ಪುಲ್ವಾಮಾ ದಾಳಿಯಲ್ಲಿ ಜೈಷೆ ಸಂಸ್ಥೆ ಕೈವಾಡವಿಲ್ಲ: ‘ಪಾಕಿ’ಗಳಿಂದ ಮತ್ತೊಂದು ಸುಳ್ಳಿನ ಬಾಂಬ್​!

ಇಸ್ಲಾಮಾಬಾದ್​: ಜೈಷೆ ಮೊಹಮ್ಮದ್​ ಫೌಂಡರ್​ ಮಸೂದ್​ ಅಜರ್​ ನಮ್ಮ ದೇಶದಲ್ಲೇ ಇದ್ದಾನೆ ಎಂದು ಹೇಳಿದ ಮರುದಿನವೇ ಮತ್ತೊಂದು ಹಸಿ ಸುಳ್ಳನ್ನ ಪಾಕಿಸ್ತಾನ ಹೇಳಿದೆ. ಒಂದು ಕಡೆ ಶಾಂತಿ ಮಂತ್ರ ಜಪಿಸುತ್ತಿರುವ ಇಮ್ರಾನ್​ ಖಾನ್​ ಆದರೆ, ಮತ್ತೊಂದು ಕಡೆ ಸೇನೆ ಗಡಿಯಲ್ಲಿ ಅಪ್ರಚೋದಿತ ದಾಳಿ ಮುಂದುವರಿಸಿದೆ.

ಇನ್ನು ಮಗದೊಂದು ಕಡೆ ಪಾಕ್​ ವಿದೇಶಾಂಗ ಸಚಿವರು ಸುಳ್ಳಿನ ಸರಮಾಲೆಯನ್ನೇ ಮುಂದುವರಿಸಿದ್ದಾರೆ. ಹೌದು, ಮಸೂದ್​ ನಮ್ಮ ದೇಶದಲ್ಲೇ ಇದ್ದಾನೆ ಎಂದು ಪಾಕ್​ ವಿದೇಶಾಂಗ ಸಚಿವ ಷಾ ಮೊಹಮ್ಮದ್​ ಖುರೇಷಿ ಸಂದರ್ಶನವೊಂದರಲ್ಲಿ ಹೇಳಿಕೊಂಡಿದ್ದರು. ಆತ ಪಾಕ್​ನಲ್ಲೇ ಇದ್ದಾನೆ. ಆದ್ರೆ ಅಜರ್​ ತೀವ್ರ ಅನಾರೋಗ್ಯದಿಂದ ಬಳಲುತ್ತಿದ್ದು, ಮನೆಯಿಂದ ಹೊರ ಬಾರದ ಸ್ಥಿತಿಯಲ್ಲಿದ್ದಾರೆ ಎಂದಿದ್ದರು. ಇಂತಹ ಹಸಿ ಹಸಿ ಸುಳ್ಳು ಹೇಳಿದ್ದ ಖುರೇಷಿ ಮತ್ತೊಂದು ಬಾಂಬ್​ ಸಿಡಿಸಿದ್ದಾರೆ.

ಅಂತಾರಾಷ್ಟ್ರೀಯ ಮೀಡಿಯಾ ಸಂಸ್ಥೆಗೆ ಕೊಟ್ಟ ಸಂದರ್ಶನದಲ್ಲಿ ಮಾತನಾಡಿದ ಪಾಕ್​ ವಿದೇಶಾಂಗ ಸಚಿವ ಖುರೇಷಿ, ನಿಷೇಧಿತ ಉಗ್ರ ಸಂಸ್ಥೆ ಜೈಷೆ ಸಂಸ್ಥ ನಾಯಕರ ಜೊತೆ ಪಾಕ್​ ಸರ್ಕಾರ ಟಚ್​ನಲ್ಲಿದೆ. ಜೈಷೆ ಉಗ್ರ ಸಂಸ್ಥೆಯ ನಾಯಕರನ್ನು ವಿಚಾರಿಸಿದ್ದೇವೆ. ಪುಲ್ವಾಮಾ ದಾಳಿಯಲ್ಲಿ ತಾವು ಭಾಗಿಯಾಗಿಲ್ಲ ಎಂದು ಅವರು ಹೇಳಿದ್ದಾರೆ ಅಂತಾ ತಿಳಿಸಿದ್ದಾರೆ.

ಪುಲ್ವಾಮಾ ದಾಳಿ ಸಂಬಂಧಿಸಿದಂತೆ ಜೈಷೆ ಉಗ್ರ ಸಂಘಟನೆಯನ್ನು ವಿಚಾರಣೆಗೆ ಒಳಪಡಿಸಿದ್ದೇವೆ. ಆದರೆ ಅವರು ಈ ದಾಳಿಯನ್ನ ಎಸೆಗಿಲ್ಲ ಎಂದು ಹೇಳಿದ್ದಾರೆ. ನಮಗೂ ಈ ವಿಷಯದ ಬಗ್ಗೆ ಗೊಂದಲಗಳಿವೆ ಎಂದು ಖುರೇಷಿ ಸಂದರ್ಶನದಲ್ಲಿ ಹೇಳಿದ್ದಾರೆ. ಅವರೊಂದಿಗೆ ಸಂಪರ್ಕಿಸಿದ್ದು ಯಾರೆಂದು ಮಾಧ್ಯಮದವರು ಕೇಳಿದ ಪ್ರಶ್ನೆಗೆ ‘ಅವರಿಗೆ ಗೊತ್ತಿರುವ ವ್ಯಕ್ತಿಗಳೇ’ ಎಂದು ಖುರೇಷಿ ಉತ್ತರಿಸಿದ್ದಾರೆ

40ಕ್ಕೂ ಹೆಚ್ಚು ಸಿಆರ್​ಪಿಎಫ್​ ಯೋಧರ ಪ್ರಾಣವನ್ನು ಬಲಿ ತೆಗೆದುಕೊಂಡ ಪುಲ್ವಾಮಾ ದಾಳಿಯ ಹೊಣೆ ಜೈಷೆ ಉಗ್ರ ಸಂಸ್ಥೆ ಹೊತ್ತಿಕೊಂಡಿರುವ ವಿಷಯ ಎಲ್ಲರಿಗೂ ಗೊತ್ತಿರುವ ವಿಚಾರವೇ ಆಗಿದೆ. ಆದರೆ ಪಾಕಿಸ್ತಾನ ಮಾತ್ರ ಈಗ ಜೈಷೆ ಕೈವಾಡ ಇಲ್ಲ ಎಂದು ಪ್ರತಿಪಾದಿಸಲು ಆರಂಭಿಸಿದೆ.