ಏನೇ ಆದ್ರೂ ಲಾಕ್​ಡೌನ್ ಮಾಡಲ್ವಂತೆ ಅಮೆರಿಕ ಅಧ್ಯಕ್ಷ ಟ್ರಂಪ್​..

ಈಗಾಗಲೇ ಜಾರಿಯಲ್ಲಿರುವ ಸಾಮಾಜಿಕ ಅಂತರದ ನೀತಿಗಳನ್ನು ಮುಂದುವರೆಸಿದರೂ ಕೂಡ 1,00,000 ದಿಂದ 2,40,000 ಅಮೆರಿಕನ್ನರು ಕೋವಿಡ್​ಗೆ ಬಲಿಯಾಗುವ ಸಾಧ್ಯತೆಗಳಿವೆ ಎಂದು ವೈಟ್​ ಹೌಸ್​ ವರದಿ ಹೇಳಿದರೂ, ಟ್ರಂಪ್​ ಸಂಪೂರ್ಣ ಲಾಕ್​ಡೌನ್​ ಜಾರಿಗೆ ಒಲವು ತೋರಿಸಿಲ್ಲ.

ವಾಶಿಂಗ್ಟನ್ :ಕೊರೊನಾ ವೈರಸ್​ನಿಂದ ಏನೇ ಆದರೂ ಅಮೆರಿಕದಾದ್ಯಂತ ಸಂಪೂರ್ಣ ಲಾಕ್​ಡೌನ್​ ಮಾಡಲ್ಲ ಎಂದು ಅಧ್ಯಕ್ಷ ಡೊನಾಲ್ಡ್​ ಟ್ರಂಪ್ ಹೇಳಿದ್ದಾರೆ. ಕೋವಿಡ್​-19ನಿಂದಾಗಿ ಅಮೆರಿಕದಲ್ಲಿ ಹತ್ತಾರು ಸಾವಿರ ಜನ ಸಾಯಬಹುದು ಎಂದು ತಜ್ಞರು ಎಚ್ಚರಿಕೆ ನೀಡುತ್ತಿದ್ದರೂ ಲಾಕ್​ಡೌನ್ ಸಾಧ್ಯವಿಲ್ಲ ಎಂದಿದ್ದಾರೆ ಟ್ರಂಪ್.

ಈ ಕುರಿತು ಬುಧವಾರ ಸ್ಪಷ್ಟನೆ ನೀಡಿದ ಟ್ರಂಪ್​, ಜನ ಮನೆಯಲ್ಲೇ ಇರಬೇಕು ಎಂಬ ನೀತಿ ಜಾರಿಗೊಳಿಸುವ ವಿವೇಚನೆಯನ್ನು ಆಯಾ ರಾಜ್ಯಗಳ ಗವರ್ನರ್​ಗಳಿಗೇ ಬಿಡಲಾಗಿದೆ. ಆದರೂ ಕೋವಿಡ್​-19 ಸೋಂಕು ಹೆಚ್ಚಾಗಿರುವ ದೇಶದ ಹಾಟ್​ಸ್ಪಾಟ್​ ಪ್ರದೇಶಗಳಲ್ಲಿ ವಿಮಾನ ಹಾಗೂ ರೈಲು ಸಂಚಾರಗಳನ್ನು ನಿಯಂತ್ರಿಸುವ ಕುರಿತಾಗಿ ಯೋಚಿಸಲಾಗುತ್ತಿದೆ ಎಂದು ಅವರು ಹೇಳಿದರು.

ಈಗಾಗಲೇ ಜಾರಿಯಲ್ಲಿರುವ ಸಾಮಾಜಿಕ ಅಂತರದ ನೀತಿಗಳನ್ನು ಮುಂದುವರೆಸಿದರೂ ಕೂಡ 1,00,000 ದಿಂದ 2,40,000 ಅಮೆರಿಕನ್ನರು ಕೋವಿಡ್​ಗೆ ಬಲಿಯಾಗುವ ಸಾಧ್ಯತೆಗಳಿವೆ ಎಂದು ವೈಟ್​ ಹೌಸ್​ ವರದಿ ಹೇಳಿದರೂ, ಟ್ರಂಪ್​ ಸಂಪೂರ್ಣ ಲಾಕ್​ಡೌನ್​ ಜಾರಿಗೆ ಒಲವು ತೋರಿಸಿಲ್ಲ.

'ನಮಗೆ ನಮ್ಮ ಗವರ್ನರ್​ಗಳು ಹಾಗೂ ಮೇಯರ್​ಗಳ ಬಗ್ಗೆ ವಿಶ್ವಾಸವಿದೆ. ಜನರಿಗೆ ಯಾವುದು ಒಳ್ಳೆಯದೋ.. ಆ ನಿರ್ಧಾರವನ್ನು ಅವರು ಕೈಗೊಳ್ಳುತ್ತಾರೆ ಎಂಬ ವಿಶ್ವಾಸ ನಮ್ಮಲ್ಲಿದೆ' ಎಂದು ಅಮೆರಿಕದ ಸರ್ಜನ್ ಜನರಲ್ ಜೆರೋಮ್ ಆ್ಯಡಮ್ಸ್ ತಿಳಿಸಿದ್ದಾರೆ.