ಕೋವಿಡ್​19​ ಹೋಲುವ ಮೆರ್ಸ್​ ನಿವಾರಕ ಲಸಿಕೆ ಮಂಗಗಳ ಮೇಲೆ ಯಶಸ್ವಿ ಪ್ರಯೋಗ

ಮಿಡಲ್​ ಈಸ್ಟ್​​ ರೆಸ್ಪಿರೇಟರಿ ಸಿಂಡ್ರಂ ಕೊರೊನಾ ವೈರಸ್​ ಎಂಬ ಖಾಯಿಲೆಗೆ ಅಮೆರಿಕ ವಿಜ್ಞನಿಗಳು ಲಸಿಕೆ ಕಂಡು ಹಿಡಿದಿದ್ದು, ಮಂಗಗಳ ಮೇಲೆ ಪ್ರಯೋಗ ಮಾಡುವ ಮೂಲಕ ಈ ಲಸಿಕೆ ಫಲಕಾರಿಯಾಗಿದೆ ಎಂದು ಸ್ಪಷ್ಟನೆ ನೀಡಿದ್ದಾರೆ.

ವಾಷಿಂಗ್ಟನ್​​(ಅಮೆರಿಕ): ನಗರದಲ್ಲಿ ಉಂಟಾದ ಮಿಡಲ್​ ಈಸ್ಟ್​​ ರೆಸ್ಪಿರೇಟರಿ ಸಿಂಡ್ರೋಮ್ ಕೊರೊನಾ ವೈರಸ್​ಗೆ​ (MERS-CoV) ಈಗಾಗಲೇ ಚಾಡ್​​-ಓ-ಎಕ್ಸ್-1(​​ChAdOx1) ಲಸಿಕೆ ಕಂಡುಹಿಡಿದಿದ್ದು, ಈ ಲಸಿಕೆಯನ್ನು ಮಂಗ ಹಾಗೂ ಚಿಂಪಾಜಿಗಳ ಮೇಲೆ ಯಶಸ್ವಿಯಾಗಿ ಪ್ರಯೋಗ ಮಾಡಿದ್ದೇವೆ ಎಂದು ಅಮೆರಿಕದ ರಾಷ್ಟ್ರೀಯ ಆರೋಗ್ಯ ಸಂಸ್ಥೆ (ಎನ್ಐಎಚ್) ತಿಳಿಸಿದೆ.

ಮಿಡಲ್​ ಈಸ್ಟ್​​ ರೆಸ್ಪಿರೇಟರಿ ಸಿಂಡ್ರೋಮ್ ಕೊರೊನಾ ವೈರಸ್​ ಎಂಬುದು ತೀವ್ರವಾದ ಉಸಿರಾಟದ ತೊಂದರೆ ಉಂಟುಮಾಡುವ ಖಾಯಿಲೆಯಾಗಿದೆ. ಪ್ರಸ್ತುತವಾಗಿ ವಿಶ್ವದೆಲ್ಲೆಡೆ ಹಬ್ಬುತ್ತಿರುವ ಕೊರೊನಾ ವೈರಸ್​ಗೆ ಹೋಲುತ್ತದೆ ಎಂದು ಎನ್ಐಎಚ್​​ ಸಂಸ್ಥೆ ಹೇಳಿದೆ.

ಅಮೆರಿಕ ವಿಜ್ಞಾನಿಗಳು ಚಾಡ್​​-ಓ-ಎಕ್ಸ್-1 ಲಸಿಕೆಯನ್ನು ಕಂಡುಹಿಡಿಯುವುದರಲ್ಲಿ ಸಫಲರಾಗಿದ್ದು, ಕೋವಿಡ್​-19ಕ್ಕೂ ಸಹ ಇದರ ಮುಂದಿನ ಭಾಗವಾಗಿ ಲಸಿಕೆ ಕಂಡು ಹಿಡಿಯುವ ಪ್ರಯತ್ನ ನಡೆಸುತ್ತಿದ್ದಾರೆ ಎಂದು ತಿಳಿದುಬಂದಿದೆ.

