ಅಮೆರಿಕದ ಬಹುತೇಕ ರಾಜ್ಯಗಳಲ್ಲಿ ಲಾಕ್​ಡೌನ್ ತೆರವು

ಅಮೆರಿಕದ ಹಲವಾರು ರಾಜ್ಯಗಳು ಕೊರೊನಾ ಲಾಕ್​ಡೌನ್​ ಸಡಿಲಗೊಳಿಸಿದ್ದು, ವ್ಯಾಪಾರ ವಹಿವಾಟು ಮತ್ತೆ ಆರಂಭವಾಗಿವೆ. ಆದರೂ ಕೊರೊನಾ ತೀವ್ರತೆ ಹೆಚ್ಚಾಗಿರುವ ರಾಜ್ಯಗಳಲ್ಲಿ ನಿರ್ಬಂಧಗಳು ಮುಂದುವರಿಯಲಿವೆ.

ಲೂಸಿಯಾನ: ಅಮೆರಿಕದ 12 ಕ್ಕೂ ಹೆಚ್ಚು ರಾಜ್ಯಗಳು ಕೊರೊನಾ ವೈರಸ್​ ಬಿಕ್ಕಟ್ಟಿನ ಕಾರಣದಿಂದ ವಿಧಿಸಲಾಗಿದ್ದ ಲಾಕ್​ಡೌನ್​ ತೆರವುಗೊಳಿಸಿವೆ. ಇದರೊಂದಿಗೆ ಈ ರಾಜ್ಯಗಳಲ್ಲಿನ ಎಲ್ಲ ರೆಸ್ಟೋರೆಂಟ್​, ಅಂಗಡಿಗಳು ಹಾಗೂ ಇನ್ನಿತರ ವ್ಯಾಪಾರ ಚಟುವಟಿಕೆಗಳು ಎಂದಿನಂತೆ ಪುನಾರಂಭವಾಗಲಿವೆ. ಕುಸಿಯುತ್ತಿರುವ ಆರ್ಥಿಕ ವ್ಯವಸ್ಥೆಗೆ ಆದಷ್ಟು ಬೇಗ ಚೇತರಿಕೆ ನೀಡಲು ರಾಜ್ಯಗಳು ಈ ಕ್ರಮ ಕೈಗೊಂಡಿದ್ದು, ಕೊರೊನಾ ವೈರಸ್​ ಹರಡದಂತೆ ಸಾಕಷ್ಟು ಮುಂಜಾಗ್ರತಾ ಕ್ರಮಗಳನ್ನು ಅನುಸರಿಸುವಂತೆ ಆದೇಶಿಸಿವೆ.

ಲೂಸಿಯಾನಾ ರಾಜ್ಯದಲ್ಲಿ ಜನ ಹೋಟೆಲ್​​​​​​​​ಗಳಲ್ಲಿ ತಿಂಡಿ ತಿನ್ನಬಹುದು. ಆದರೆ ಕೂರುವ ಟೇಬಲ್​ಗಳ ಮಧ್ಯೆ 10 ಅಡಿ ಅಂತರ ಇರುವುದು ಕಡ್ಡಾಯ. ಇಲ್ಲಿ ಕುಡಿಯಲು ನೀರು ಪೂರೈಕೆ ಮಾಡುವಂತಿಲ್ಲ. ನೆಬ್ರಾಸ್ಕಾದ ಮಾಲ್​ ಒಂದರಲ್ಲಿ ಸಾಮಾಜಿಕ ಅಂತರ ಕಾಪಾಡಲು ಎಲ್ಲೆಡೆ ಫ್ಲೆಕ್ಸಿಗ್ಲಾಸ್​ಗಳನ್ನು ಅಳವಡಿಸಲಾಗಿದೆ. ಮಾಲ್​ನೊಳಗೆ ಹೋಗಿ ಬಂದರೆ ಜೈಲಿಗೆ ಹೋಗಿ ಬಂದಂಥ ಅನುಭವವಾಗುತ್ತಿದೆ ಎಂದು ಗ್ರಾಹಕರು ಹೇಳುತ್ತಿದ್ದಾರೆ.

ಕೊಲೊರಾಡೊ ರಾಜ್ಯದಲ್ಲಿ ಸಲೂನ್ ಹಾಗೂ ಅಂಗಡಿಗಳನ್ನು ತೆರೆಯಲಾಗಿದೆ. ಆದರೆ ಪಕ್ಕದ ಡೆನಿವರ್​​​ ಹಾಗೂ ಇನ್ನಿತರ ಕೌಂಟಿಗಳಲ್ಲಿ ಸ್ಟೇ ಆ್ಯಟ್ ಹೋಂ ನಿರ್ಬಂಧಗಳು ಇನ್ನೂ ಜಾರಿಯಲ್ಲಿವೆ. ದಕ್ಷಿಣ ಕೆರೋಲಿನಾದ ಬೀಚ್​ಗಳನ್ನು ಪ್ರವಾಸಿಗರಿಗೆ ಮುಕ್ತಗೊಳಿಸಲಾಗಿದೆ. ದೇಶದಲ್ಲಿ ಮೊದಲ ಕೋವಿಡ್​ ಪ್ರಕರಣ ಪತ್ತೆಯಾದ ವಾಷಿಂಗ್ಟನ್​ನಲ್ಲಿ ಮೇ 31 ರವರೆಗೆ ಕಟ್ಟುನಿಟ್ಟಾದ ನಿರ್ಬಂಧಗಳು ಮುಂದುವರಿಯಲಿವೆ.