'ನಟ ಭಯಂಕರ' ಶೂಟಿಂಗ್ ಬಹುತೇಕ ಪೂರ್ಣ: ಆಗಸ್ಟ್​​​ನಲ್ಲಿ ರಿಲೀಸ್​​​ಗೆ ಪ್ರಥಮ್ ಪ್ಲಾನ್​​

ಹಾರರ್ ಕಾಮಿಡಿ 'ನಟ ಭಯಂಕರ' ಸಿನಿಮಾ ಶೂಟಿಂಗ್ ಬಹುತೇಕ ಮುಗಿದಿದ್ದು ಚಿತ್ರವನ್ನು ಆಗಸ್ಟ್​​​ನಲ್ಲಿ ಬಿಡುಗಡೆ ಮಾಡಲು ಚಿತ್ರದ ನಿರ್ದೇಶಕ ಹಾಗೂ ನಟ ಪ್ರಥಮ್ ಪ್ಲಾನ್ ಮಾಡಿದ್ದಾರೆ.

ಬಿಗ್​​​​​​​​ಬಾಸ್ ಖ್ಯಾತಿಯ ನಟ ಪ್ರಥಮ್ ನಿರ್ದೇಶನದೊಂದಿಗೆ ಪ್ರಮುಖ ಪಾತ್ರದಲ್ಲಿ ನಟಿಸುತ್ತಿರುವ 'ನಟ ಭಯಂಕರ' ಸಿನಿಮಾ ಶೂಟಿಂಗ್ ಭರದಿಂದ ಸಾಗಿದೆ. ಈಗಾಗಲೇ ಚಿತ್ರದ ಬಹುತೇಕ ಶೂಟಿಂಗ್ ಪೂರ್ಣಗೊಂಡಿದೆ.

ಇಂದೂ ಕೂಡಾ ಪ್ರಥಮ್​ ಬೆಂಗಳೂರಿನ ಮನೆಯೊಂದರಲ್ಲಿ ಕೆಲವೊಂದು ದೃಶ್ಯಗಳನ್ನು ಶೂಟ್ ಮಾಡೋದ್ರಲ್ಲಿ ಬ್ಯುಸಿಯಾಗಿದ್ದರು. ಪ್ರಥಮ್, ನಾಯಕಿಯರಾದ ಅನುಪಮಾ ಹಾಗೂ ನಿಹಾರಿಕ ಇಂದು ಶೂಟಿಂಗ್​​​​​​​​​​​​ನಲ್ಲಿ ಭಾಗಿಯಾಗಿದ್ದರು. ಇದೊಂದು ಹಾರರ್ ಕಾಮಿಡಿ ಚಿತ್ರವಾಗಿದ್ದು ಅನಂತ್​​​​​​​​​​​​​​​ನಾಗ್ ಹಾಗೂ ಲಕ್ಷ್ಮಿ ಅಭಿನಯದ 'ನಾ ನಿನ್ನ ಬಿಡಲಾರೆ' ಸಿನಿಮಾ ಸ್ಟೈಲ್​​ನಲ್ಲಿದೆ. ನಿಮಗೆ ಮನರಂಜನೆ ಬೇಕಿದ್ದಲ್ಲಿ ಸಿನಿಮಾವನ್ನು ತಪ್ಪದೆ ನೋಡಿ ಎಂದು ಪ್ರಥಮ್ ಬಹಳ ಕಾನ್ಫಿಡೆಂಟ್ ಆಗಿ ಹೇಳಿದ್ದಾರೆ.

ಶೇ.70ರಷ್ಟು ಶೂಟಿಂಗ್ ಮುಗಿದಿದ್ದು ಇನ್ನು ಹತ್ತು ದಿನಗಳ ಒಳಗೆ ಚಿತ್ರೀಕರಣ ಮುಗಿಸಿ ಆಗಸ್ಟ್​​​ನಲ್ಲಿ ಸಿನಿಮಾ ರಿಲೀಸ್ ಮಾಡಲು ಪ್ರಥಮ್ ಪ್ಲಾನ್ ಮಾಡಿದ್ದಾರೆ. ಶಿರಸಿ ಹುಡುಗಿ ಅನುಪಮಾಗೆ ಇದು ಮೊದಲ ಸಿನಿಮಾವಾಗಿದ್ದು ಚಿತ್ರಕಥೆ ಬಹಳ ಇಷ್ಟವಾದ್ದರಿಂದ ಒಪ್ಪಿಕೊಂಡೆ ಎಂದಿದ್ದಾರೆ. ಅವರಿಗೆ ಈಗಾಗಲೇ ಸಾಕಷ್ಟು ಅವಕಾಶಗಳು ಹುಡುಕಿಬರುತ್ತಿದ್ದು ಸದ್ಯಕ್ಕೆ 'ನಟಭಯಂಕರ' ಸಿನಿಮಾ ಕಡೆಗೆ ಗಮನ ಹರಿಸುತ್ತಿದ್ದೇನೆ ಎಂದರು. ಮತ್ತೊಬ್ಬ ನಟಿ ನಿಹಾರಿಕ ಖಾಸಗಿ ವಾಹಿನಿಯ ರಿಯಾಲಿಟಿ ಶೋನಲ್ಲಿ ಕೂಡಾ ಭಾಗವಹಿಸಿದ್ದು ಈ ಚಿತ್ರದಲ್ಲಿ ಮೋಹಿನಿ ಪಾತ್ರ ಮಾಡುತ್ತಿದ್ದಾರೆ. ಹಿರಿಯ ನಟ ಅಶ್ವಥ್ ಪುತ್ರ ಶಂಕರ್ ಅಶ್ವಥ್, ಸಾಯಿ ಕುಮಾರ್​, ಹಿರಿಯ ನಟಿ ಲೀಲಾವತಿ, ಕುರಿ ಪ್ರತಾಪ್​​​ ಹಾಗೂ ಇನ್ನಿತರರು ಸಿನಿಮಾದಲ್ಲಿ ನಟಿಸಿದ್ದಾರೆ.