ಚಾಡ್​​-ಓ-ಎಕ್ಸ್-1 ಲಸಿಕೆಯನ್ನು ಮಂಗಗಳ ಮೇಲೆ ಪ್ರಯೋಗ ಮಾಡಲಾಗಿದ್ದು, ಈ ಪೈಕಿ 3 ಗುಂಪುಗಳನ್ನಾಗಿ ವಿಂಗಡಿಸಿ ನಂತರ ಮರ್ಸ್​​-ಕೋವ್​ ಸೋಂಕಿತ ಮಂಗಗಳಿಗೆ ಲಸಿಕೆ ನೀಡಲಾಯಿತು. ಇನ್ನೊಂದು ಗುಂಪಿಗೆ ವ್ಯಾಕ್ಸಿನೇಷನ್​ ಮಾಡಿ ನಂತರ ಮೂರನೇ ಗುಂಪನ್ನು ಖಾಯಿಲೆ ನಿಯಂತ್ರಣದ ಗುಂಪನ್ನಾಗಿ ವಿಂಗಡಿಸಿ ಪರೀಕ್ಷಿಸಲಾಗಿದೆ.

ಈ ಎರಡು ಚಿಕಿತ್ಸೆಗಳು ಫಲಕಾರಿಯಾಗಿದ್ದು, ಯಾವುದಕ್ಕೂ ಶ್ವಾಸಕೋಶದ ಹಾನಿ ಉಂಟಾಗಲಿಲ್ಲ. ಸದ್ಯ ಮಂಗಗಳ ಮೇಲೆ ಈ ಲಸಿಕೆಯನ್ನು ಪ್ರಯೋಗಿಸಿದ್ದು, ಮುಂಬರುವ ದಿನಗಳಲ್ಲಿ ಮನುಷ್ಯರಿಗೆ ಈ ಲಸಿಕೆ ನೀಡಲಾಗುವುದು ಎಂದು ಎನ್ಐಹೆಚ್​​ ಸ್ಪಷ್ಟಪಡಿಸಿದೆ.

ಇನ್ನು ಇಂಗ್ಲೆಂಡ್​​ ಮತ್ತು ಸೌದಿ ಅರೇಬಿಯಾದಲ್ಲಿ ಒಂದನೇ ಹಂತದ ಕ್ಲಿನಿಕಲ್​ ಪ್ರಯೋಗಾಲಯಗಳಲ್ಲಿ ಈ ಲಸಿಕೆಯ ಬಗ್ಗೆ ಅಧ್ಯಯನಗಳು ನಡೆಯುತ್ತಿದ್ದು, ಮಲೇರಿಯಾ, ಎಚ್‌ಐವಿ, ಹೆಪಟೈಟಿಸ್-ಸಿ, ಕ್ಷಯರೋಗ ಮತ್ತು ಎಬೋಲಾಗಳಿಗೂ ಸಹ ಈ ಲಸಿಕೆ ಪ್ರಯೋಜನವಾಗುವ ಸಾಧ್ಯತೆ ಇದೆ ಎಂದು ಎನ್​​ಐಹೆಚ್​​ ಹೇಳಿದೆ.

ಏನಿದು ಮೆರ್ಸ್​?

ಮೆರ್ಸ್‌ (ಮಿಡಲ್‌ ಈಸ್ಟ್‌ ರೆಸ್ಪಿರೇಟರಿ ಸಿಂಡ್ರೋಮ್‌): 2012ರಲ್ಲಿ ಮೊದಲ ಬಾರಿಗೆ ಸೌದಿ ಅರೇಬಿಯಾದಲ್ಲಿ ಕಾಣಿಸಿಕೊಂಡಿತ್ತು. ಹೀಗಾಗಿ ಇದಕ್ಕೆ 'ಮಿಡಲ್‌ ಈಸ್ಟ್‌' ಹೆಸರು. ಮಧ್ಯಪ್ರಾಚ್ಯದಲ್ಲೇ ಸುಮಾರು 800 ಮಂದಿ ಇದಕ್ಕೆ ಬಲಿಯಾಗಿದ್ದರು. ಇದರ ವೈರಸ್‌ ಮೊದಲು ಕಾಣಿಸಿಕೊಂಡದ್ದು ಒಂಟೆಗಳಲ್ಲಿ.