ಹ್ಯಾಟ್ರಿಕ್ ಹೀರೋ ಶಿವರಾಜ್ಕುಮಾರ್ ಹಾಗೂ ನಿರ್ದೇಶಕ ಪಿ. ವಾಸು 'ಶಿವಲಿಂಗ' ಚಿತ್ರದ ನಂತರ 'ಆಯುಷ್ಮಾನ್ಭವ' ಸಿನಿಮಾದಲ್ಲಿ ಮತ್ತೆ ಒಂದಾಗಿದ್ದಾರೆ. ಈ ಸಿನಿಮಾ ಮೇಲೆ ಟಗರು ಶಿವನ ಅಭಿಮಾನಿಗಳಗೆ ಕುತೂಹಲ ಹೆಚ್ಚಾಗುವಂತೆ ಮಾಡಿದೆ. ಚಿತ್ರಕ್ಕೆ ಮೊದಲು 'ಆನಂದ್' ಎಂಬ ಟೈಟಲ್ ಇಟ್ಟು ಆರಂಭಿಸಿದ್ದರೂ ಕೊನೆಗೆ ಸಿನಿಮಾಗೆ 'ಆಯುಷ್ಮಾನ್ಭವ' ಎಂಬ ಹೆಸರು ಫೈನಲ್ ಮಾಡಲಾಗಿದೆ.
ಇದೀಗ ಸಿನಿಮಾ ಬಿಡುಗಡೆಗೆ ರೆಡಿಯಾಗಿದ್ದು ಇದೇ ಮೊದಲ ಬಾರಿಗೆ ಚಿತ್ರತಂಡ ಸುದ್ದಿಗೋಷ್ಠಿ ನಡೆಸಿ ಚಿತ್ರದ ಬಗ್ಗೆ ಮಾಹಿತಿ ಹಂಚಿಕೊಂಡರು. ಪಿ. ವಾಸು ಅವರ ಈ ಹಿಂದಿನ ಚಿತ್ರಗಳಂತೆ ಈ ಚಿತ್ರದಲ್ಲಿ ಕೂಡಾ ಸೈಕಾಲಾಜಿಕಲ್ ಎಳೆ ಇದ್ದು, ಚಿತ್ರದಲ್ಲಿನ ನನ್ನ ಪಾತ್ರ ನನ್ನ ಅಭಿಮಾನಿಗಳಿಗೆ ಅಲ್ಲದೆ ಫ್ಯಾಮಿಲಿ ಆಡಿಯನ್ಗಳಿಗೂ ಬಹಳ ಇಷ್ಟವಾಗುತ್ತದೆ ಎಂದು ಶಿವಣ್ಣ ಅವರ ಪಾತ್ರದ ಬಗ್ಗೆ ಹೇಳಿಕೊಂಡರು. ಅಲ್ಲದೆ ಚಿತ್ರದ ಕಥೆಗೂ 'ಆನಂದ್' ಟೈಟಲ್ಗೂ ಮ್ಯಾಚ್ ಆಗದ ಕಾರಣ ಟೈಟಲ್ ಬದಲಿಸಿದ್ದಾಗಿ ಶಿವಣ್ಣ ಹೇಳಿದರು. ಇನ್ನು ದ್ವಾರಕೀಶ್ ಚಿತ್ರಾಲಯ ಸಂಸ್ಥೆಗೆ ಸಿನಿಮಾ ನಿರ್ಮಾಣದಲ್ಲಿ 50 ವರ್ಷಗಳು ಮುಗಿದಿದ್ದು ಮೊದಲ ಸಿನಿಮಾದಲ್ಲಿ ಅಪ್ಪಾಜಿ ಹಾಗೂ 52ನೇ ಸಿನಿಮಾದಲ್ಲಿ ನಾನು ನಟಿಸುತ್ತಿರುವುದು ಖುಷಿಯ ವಿಚಾರ ಎಂದು ಶಿವರಾಜ್ಕುಮಾರ್ ಸಂತೋಷ ವ್ಯಕ್ತಪಡಿಸಿದರು.
ಯಾವುದೇ ಒಂದು ಸಂಸ್ಥೆ 50 ವರ್ಷಗಳಿಂದ ಸಿನಿಮಾ ನಿರ್ಮಾಣ ಮಾಡಿಕೊಂಡು ಬರುವುದು ಸುಲಭದ ಮಾತಲ್ಲ. ಅದರೆ ನನ್ನ ಸಂಸ್ಥೆ 1969 ರಲ್ಲಿ ರಾಜಣ್ಣನ ಜೊತೆ ಮೇಯರ್ ಮುತ್ತಣ್ಣ ಸಿನಿಮಾ ಮಾಡಿದ್ದು 2019 ರಲ್ಲಿ ಶಿವಣ್ಣನ ಜೊತೆ ಆಯುಷ್ಮಾನ್ ಭವ ಸಿನಿಮಾ ಮಾಡಿದ್ದೀನಿ. ನವೆಂಬರ್ 1 ಕನ್ನಡ ರಾಜ್ಯೋತ್ಸವದಂದು ನಮ್ಮ ಸಿನಿಮಾ ರಿಲೀಸ್ ಆಗುತ್ತಿದೆ. ಕನ್ನಡಿಗನಾಗಿ ರಾಜ್ಯೋತ್ಸವದಂದು ಸಿನಿಮಾ ಬಿಡುಗಡೆ ಮಾಡುತ್ತಿರುವುದು ಹೆಮ್ಮೆಯ ವಿಷಯ ಎಂದು ಕರ್ನಾಟಕದ ಕುಳ್ಳ ಎಂದೇ ಖ್ಯಾತರಾದ ದ್ವಾರಕೀಶ್ ಹೇಳಿದರು. ಈ ಚಿತ್ರದಲ್ಲಿ ಡಿಂಪಲ್ ಕ್ವೀನ್ ರಚಿತಾ ರಾಮ್ ನಾಯಕಿಯಾಗಿ ಶಿವಣ್ಣನ ಜೊತೆ ನಟಿಸಿದ್ದು ಪಿ. ವಾಸು ನಿರ್ದೇಶನದ ಸಿನಿಮಾಗಳಲ್ಲಿ ನಟಿಸುವುದು ದೊಡ್ಡ ಟಾಸ್ಕ್. ಅನಂತ್ನಾಗ್ ಹಾಗೂ ಸುಹಾಸಿನಿ ಜೊತೆ ನಟಿಸುವುದು ನನ್ನ ಪುಣ್ಯ ಎಂದು ರಚಿತಾ ರಾಮ್ ಹೇಳಿದರು. ಇನ್ನು ಈ ಚಿತ್ರದ ವಿಶೇಷ ಅಂದ್ರೆ ಕೊಡಗಿನ ಬೆಡಗಿ ನಿಧಿ ಸುಬ್ಬಯ್ಯ ಬಹಳ ವರ್ಷಗಳ ಗ್ಯಾಪ್ ನಂತರ ಮತ್ತೆ ಈ ಚಿತ್ರದ ಮೂಲಕ ಸ್ಯಾಂಡಲ್ವುಡ್ಗೆ ರೀ ಎಂಟ್ರಿ ಕೊಟ್ಟಿದ್ದಾರೆ. ಒಟ್ಟಿನಲ್ಲಿ ಶಿವಣ್ಣನ ಅಭಿಮಾನಿಗಳು ಸಿನಿಮಾ ನೋಡಲು ಕಾತರದಿಂದ ಕಾಯುತ್ತಿದ್ದಾರೆ.