ಬೆಂಗಳೂರು: ಕಳೆದ ವರ್ಷ ಗೂಗಲ್ ತನ್ನ ಕೃತಕ ಬುದ್ಧಿಮತ್ತೆ ಸಾಫ್ಟ್ವೇರ್ ಬಾರ್ಡ್ ಅನ್ನು ಲಾಂಚ್ ಮಾಡಿದಾಗ ಅದು ಪದೇ ಪದೆ ತಪ್ಪು ಉತ್ತರಗಳನ್ನು ನೀಡುವ ಮೂಲಕ ವ್ಯಾಪಕ ಟೀಕೆಗೊಳಗಾಗಿತ್ತು. ಆದರೆ ಕ್ರಮೇಣ ಅದರ ಸಾಮರ್ಥ್ಯ ಸುಧಾರಣೆಯಾಗಿ ತಪ್ಪುಗಳು ನಿಂತು ಹೋದವು. ಈಗ ಗೂಗಲ್ ತನ್ನ ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್ ಎಐ ಸಾಫ್ಟ್ವೇರ್ ಜೆಮಿನಿಯನ್ನು ಲಾಂಚ್ ಮಾಡಲು ಯೋಜಿಸುತ್ತಿದೆ.
ಇತ್ತೀಚಿನ ವರದಿಗಳ ಪ್ರಕಾರ, ಜೆಮಿನಿ ಇದೇ ವಾರ ಲಾಂಚ್ ಆಗಬೇಕಿತ್ತು. ಆದರೆ ಕೆಲ ಪ್ರಶ್ನೆಗಳಿಗೆ ಅದು ನಿರೀಕ್ಷಿತ ಮಟ್ಟದ ಸರಿಯಾದ ಉತ್ತರಗಳನ್ನು ನೀಡದ ಕಾರಣದಿಂದ ಅದರ ಬಿಡುಗಡೆಯನ್ನು ವಿಳಂಬ ಮಾಡಲಾಗಿದೆ ಎಂದು ವರದಿಗಳು ಹೇಳಿವೆ.
ದಿ ಇನ್ಫರ್ಮೇಷನ್ ವರದಿಯ ಪ್ರಕಾರ, ಗೂಗಲ್ ಜೆಮಿನಿಯ ಸಾರ್ವಜನಿಕ ಬಿಡುಗಡೆಯನ್ನು ಜನವರಿಗೆ ಮುಂದೂಡಿದೆ ಎಂದು ಈ ವಿಷಯದ ಬಗ್ಗೆ ತಿಳಿದಿರುವ ಮೂಲಗಳು ತಿಳಿಸಿವೆ. ಗೂಗಲ್ ಸಿಇಒ ಸುಂದರ್ ಪಿಚೈ ಇತ್ತೀಚೆಗೆ ಕ್ಯಾಲಿಫೋರ್ನಿಯಾ, ನ್ಯೂಯಾರ್ಕ್ ಮತ್ತು ವಾಷಿಂಗ್ಟನ್ನಲ್ಲಿ ಮುಂದಿನ ವಾರ ನಡೆಯಬೇಕಿದ್ದ ಜೆಮಿನಿ ಬಿಡುಗಡೆ ಸಮಾರಂಭವನ್ನು ರದ್ದುಗೊಳಿಸುವ ನಿರ್ಧಾರ ಕೈಗೊಂಡಿದ್ದಾರೆ. ಕೆಲ ಇಂಗ್ಲಿಷೇತರ ಪ್ರಶ್ನೆಗಳಿಗೆ ಉತ್ತರ ನೀಡಲು ಜೆಮಿನಿ ವಿಫಲವಾದ ನಂತರ ಕಂಪನಿ ಅದರ ಬಿಡುಗಡೆಯನ್ನು ಮುಂದೂಡಿದೆ.