದ್​:ಬಾಂಗ್ಲಾದೇಶದ ಮಹಿಳಾ ಕ್ರಿಕೆಟರ್ ಸಂಜಿದಾ ಇಸ್ಲಾಮ್ ತಮ್ಮ ವೆಡ್ಡಿಂಗ್ ಫೋಟೋ ಶೂಟ್​ಅನ್ನು ಕ್ರಿಕೆಟ್ ಮೈದಾನದಲ್ಲಿ ಮಾಡಿಸಿದ್ದು ಸಾಮಾಜಿಕ ಜಾಲತಾಣದಲ್ಲಿ ಶೇರ್ ಮಾಡಿಕೊಂಡಿದ್ದಾರೆ. ಅವರ ಕ್ರಿಕೆಟ್ ಪ್ರೇಮಕ್ಕೆ ನೆಟ್ಟಿಗರಿಂದ ಶುಭಾಶಯಗಳ ಸುರಿಮಳೆ ವ್ಯಕ್ತವಾಗುತ್ತಿದೆ.

ಸಂಜಿದಾ ಇತ್ತೀಚೆಗೆ ಬಾಂಗ್ಲಾದೇಶದ ಪ್ರಥಮ ದರ್ಜೆ ಕ್ರಿಕೆಟರ್ ಮಿಮ್ ಮೊಸದೀಕ್ ಅವರನ್ನು ವಿವಾಹವಾಗಿದ್ದಾರೆ. ಈ ಪೋಟೋಶೂಟ್​ನಲ್ಲಿ ಸಂಜಿದಾ, ಕವರ್​ ಡ್ರೈವ್, ಫುಲ್​ಶಾಟ್​ ಆಡುತ್ತಿರುವುದು ಕಂಡುಬಂದಿದೆ.

ಆಗಸ್ಟ್​ 2012 ರಲ್ಲಿ ಐರ್ಲೆಂಡ್ ವಿರುದ್ಧ ತಮ್ಮ ಅಂತಾರಾಷ್ಟ್ರೀಯ ಟಿ20 ಕ್ರಿಕೆಟ್​ಗೆ ಪದಾರ್ಪಣೆ ಮಾಡಿದ ಇವರು, 2018ರಲ್ಲಿ ಏಷ್ಯಾಕಪ್‌ ಗೆದ್ದ ಬಾಂಗ್ಲಾದೇಶ ತಂಡದ ಭಾಗವಾಗಿದ್ದರು.

ಬಲಗೈ ಬ್ಯಾಟರ್ ಆಗಿರುವ ಇವರು 16 ಏಕದಿನ ಮತ್ತು 54 ಟಿ20 ಪಂದ್ಯಗಳನ್ನಾಡಿದ್ದಾರೆ. 8 ವರ್ಷಗಳ ಕ್ರಿಕೆಟ್‌ ಕೆರಿಯರ್​ನಲ್ಲಿ ಏಕದಿನ ಕ್ರಿಕೆಟ್​ ಮೂಲಕ 174 ಹಾಗೂ ಟಿ20 ಕ್ರಿಕೆಟ್​ನಲ್ಲಿ 520 ರನ್ ​ಗಳಿಸಿದ್ದಾರೆ.