ದೆಹಲಿ: ಲವ್ ಫೇಲಾದ್ರೆ, ಯುವತಿ ಮದುವೆಗೆ ಒಪ್ಪದಿದ್ದಾಗ ಅವರ ಮೇಲೆ ಭಗ್ನ ಪ್ರೇಮಿಗಳು ಆ್ಯಸಿಡ್ ಎರಚುತ್ತಿರುವುದು ತಿಳಿದ ವಿಷಯ. ಆದ್ರೆ ಇಲ್ಲಿ ಉಲ್ಟಾ ಹೊಡಿದಿದೆ. ತನ್ನ ಡಾರ್ಲಿಂಗ್ ಮೇಲೆ ಯುವತಿಯೇ ಆ್ಯಸಿಡ್ ಎರಚಿ ಹೈಡ್ರಾಮಾ ನಡೆಸಿದ್ದಾಳೆ.
ಈ ಘಟನೆ ಜೂನ್ 11ರಂದು ದೆಹಲಿಯಲ್ಲಿ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ವಿಕಾಸ್ಪುರಿಯ ಯುವತಿಯೊಬ್ಬಳ ಮೂರು ವರ್ಷದಿಂದ ಯುವಕನೊಬ್ಬನನ್ನು ಲವ್ ಮಾಡುತ್ತಿದ್ದಳು. ಮದುವೆ ಆಗೋಣ ಅಂತಾ ಯುವತಿ ತನ್ನ ಲವರ್ಗೆ ಹೇಳಿದ್ದಾಳೆ. ಈ ವಿಷಯವಾಗಿ ಇಬ್ಬರ ಮಧ್ಯೆ ಕಲಹಗಳು ನಡೆದಿದ್ದು, ಯುವಕ ಆಕೆಯನ್ನು ಮದುವೆಯಾಗಲು ನಿರಾಕರಿಸಿದ್ದಾನೆ. ಇದರಿಂದ ಆತನನ್ನು ಹೇಗಾದ್ರೂ ಮಾಡಿ ಪಡೆಯಬೇಕೆಂಬ ಉದ್ದೇಶ ಮನದಾಳಕ್ಕೆ ನಾಟಿದೆ. ಆತನ ಮೇಲೆ ಆ್ಯಸಿಡ್ ಎರಚಿದ್ರೆ ನನ್ನ ಬಿಟ್ಟು ಹೋಗುವುದಿಲ್ಲ ಎಂಬ ಕಲ್ಪನೆ ಆಕೆದ್ದಾಗಿದ್ದು, ಅದೇ ರೀತಿ ನಡೆಸಲು ಯುವತಿ ಸ್ಕೆಚ್ ಹಾಕಿದ್ದಾಳೆ.
ಇದೇ ತಿಂಗಳು 11ರಂದು ಇಬ್ಬರು ಲಾಂಗ್ ಡ್ರೈವ್ಗೆ ಹೋಗಿದ್ದಾರೆ. ತನ್ನ ಲವರ್ಗೆ ಬೈಕ್ ನಿಲ್ಲಿಸಲು ಹೇಳಿದ್ದಾಳೆ. ಬಳಿಕ ಹೆಲ್ಮೆಟ್ ತೆಗೆಸಿದ್ದಾಳೆ. ಹೆಲ್ಮೆಟ್ ತೆಗೆಯುತ್ತಿದ್ದಂತೆ ಯುವತಿ ಆತನ ಮೇಲೆ ಆ್ಯಸಿಡ್ ಎರಚಿದ್ದಾಳೆ. ಬಳಿಕ ತಾನೂ ಸಹ ಮೈಮೆಲೆ ಆ್ಯಸಿಡ್ ಎರಚಿಕೊಂಡಿದ್ದಾಳೆ. ನಂತರ ನಮ್ಮ ಮೇಲೆ ಯಾರೋ ಆ್ಯಸಿಡ್ ದಾಳಿ ನಡೆಸಿ ಪರಾರಿಯಾದರು ಎಂದು ಯುವತಿ ಹೈಡ್ರಾಮ ಮಾಡಿದ್ದಾಳೆ.
ತೀವ್ರವಾಗಿ ಗಾಯಗೊಂಡಿದ್ದ ಯುವಕನನ್ನು ಸ್ಥಳೀಯರು ಆಸ್ಪತ್ರೆಗೆ ದಾಖಲಿಸಿದ್ದರು. ಈ ಘಟನೆ ಕುರಿತು ಪ್ರಕರಣ ದಾಖಲಾಗಿದ್ದು, ಪೊಲೀಸರು ತನಿಖೆ ಕೈಗೊಂಡಿದ್ರು. ಸ್ಥಳೀಯ ಸಿಸಿಟಿವಿ ದೃಶ್ಯ ಪರಿಶೀಲಿಸಿದ ಪೊಲೀಸರಿಗೆ ಅನುಮಾನಾಸ್ಪದ ವ್ಯಕ್ತಿಗಳು ಕಂಡು ಬಂದಿಲ್ಲ. ಬಳಿಕ ಯುವಕನನ್ನು ವಿಚಾರಿಸಿದ್ದಾರೆ.
ನಾವು ಬೈಕ್ ಮೇಲೆ ಹೋಗುತ್ತಿದ್ದೆವು. ನನ್ನ ಹುಡುಗಿ ಬೈಕ್ ನಿಲ್ಲಿಸಿ ಹೆಲ್ಮೆಟ್ ತೆಗೆಯುವಂತೆ ಹೇಳಿದಳು. ಹೆಲ್ಮೆಟ್ ತೆಗೆಯುತ್ತಿದ್ದಂತೆ ಹಿಂಬದಿಯಿಂದ ಯಾರೋ ಆ್ಯಸಿಡ್ ಎರಚಿದರು ಅಂತಾ ಯುವಕ ಪೊಲೀಸರಿಗೆ ವಿವರಣೆ ನೀಡಿದ್ದಾರೆ. ಬಳಿಕ ಯುವತಿಯನ್ನು ತಮ್ಮದೇ ಸ್ಟೈಲ್ನಲ್ಲಿ ವಿಚಾರಿಸಿದಾಗ ಸತ್ಯಾಂಶ ಹೊರಬಂದಿದೆ. ಇನ್ನು ಪೊಲೀಸರು ಯುವತಿಯನ್ನು ಬಂಧಿಸಿ ಮುಂದಿನ ಕ್ರಮ ಕೈಗೊಂಡಿದ್ದಾರೆ.
