ಕಾಲಿವುಡ್ ಸೂಪರ್ಸ್ಟಾರ್ ನಟ ಸೂರ್ಯ ಸದ್ಯ 'ಕಂಗುವ' ಸಿನಿಮಾದಲ್ಲಿ ಬ್ಯುಸಿಯಾಗಿದ್ದಾರೆ. ಇದರ ಜೊತೆಗೆ ಸುಧಾ ಕೊಂಗರ ನಿರ್ದೇಶನದಲ್ಲಿ ಅವರ 43ನೇ ಸಿನಿಮಾ ಮೂಡಿ ಬರಲಿದೆ. ಈ ಚಿತ್ರದ ಗ್ಲಿಂಪ್ಸ್ ಅನ್ನು ಚಿತ್ರತಂಡ ಇತ್ತೀಚೆಗೆ ಹಂಚಿಕೊಂಡಿದೆ. ನೋಡಲು ಕುತೂಹಲ ಮೂಡಿಸಿರುವ ಈ ವಿಡಿಯೋದಲ್ಲಿ, ಚಿತ್ರದಲ್ಲಿ ನಟಿಸಲಿರುವ ತಾರೆಯರ ಹೆಸರು, ಚಿತ್ರದ ಕಥೆ ಸೇರಿದಂತೆ ಇತರ ಕೆಲವು ಪ್ರಮುಖ ಅಂಶಗಳಿವೆ. ಜೊತೆಗೆ ಕೊನೆಯಲ್ಲಿ ಚಿತ್ರದ ಶೀರ್ಷಿಕೆ ಕೂಡ ರಿವೀಲ್ ಮಾಡಲಾಗಿದೆ.
ಇದರ ಜೊತೆಗೆ ಈ ವಿಡಿಯೋ ದಾಖಲೆ ನಿರ್ಮಿಸಿದೆ. ದಳಪತಿ ವಿಜಯ್ ತಮ್ಮ ಚಿತ್ರಕ್ಕೆ ಸಂಬಂಧಿಸಿದಂತೆ ಒಂದು ವರ್ಷದ ಹಿಂದೆ ಸೋಷಿಯಲ್ ಮೀಡಿಯಾ ಎಕ್ಸ್ನಲ್ಲಿ ಹಂಚಿಕೊಂಡಿದ್ದ ವಿಶೇಷ ವಿಡಿಯೋ ದಾಖಲೆ ಸರಿಗಟ್ಟಿದೆ. ಸೂರ್ಯ ಅವರು ಅಕ್ಟೋಬರ್ 26 ರಂದು 'ಸೂರ್ಯ 43' ಶೀರ್ಷಿಕೆಯೊಂದಿಗೆ ತಮ್ಮ 43ನೇ ಚಿತ್ರದ ಬಗೆಗಿನ ಘೋಷಣೆಯ ವಿಡಿಯೋವನ್ನು ಹಂಚಿಕೊಂಡರು. ಈ ವಿಡಿಯೋ ಈಗಾಗಲೇ 26.6 (2.66 ಕೋಟಿ) ಮಿಲಿಯನ್ ವೀಕ್ಷಣೆಗಳನ್ನು ಪಡೆದುಕೊಂಡಿದೆ. ಈ ಮೂಲಕ ಎಕ್ಸ್ನಲ್ಲಿ ಅತ್ಯಂತ ಹೆಚ್ಚು ವೀಕ್ಷಣೆ ಪಡೆದ ವಿಡಿಯೋ ಇದಾಗಿದೆ.
ಈವರೆಗೂ ಈ ದಾಖಲೆಯು, ಕಳೆದ ವರ್ಷ ಡಿಸೆಂಬರ್ನಲ್ಲಿ ಕಾಲಿವುಡ್ ನಟ ದಳಪತಿ ವಿಜಯ್ ತಮ್ಮ ಚಿತ್ರಕ್ಕೆ ಸಂಬಂಧಿಸಿದಂತೆ ಪೋಸ್ಟ್ ಮಾಡಿದ ವಿಡಿಯೋ ಹೆಸರಿನಲ್ಲಿತ್ತು. ಈ ವಿಡಿಯೋ ಆ ಸಮಯದಲ್ಲಿ 26.2 (2.62 ಕೋಟಿ) ಮಿಲಿಯನ್ ವೀಕ್ಷಣೆಗಳನ್ನು ಪಡೆದುಕೊಂಡಿತ್ತು. ಆದರೆ, ಇದೀಗ ಈ ದಾಖಲೆಯನ್ನು 'ಸೂರ್ಯ 43' ಮುರಿದಿದೆ. ಗ್ಲಿಂಪ್ಸ್ ರಿಲೀಸ್ ಆದ ಎರಡೇ ವಾರದಲ್ಲಿ ವಿಜಯ್ ಸಿನಿಮಾದ ದಾಖಲೆಯನ್ನು ಪುಡಿಗಟ್ಟಿದೆ. ಜಸ್ಟ್ ಗ್ಲಿಂಪ್ಸ್ ಮೂಲಕವೇ ಹೊಸ ದಾಖಲೆ ಬರೆದಿರುವ ಸಿನಿಮಾದ ಮೇಲೆ ಅಭಿಮಾನಿಗಳ ನಿರೀಕ್ಷೆ ಹೆಚ್ಚಿದೆ. ಸದ್ಯ ವಿಡಿಯೋ ವೈರಲ್ ಆಗುತ್ತಿದೆ.
