ರೈತನ ದಿನಾಚರಣೆ ವೇಳೆ ಬಾಂಬ್​ ಸ್ಫೋಟ : ಇಬ್ಬರ ದುರ್ಮರಣ, ರಾಜ್ಯಪಾಲರಿಗೆ ಗಾಯ

ದಕ್ಷಿಣ ಆಫ್ಘನ್​ನಲ್ಲಿ ನಡೆಯುತ್ತಿದ್ದ ರೈತರ ದಿನಾಚರಣೆ ವೇಳೆ ಬಾಂಬ್​ ಸ್ಫೋಟ ಸಂಭವಿಸಿ ಇಬ್ಬರು ಮೃತಪಟ್ಟಿದ್ದಾರೆ

ಕಾಬೂಲ್ ​: ದಕ್ಷಿಣ ಆಫ್ಘನ್​ನ ಲಷ್ಕರ್​ ಘಾ ಪ್ರದೇಶದ ಕ್ರೀಡಾಂಗಣದಲ್ಲಿ ಇಂದು ನಡೆಯುತ್ತಿದ್ದ ರೈತರ ದಿನಾಚರಣೆ ಕಾರ್ಯಕ್ರಮದ ವೇಳೆ ಬಾಂಬ್​ ಸ್ಫೋಟಗೊಂಡಿದೆ.

ಘಟನೆಯಲ್ಲಿ ಇಬ್ಬರು ನಾಗರಿಕರು ಮೃತಪಟ್ಟಿದ್ದು, ಹೆಲ್ಮಾಂಡ್​ನ ರಾಜ್ಯಪಾಲ ಮೊಹಮ್ಮದ್​ ಯಾಸಿನ್​ ಖಾನ್ ಗಾಯಗೊಂಡಿದ್ದಾರೆ ಎಂದು ಪ್ರಾಂತೀಯ ರಾಜ್ಯಪಾಲರ ವಕ್ತಾರ ಓಮರ್​ ಜ್ವಾಕ್​ ಮಾಹಿತಿ ನೀಡಿದ್ದಾರೆ. ಅಲ್ಲದೆ, 23 ಮಂದಿ ಸಹ ದಾಳಿಯಲ್ಲಿ ಗಾಯಗೊಂಡಿದ್ದಾರೆ ಎಂದು ತಿಳಿದುಬಂದಿದೆ.ಕಾರ್ಯಕ್ರಮದಲ್ಲಿ 1000 ಕ್ಕೂ ಅಧಿಕ ಜನರು ನೆರೆದಿದ್ದರು. ಗಾಯಗೊಂಡಿರುವ ರಾಜ್ಯಪಾಲರ ಸ್ಥಿತಿಯ ಬಗ್ಗೆ ಸ್ಪಷ್ಟ ಮಾಹಿತಿ ಇಲ್ಲ.

ಕಳೆದ ಗುರುವಾರವಷ್ಟೇ ಸಾಂಪ್ರದಾಯಿಕ ಹೊಸವರ್ಷದ ಸಂದರ್ಭದಲ್ಲಿ ನಡೆದ ಬಾಂಬ್​ ದಾಳಿಯಲ್ಲಿ 6 ಮಂದಿ ಮೃತಪಟ್ಟು, 23 ಜನ ಗಾಯಗೊಂಡಿದ್ದರು. ಇಸ್ಲಾಮಿಕ್​ ಸ್ಟೇಟ್​ ಈ ಕೃತ್ಯ ಎಸಗಿತ್ತು ಎನ್ನಲಾಗಿದೆ. ಕಳೆದ ವರ್ಷ ಇದೇ ದಿನ ಕಾರ್​ ಬಾಂಬ್​ ಸ್ಫೋಟಿಗೊಂಡು 14 ಮಂದಿ ಸಾವನ್ನಪ್ಪಿದ್ದರು.