​ ತಮ್ಮ ತಂದೆ ಬಳಿ ಮದುವೆ ವಿಚಾರ ಮಾತನಾಡಿದ್ದರಂತೆ ಸುಶಾಂತ್​

ಸುಶಾಂತ್​ ಸಿಂಗ್​ ರಜಪೂತ್​ ಕುರಿತು ತಂದೆ ಕೆಕೆ ಸಿಂಗ್​ ಮಾತನಾಡಿದ್ದು, ಮದುವೆ ವಿಚಾರವಾಗಿ ತಂದೆ - ಮಗನ ಮಾತುಕತೆ ಬಗ್ಗೆ ತಿಳಿಸಿದ್ದಾರೆ.

ಮುಂಬೈ: ಸುಶಾಂತ್​ ಸಿಂಗ್​ ರಜಪೂತ್​ ಸಾವಿನಿಂದ ಅವರ ತಂದೆ ಕೆಕೆ ಸಿಂಗ್​ ಇನ್ನೂ ಹೊರಬಂದಿಲ್ಲ. ಮಗನ ಸಾವಿಗೆ ಕಂಬನಿ ಸುರಿಸುತ್ತಾ ಸುಶಾಂತ್​ಗೆ ಸಂಬಂಧಿಸಿದ ಕೆಲವೊಂದು ವಿಚಾರಗಳನ್ನು ಹಂಚಿಕೊಂಡಿದ್ದಾರೆ.

2021ರಲ್ಲಿ ಜೀವನದಲ್ಲಿ ನೆಲೆ ಕಂಡುಕೊಳ್ಳಬೇಕು, ಮದುವೆಯಾಗಬೇಕು ಎಂದು ಸುಶಾಂತ್​ ತಂದೆ ಬಳಿ ತಿಳಿಸಿದ್ದರಂತೆ. ಇನ್ನು ಅಂಕಿತಾ ಲೋಖಂಡೆ ಮತ್ತು ಸುಶಾಂತ್​ ನಡುವಿನ ಸಂಬಂಧದ ಹೊರತು ಪಡಿಸಿ ಬೇರೆ ಏನೂ ತಿಳಿದಿರಲಿಲ್ಲ. ರಿಯಾ ಚಕ್ರಬರ್ತಿ ಕುರಿತಾಗಿ ಮಾಧ್ಯಮಗಳ ಮೂಲಕ ವಿಷಯ ತಿಳಿದಿದೆ ಎಂದಿದ್ದಾರೆ.

ಇನ್ನು ಮಗನ ಮದುವೆ ವಿಚಾರವಾಗಿ ಮಾತನಾಡಿದ ಅವರು, "ಮದುವೆ ವಿಚಾರವಾಗಿ ಈ ಮೊದಲು ನಾನು ಮತ್ತು ಸುಶಾಂತ್​ ಮಾತನಾಡಿದ್ದೆವು. ಕೊರೊನಾ ಇದೆ ಈ ಸಂದರ್ಭದಲ್ಲಿ ನಾನು ಮದುವೆಯಾಗುವುದಿಲ್ಲ. ಆದರೆ, ಸಿನಿಮಾ ರಿಲೀಸ್​ ಆದ ಬಳಿಕ 2021ರ ಫೆಬ್ರವರಿ - ಮಾರ್ಚ್​ ತಿಂಗಳಲ್ಲಿ ಆಗುತ್ತೇನೆ" ಎಂದಿದ್ದರಂತೆ ಸುಶಾಂತ್​.

"ನಿನ್ನ ಜೀವನವನ್ನು ಯಾರೊಂದಿಗೆ ಕಳೆಯಲು ಇಷ್ಟಪಡುತ್ತೀಯೋ ಅವಳ ಜೊತೆಯೇ ನೀನು ವಿವಾಹವಾಗು" ಎಂದು ಹೇಳಿದ್ದರಂತೆ ಕೆಕೆ ಸಿಂಗ್​. ಖಾಸಗಿ ಟಿವಿ ಮಾಧ್ಯಮಕ್ಕೆ ನೀಡಿದ ಸಂದರ್ಶನಲ್ಲಿ ಮಾತನಾಡಿದ ಅವರು, ''ನನ್ನ ಮಗ ಸಣ್ಣ ವಯಸ್ಸಿನಲ್ಲಿರುವಾಗ ಮನಬಿಚ್ಚಿ ಮಾತನಾಡುತ್ತಿದ್ದ. ಆದರೆ ಕೆಲ ವರ್ಷಗಳಿಂದ ಆತ ಏಕಾಂಗಿಯಾಗಿಯೇ ಇರುತ್ತಿದ್ದ. ಹೆಚ್ಚಾಗಿ ಯಾರೊಂದಿಗೂ ಮಾತನಾಡುತ್ತಿರಲಿಲ್ಲ'' ಎಂದಿದ್ದಾರೆ.