ಸೆಮೀಸ್​ ತಲುಪಿರುವ ಆಸೀಸ್​​ ತಂಡಕ್ಕೆ ಆಘಾತ...ಟೂರ್ನಿಯಿಂದ ಹೊರಬಿದ್ದ ಆಲ್​ರೌಂಡರ್​​ ಎಲ್ಲಿಸ್​​ ಪೆರ್ರಿ!

ವಿಶ್ವಕಪ್​ ಸೆಮಿಫೈನಲ್​ಗೆ ಲಗ್ಗೆ ಹಾಕಿರುವ ಆಸ್ಟ್ರೇಲಿಯಾ ತಂಡಕ್ಕೆ ಬಹುದೊಡ್ಡ ಆಘಾತವಾಗಿದೆ. ಗಾಯಗೊಂಡು ತಂಡದಿಂದ ಆಲ್​ರೌಂಡರ್ ಒಬ್ಬರು​ ಹೊರಬಿದ್ದಿದ್ದಾರೆ.

ಸಿಡ್ನಿ:ಹಾಲಿ ಚಾಂಪಿಯನ್‌ ಆಸ್ಟ್ರೇಲಿಯಾ ತಂಡ ಐಸಿಸಿ ಮಹಿಳಾ ಟ್ವೆಂಟಿ–20 ವಿಶ್ವಕಪ್‌ ಕ್ರಿಕೆಟ್‌ ಟೂರ್ನಿಯಲ್ಲಿ ಸೆಮಿಫೈನಲ್‌ ಪ್ರವೇಶಿಸಿದ್ದು, ಇದರ ಬೆನ್ನಲ್ಲೆ ತಂಡಕ್ಕೆ ಬಹುದೊಡ್ಡ ಹೊಡೆತ ಬಿದ್ದಿದೆ.

ಎಲ್ಲಿಸ್​ ಪೆರ್ರಿ ದಾಖಲೆ

ತಂಡದ ಆಲ್​ರೌಂಡರ್​​ ಎಲ್ಲಿಸ್​​ ಪೆರ್ರಿ ಗಾಯಗೊಂಡು ಹೊರಬಿದ್ದಿದ್ದು, ತಂಡಕ್ಕೆ ತುಂಬಲಾರದ ನಷ್ಟವಾಗಿದೆ. ಇದರ ಜತೆಗೆ ಮುಂಬರುವ ದಕ್ಷಿಣ ಆಫ್ರಿಕಾ ವಿರುದ್ಧದ ಸರಣಿಯಿಂದಲೂ ಅವರು ಹೊರಗುಳಿಯಲಿದ್ದಾರೆ. ಸ್ಫೋಟಕ ಬ್ಯಾಟ್ಸ್​ಮನ್​ ಎಂದು ಗುರುತಿಸಿಕೊಂಡಿದ್ದ ಎಲ್ಲಿಸ್​​ ಪೆರ್ರಿ ನ್ಯೂಜಿಲ್ಯಾಂಡ್​ ವಿರುದ್ಧದ ನಿರ್ಣಾಯಕ ಪಂದ್ಯದಲ್ಲಿ ಫೀಲ್ಡಿಂಗ್​ ವೇಳೆ ಸ್ನಾಯು ಸೆಳೆತಕ್ಕೊಳಗಾಗಿ ಪಂದ್ಯದಿಂದ ಅರ್ಧದಲ್ಲೇ ಹೊರ ನಡೆದಿದ್ದರು.

ಪೆರ್ರಿ ಮಹಿಳೆಯರ ಬಿಗ್​ಬ್ಯಾಶ್​ನಲ್ಲಿ ಫೀಲ್ಡಿಂಗ್ ವೇಳೆ ಬಲ ಭುಜದ ಗಾಯಕ್ಕೆ ತುತ್ತಾಗಿ ಟೂರ್ನಿಯಿಂದಲೇ ಹೊರಬಿದ್ದಿದ್ದರು. ನಂತರ ಫಿಟ್​ನೆಸ್​ ಪರೀಕ್ಷೆ ಪಾಸ್​ ಮಾಡಿ ರಾಷ್ಟ್ರೀಯ ತಂಡಕ್ಕೆ ಮರಳಿದ್ದರು. ಇದೀಗ ಮತ್ತೆ ಗಾಯಗೊಂಡಿರುವುದು ನಿಜಕ್ಕೂ ಹಾಲಿ ಚಾಂಪಿಯನ್ನರಿಗೆ ಭಾರಿ ಆಘಾತವಾಗಿದೆ.

ಇದೀಗ ಅವರು ವಿಶ್ವಕಪ್​ ಟೂರ್ನಿಯಿಂದ ಹೊರಗುಳಿಯುತ್ತಿರುವುದರ ಬಗ್ಗೆ ಕೋಚ್​​​​ ಮ್ಯಾಥೂವ್​ ಮೂಟ್​​ ಮಾಹಿತಿ ನೀಡಿದ್ದು, ಆಕೆಯ ಸೇವೆ ತಂಡಕ್ಕೆ ತುಂಬಲಾರದ ನಷ್ಟ ಎಂಬುದನ್ನ ಒಪ್ಪಿಕೊಂಡಿದ್ದಾರೆ.