'ಅಮ್ಮನ ಮನೆ' ಸಿನಿಮಾ ಮೂಲಕ ಚಿತ್ರರಂಗದಲ್ಲಿ ಸೆಕೆಂಡ್ ಇನ್ನಿಂಗ್ಸ್ ಆರಂಭಿಸಿದ್ದ ರಾಘವೇಂದ್ರ ರಾಜ್ಕುಮಾರ್ ಇದೀಗ ಸಾಲು ಸಾಲು ಚಿತ್ರಗಳಲ್ಲಿ ಬ್ಯುಸಿಯಿದ್ದಾರೆ. ಇತ್ತೀಚೆಗೆ ರಾಘಣ್ಣ ಬಾಲಿವುಡ್ ನಟ ಜಾನ್ ಅಬ್ರಹಾಂ ಹಾಗೂ ಅನಿಲ್ ಕಪೂರ್ ಅವರನ್ನು ಭೇಟಿ ಮಾಡಿದ್ದಾರೆ.
ಬಾಲಿವುಡ್ ನಟರನ್ನು ಭೇಟಿ ಮಾಡಿದ ರಾಘಣ್ಣ..ಭೇಟಿ ಹಿಂದಿನ ಕಾರಣ ಏನು..?
'ಪೊಗರು' ಸಿನಿಮಾ ಶೂಟಿಂಗ್ಗಾಗಿ ಹೈದರಾಬಾದ್ ರಾಮೋಜಿ ಫಿಲಮ್ ಸಿಟಿಗೆ ತೆರಳಿರುವ ರಾಘವೇಂದ್ರ ರಾಜ್ಕುಮಾರ್ ಅಲ್ಲಿ ಬಾಲಿವುಡ್ ನಟರಾದ ಜಾನ್ ಅಬ್ರಹಾಂ ಹಾಗೂ ಅನಿಲ್ ಕಪೂರ್ ಅವರನ್ನು ಭೇಟಿ ಮಾಡಿದ್ದಾರೆ.
ರಾಘಣ್ಣ ಹಾಗೂ ಬಾಲಿವುಡ್ ನಟರ ಭೇಟಿ ವಿಷಯ ತಿಳಿದ ಅಭಿಮಾನಿಗಳು ಇವರೆಲ್ಲಾ ಯಾವುದಾದರೂ ಚಿತ್ರದಲ್ಲಿ ಒಟ್ಟಿಗೆ ನಟಿಸುತ್ತಿರಬಹುದಾ ಎಂಬ ಕುತೂಹಲದಲ್ಲಿದ್ದಾರೆ. ಆದರೆ ಇದು ಔಪಚಾರಿಕ ಭೇಟಿ ಅಷ್ಟೇ. ರಾಘಣ್ಣ ಇಬ್ಬರೊಂದಿಗೆ ಕೂಡಾ ಸುಮಾರು ಅರ್ಧ ಗಂಟೆಗೂ ಹೆಚ್ಚು ಸಮಯ ಕಳೆದಿದ್ದಾರೆ. ಈ ಸ್ಟಾರ್ ನಟರ ಮಿಲನಕ್ಕೆ ಸಾಕ್ಷಿಯಾಗಿದ್ದು ಹೈದರಾಬಾದ್ನ ರಾಮೋಜಿ ಫಿಲ್ಮ್ ಸಿಟಿ. ರಾಘಣ್ಣ ಸದ್ಯಕ್ಕೆ ಧ್ರುವಾಸರ್ಜಾ, ಅಭಿನಯದ 'ಪೊಗರು' ಸಿನಿಮಾದಲ್ಲಿ ನಟಿಸುತ್ತಿದ್ದಾರೆ.
'ಪೊಗರು' ಸಿನಿಮಾ ಶೂಟಿಂಗ್ ಸ್ಪಾಟ್ ಪಕ್ಕದಲ್ಲೇ, ಜಾನ್ ಅಬ್ರಹಾಂ ಹಾಗೂ ಅನಿಲ್ ಕಪೂರ್ ಚಿತ್ರಗಳ ಶೂಟಿಂಗ್ ನಡೆಯುತ್ತಿದೆ. ಬಿಡುವಿನ ವೇಳೆಯಲ್ಲಿ ರಾಘವೇಂದ್ರ ಕುಮಾರ್ ಜಿಮ್ ಹೋಗಿದ್ದಾಗ ಜಾನ್ ಅಬ್ರಾಹಂ ಹಾಗೂ ಅನಿಲ್ ಕಪೂರ್ ಕೂಡಾ ಅದೇ ಜಿಮ್ಗೆ ಬಂದಿದ್ದಾರೆ. ಈ ವೇಳೆ ಮೂವರೂ ಭೇಟಿಯಾಗಿ ಉಭಯ ಕುಶಲೋಪರಿ ನಡೆಸಿದ್ದಾರೆ. ಬಾಲಿವುಡ್ ನಟರಿಬ್ಬರೂ ರಾಘಣ್ಣನನ್ನು ಕುರಿತು ನಿಮ್ಮ ತಂದೆ ಡಾ. ರಾಜ್ಕುಮಾರ್ ಅವರ ಸಿನಿಮಾಗಳನ್ನು ನೋಡುತ್ತಾ ಬೆಳೆದಿದ್ದೇವೆ ಎಂದು ಬಹಳ ಆತ್ಮೀಯವಾಗಿ ಮಾತನಾಡಿಸಿದ್ದಲ್ಲದೆ ಅವರ ಆರೋಗ್ಯ ಕೂಡಾ ವಿಚಾರಿಸಿದ್ದಾರೆ. ಈ ಕ್ಷಣವನ್ನು ನಾನು ಎಂದಿಗೂ ಮರೆಯಲು ಸಾಧ್ಯವಿಲ್ಲ ಎಂದಿದ್ದಾರೆ ರಾಘಣ್ಣ.