ಪಿಎನ್​ಬಿ ವಂಚನೆ ಪ್ರಕರಣ... ನೀರವ್​ ಮೋದಿ ನ್ಯಾಯಾಂಗ ಬಂಧನ ವಿಸ್ತರಿಸಿದ ಲಂಡನ್ ಕೋರ್ಟ್​

ಪಂಜಾಬ್​ ನ್ಯಾಶನಲ್​ ಬ್ಯಾಂಕ್​ಗೆ ಬಹುಕೋಟಿ ವಂಚನೆ ಹಾಗೂ ಅಕ್ರಮ ಹಣ ವರ್ಗಾವಣೆ ಪ್ರಕರಣದಡಿ ಬಂಧಿತರಾಗಿರುವ ಉದ್ಯಮಿ ನೀರವ್​ ಮೋದಿಗೆ ನ್ಯಾಯಾಂಗ ಬಂಧನ ಅವಧಿ ವಿಸ್ತರಿಸಲಾಗಿದೆ. ಲಂಡನ್​ ಕೋರ್ಟ್​ ಅಕ್ಟೋಬರ್​ 17ರವರೆಗೆ ನೀರವ್​ಗೆ ನ್ಯಾಯಾಂಗ ಬಂಧನವನ್ನು ವಿಸ್ತರಿಸಿದೆ.

ಲಂಡನ್​(ಇಂಗ್ಲೆಂಡ್​):ಪಂಜಾಬ್​ ನ್ಯಾಶನಲ್​ ಬ್ಯಾಂಕ್​ಗೆ ಬಹುಕೋಟಿ ರೂಪಾಯಿ ವಂಚಿಸಿ ಪರಾರಿಯಾಗಿರುವ ವಜ್ರದ ವ್ಯಾಪಾರಿ ನೀರವ್​ ಮೋದಿಗೆ ಲಂಡನ್​ ಕೋರ್ಟ್​ ಅಕ್ಟೋಬರ್​ 17ರವರೆಗೆ ನ್ಯಾಯಾಂಗ ಬಂಧನವನ್ನು ವಿಸ್ತರಿಸಿದೆ.

ಬಹುಕೋಟಿ ವಂಚನೆ ಹಾಗೂ ಅಕ್ರಮ ಹಣ ವರ್ಗಾವಣೆ ಪ್ರಕರಣದಡಿ ನೀರವ್​ ಮೋದಿಯನ್ನು ಬಂಧಿಸಲಾಗಿತ್ತು. ಭಾರತದಿಂದ ಪರಾರಿಯಾಗಿದ್ದ ನೀರವ್​ ಮೋದಿ, ಲಂಡನ್​ ಬ್ಯಾಂಕ್​ ಶಾಖೆಯಲ್ಲಿ ಖಾತೆ ತೆರೆಯಲು ಮುಂದಾದಾಗ ಸ್ಕಾಟ್ಲ್ಯಾಂಡ್​ ಯಾರ್ಡ್​ ಪೊಲೀಸರು ಬಂಧಿಸಿದ್ದರು.

ಬಂಧನ ಬಳಿಕ ನೀರವ್​ ಮೋದಿಯನ್ನು ನೈರುತ್ಯ ಲಂಡನ್‌ನ ವಂಡ್ಸ್‌ವರ್ತ್ ಜೈಲಿನಲ್ಲಿ ಇರಿಸಲಾಗಿದೆ. ಬಂಧನವಾದ ತಕ್ಷಣವೇ ನೀರವ್​ ಜಾಮೀನು ಕೋರಿ ಯುಕೆ ಕೋರ್ಟ್​ಗೆ ಅರ್ಜಿ ಸಲ್ಲಿಸಿದ್ದರು. ಆ ಅರ್ಜಿಯನ್ನು ಕೋರ್ಟ್​ ತಳ್ಳಿಹಾಕಿತ್ತು.