ಇದನ್ನೂ ಓದಿ:ಟೈಗರ್ vs ಪಠಾಣ್: ಎಸ್ಆರ್ಕೆ ಜೊತೆಗಿನ ಮುಂದಿನ ಸಿನಿಮಾ ಬಗ್ಗೆ ಸಲ್ಮಾನ್ ಖಾನ್ ಹೇಳಿದ್ದಿಷ್ಟು
'ಸೂರ್ಯ 43' ಬಗ್ಗೆ..ಸೂರ್ಯ ಹಾಗೂ ನಿರ್ದೇಶಕಿ ಸುಧಾ ಕೊಂಗರ ಮತ್ತೊಮ್ಮೆ ಕೈ ಜೋಡಿಸಿದ್ದಾರೆ. ಕನ್ನಡಿಗ ಕ್ಯಾಪ್ಟನ್ ಗೋಪಿನಾಥ್ ಜೀವನ ಕಥಾಧಾರಿತ ಸಿನಿಮಾ 'ಸೂರರೈ ಪೋಟ್ರು' ಮೂಲಕ ಸಂಚಲನ ಮೂಡಿಸಿದ್ದ ಈ ಜೋಡಿ ಮಗದೊಮ್ಮೆ ಒಂದಾಗಿದ್ದಾರೆ. 'ಸೂರರೈ ಪೋಟ್ರು' ಸಿನಿಮಾವು ಪ್ರೇಕ್ಷಕರಿಂದ ಹಾಗೂ ವಿಮರ್ಶಕರಿಂದಲೂ ಭಾರಿ ಮೆಚ್ಚುಗೆ ಪಡೆದುಕೊಂಡಿತ್ತು. ಆಸ್ಕರ್ ರೇಸ್ಗೂ ಇಳಿದಿದ್ದ ಈ ಚಿತ್ರ ಹಲವು ವಿಭಾಗದಲ್ಲಿ ರಾಷ್ಟ್ರಪ್ರಶಸ್ತಿ ಬಾಚಿಕೊಂಡಿತ್ತು. ಅತ್ಯುತ್ತಮ ನಟ, ಅತ್ಯುತ್ತಮ ನಟಿ, ಅತ್ಯುತ್ತಮ ಹಿನ್ನೆಲೆ ಸಂಗೀತ, ಅತ್ಯುತ್ತಮ ಚಿತ್ರ ಪ್ರಶಸ್ತಿಗಳನ್ನು ಗೆದ್ದುಕೊಂಡಿರುವ ಈ ತಂಡ ಇದೀಗ ಹೊಸ ಪ್ರಾಜೆಕ್ಟ್ಗಾಗಿ ಮತ್ತೆ ಒಂದಾಗಿದೆ.
'ಸೂರರೈ ಪೋಟ್ರು' ಮೂಲಕ ಧಮಾಕ ಸೃಷ್ಟಿಸಿದ್ದ ಸೂರ್ಯ ಹಾಗೂ ಸುಧಾ ಕೊಂಗರ ಹೊಸ ಸಿನಿಮಾದಲ್ಲಿ ದೊಡ್ಡ ತಾರಾಬಳಗವೇ ಇದೆ. ಮಾಲಿವುಡ್ ಹ್ಯಾಂಡ್ಸಮ್ ಹಂಕ್ ದುಲ್ಕರ್ ಸಲ್ಮಾನ್, ನಜ್ರಿಯಾ ಫಹದ್ ಹಾಗೂ ವಿಜಯ್ ವರ್ಮಾ ಅವರು ಸೂರ್ಯ ನಟನೆಯ 43ನೇ ಚಿತ್ರದ ಭಾಗವಾಗಿದ್ದಾರೆ. ಚಿತ್ರಕ್ಕೆ 'ಪುರನನೂರು' ಎಂದು ಶೀರ್ಷಿಕೆ ಇಡಲಾಗಿದೆ. ಸಿನಿಮಾವನ್ನು ಸೂರ್ಯ ಒಡೆತನದ 2D ಎಂಟರ್ಟೈನ್ಮೆಂಟ್ ಅಡಿ ಜ್ಯೋತಿಕಾ, ಸೂರ್ಯ ಮತ್ತು ರಾಜಶೇಖರ್ ಕರ್ಪೂರ ಸುಂದರ ಪಾಂಡಿಯನ್ ನಿರ್ಮಿಸಲಿದ್ದಾರೆ. ಮ್ಯೂಸಿಕ್ ಮಾಂತ್ರಿಕ ಜಿ.ವಿ ಪ್ರಕಾಶ್ ಸಂಗೀತ ನಿರ್ದೇಶಿಸುತ್ತಿರುವ 100ನೇ ಚಿತ್ರ ಇದಾಗಿರುವುದು ಮತ್ತೊಂದು ವಿಶೇಷ. 'ಸೂರರೈ ಪೋಟ್ರು' ಮೂಲಕ ಮೋಡಿ ಮಾಡಿದ್ದ ಸೂರ್ಯ, ಸುಧಾ ಹಾಗೂ ಜಿ.ವಿ ಪ್ರಕಾಶ್ ಹೊಸ ಪ್ರಾಜೆಕ್ಟ್ ಮೇಲೆ ನಿರೀಕ್ಷೆ ಇಮ್ಮಡಿಯಾಗಿದೆ.
ಇದನ್ನೂ ಓದಿ:'ಸ್ಯಾಮ್ ಬಹದ್ದೂರ್': ಭಾರತೀಯ ಸೇನಾ ಕ್ಯಾಂಪ್ನಲ್ಲಿ ವಿಕ್ಕಿ ಕೌಶಲ್ - ತರಬೇತಿಯ ವಿಡಿಯೋ ನೋಡಿ
