ಉಕ್ರೇನ್‌ನ ಹಾಲಿ ಅಧ್ಯಕ್ಷರ ಪದಚ್ಯುತಗೊಳಿಸಿ ಮಾಜಿ ಅಧ್ಯಕ್ಷನಿಗೆ ಪಟ್ಟ ಕಟ್ಟಲು ರಷ್ಯಾ ತಯಾರಿ: ಯಾರಿವರು?

ಉಕ್ರೇನ್​ ಮೇಲೆ ಯುದ್ಧ ಸಾರಿರುವ ರಷ್ಯಾ ಅಲ್ಲಿನ ಹಾಲಿ ಅಧ್ಯಕ್ಷರನ್ನು ಅಧಿಕಾರದಿಂದ ಕೆಳಗಿಳಿಸುವ ಪ್ರಯತ್ನ ನಡೆಸುತ್ತಿದ್ದು, ಇದರ ಬೆನ್ನಲ್ಲೇ ಮತ್ತೊಂದು ಮಹತ್ವದ ಮಾಹಿತಿ ಹೊರಬಿದ್ದಿದೆ.

ಮಾಸ್ಕೋ(ರಷ್ಯಾ): ಉಕ್ರೇನ್​ ವಿರುದ್ಧ ಭಯಾನಕ ಸ್ವರೂಪದ ಮಿಲಿಟರಿ ಕಾರ್ಯಾಚರಣೆ ನಡೆಸುತ್ತಿರುವ ರಷ್ಯಾ ಅಲ್ಲಿನ ಹಾಲಿ ಅಧ್ಯಕ್ಷರಾಗಿರುವ ವೊಲೊಡಿಮಿರ್ ಝೆಲೆನ್ಸ್ಕಿ ಅವರನ್ನು ಅಧಿಕಾರದಿಂದ ಕೆಳಗಿಳಿಸಿದ ನಂತರ ಉಕ್ರೇನ್​ ಮಾಜಿ ಅಧ್ಯಕ್ಷನಿಗೆ ಪಟ್ಟ ಕಟ್ಟಲು ತಯಾರಿ ನಡೆಸಿದೆ ಎಂಬ ಮಾತುಗಳು ಕೇಳಿ ಬರುತ್ತಿವೆ.

ಉಕ್ರೇನ್​​ನ ಈಗಿನ ಅಧ್ಯಕ್ಷ ವೊಲೊಡಿಮಿರ್ ಅವರ ಪದಚ್ಯುತಿಗೆ ಭಾರಿ ಯೋಜನೆ ರೂಪಿಸಿರುವ ರಷ್ಯಾ, ಮಾಜಿ ಅಧ್ಯಕ್ಷ ವಿಕ್ಟರ್ ಯಾನುಕೋವಿಚ್​​ಗೆ ಅಧ್ಯಕ್ಷೀಯ ಹೊಣೆ ಹೊರಿಸಲು ಭರ್ಜರಿ ತಯಾರಿ ನಡೆಸಿದ್ದಾಗಿ ಮೂಲಗಳಿಂದ ತಿಳಿದುಬರುತ್ತಿದೆ. ಇದಕ್ಕಾಗಿ ವಾಡ್ಲಿಮಿರ್ ಪುಟಿನ್​​ ಭಾರಿ ಸಂಚು ರೂಪಿಸಿದ್ದಾರೆ ಎನ್ನಲಾಗಿದ್ದು ನುರಿತ ಶಸ್ತ್ರಸಜ್ಜಿತ ಪಡೆಯನ್ನು ಕೀವ್​ಗೆ ರವಾನಿಸಿದ್ದಾರೆ ಎಂದು ಅಂತರಾಷ್ಟ್ರೀಯ ಮಾಧ್ಯಮಗಳ ವರದಿಗಳು ಹೇಳುತ್ತಿವೆ. ಕೀವ್​ನ ರಾಷ್ಟ್ರೀಯ ಭದ್ರತೆ ಮತ್ತು ರಕ್ಷಣಾ ಮಂಡಳಿಯ ಕಾರ್ಯದರ್ಶಿ ಒಲೆಕ್ಸಿ ಡ್ಯಾನಿಲೋವ್ ಈ ಬಗ್ಗೆ ಮಾಹಿತಿ ಸಹ ನೀಡಿದ್ದಾರೆ.

ವಿಕ್ಟರ್ ಯಾನುಕೋವಿಚ್ ಹಿನ್ನೆಲೆ: 2014ರಲ್ಲಿ ಉಕ್ರೇನ್​​ನಿಂದ ರಷ್ಯಾಕ್ಕೆ ಪಲಾಯನ ಮಾಡಿರುವ ಮಾಜಿ ಅಧ್ಯಕ್ಷ ವಿಕ್ಟರ್ ಯಾನುಕೋವಿಚ್, 2010ರಲ್ಲಿ ಉಕ್ರೇನ್​​ನ 4ನೇ ಅಧ್ಯಕ್ಷರಾಗಿ ಆಯ್ಕೆಯಾಗಿದ್ದರು. 2013ರಲ್ಲಿ ಯುರೋಪಿಯನ್​ ಒಕ್ಕೂಟದೊಂದಿಗೆ ವ್ಯಾಪಾರ ಒಪ್ಪಂದ ಹಾಗೂ ರಾಜಕೀಯ ಮಾತುಕತೆಗೆ ಸಹಿ ಹಾಕದ ಕಾರಣಕ್ಕೆ ಅವರ ವಿರುದ್ಧ ದೊಡ್ಡ ಮಟ್ಟದ ಪ್ರತಿಭಟನೆ ವ್ಯಕ್ತವಾಗಿತ್ತು. ಇದೇ ಕಾರಣಕ್ಕಾಗಿ 2014ರಲ್ಲಿ ಉಕ್ರೇನ್​​ ಸರ್ಕಾರ ಉರುಳಿಸುವ ಉದ್ದೇಶದಿಂದ ಕೀವ್​​ನಲ್ಲಿ ಬೃಹತ್‌ ಪ್ರತಿಭಟನೆ ನಡೆದ ಸಂದರ್ಭದಲ್ಲಿ ಅವರು ರಷ್ಯಾಗೆ ಪಲಾಯನ ಮಾಡಿದ್ದರು.