ಸ್ಯಾಂಡಲ್ವುಡ್ನಲ್ಲಿ ಪುರುಸೊತ್ತು ಇಲ್ಲದ ನಟರ ಪೈಕಿ ಸಿಂಪಲ್ ಸ್ಟಾರ್ ರಕ್ಷಿತ್ ಶೆಟ್ಟಿ ಕೂಡ ಒಬ್ರು. ಒಂದಾದ ಮೇಲೆ ಒಂದರಂತೆ ಸಿನಿಮಾಗಳನ್ನು ಒಪ್ಪಿಕೊಳ್ಳುತ್ತಿರುವ ಕಿರಿಕ್ ಹುಡುಗ ಸದ್ಯ ಚಾರ್ಲಿ 777 ಚಿತ್ರದ ಕೆಲಸಗಳಲ್ಲಿ ಸಿಕ್ಕಾಪಟ್ಟೆ ಬ್ಯುಸಿಯಾಗಿದ್ದಾರೆ. ಈ ನಡುವೆ ಕೂಡ ಫೇಸ್ಬುಕ್ ಲೈವ್ ಬಂದ 'ಅವನೇ ಶ್ರೀಮನ್ನಾರಾಯಣ' ನಟ, ಸುದೀಪ್ ಜೊತೆ ಸಿನಿಮಾ ಮಾಡುವುದಾಗಿ ಹೇಳಿದ್ದಾರೆ.
ಹೌದು, ಕಳದೆ ಹಲವಾರು ದಿನಗಳಿಂದ ಸುದೀಪ್ ಜೊತೆ ರಕ್ಷಿತ್ ಶೆಟ್ಟಿ ಸಿನಿಮಾ ಮಾಡ್ತಾರಂತೆ ಎಂದು ಚರ್ಚೆಯಾಗುತ್ತಿದೆ. ಈ ಗುಸು ಗುಸು ಮಾತಿಗೆ ರಕ್ಷಿತ್ ತೆರೆ ಎಳೆದಿದ್ದು, ಸುದೀಪ್ ಜೊತೆ ಸಿನಿಮಾ ಮಾಡೋದು ಪಕ್ಕ ಎಂದಿದ್ದಾರೆ. ಈಗಾಗಲೇ ಅರ್ಧ ಸ್ಕ್ರಿಪ್ಟ್ ಮುಗಿದಿದೆ. ಉಳಿದ ಭಾಗದ ಸ್ಕ್ರಿಪ್ಟ್ ಕೆಲಸ ಮಾಡಬೇಕಿದೆ ಎಂದು ಹೇಳಿದ್ದಾರೆ.