ಪಠಾಣ್​ ಬಿಡುಗಡೆಗೆ ದಿನಗಣನೆ: ಥಿಯೇಟರ್​ನ ಸಂಪೂರ್ಣ ಟಿಕೆಟ್ ಖರೀದಿಸಿದ ಶಾರುಖ್​​ ಅಭಿಮಾನಿಗಳ ಸಂಘ

ಪಠಾಣ್​ ಸಿನಿಮಾದ ಫಸ್ಟ್ ಶೋ ನೋಡಲು ಖಾರುಖ್​ ಖಾನ್​ ಅಭಿಮಾನಿಗಳ ಸಂಘ ಒಂದು ಮುಂಬೈನ ಥಿಯೇಟರ್ ಒಂದರ ಸಂಪೂರ್ಣ ಟಿಕೆಟ್​ಗಳನ್ನು ಖರೀದಿಸಿದೆ.

ಪಠಾಣ್​ ಸಿನಿಮಾ ಬಾಲಿವುಡ್​ ಚಿತ್ರರಂಗದ ಬಹು ನಿರೀಕ್ಷಿತ ಸಿನಿಮಾ. ಕಿಂಗ್​ ಖಾನ್​ ಶಾರುಖ್​ ಸಿನಿಮಾ ಅಂದ ಮೇಲೆ ನಿರಿಕ್ಷೇ ಹೆಚ್ಚೇ ಅಲ್ವೇ?. ಕೊನೆಯದಾಗಿ ಝೀರೋ (21 ಡಿಸೆಂಬರ್ 2018) ಸಿನಿಮಾದಲ್ಲಿ ಕಾಣಿಸಿಕೊಂಡಿದ್ದ ರೊಮ್ಯಾಂಟಿಕ್ ಹೀರೋ ಶಾರುಖ್​ ಖಾನ್​​ ನಾಲ್ಕು ವರ್ಷಗಳ ಬಳಿಕ ಆ್ಯಕ್ಷನ್​ ಅವತಾರದಲ್ಲಿ ತೆರೆ ಮೇಲೆ ಅಬ್ಬರಿಸಲು ಸಜ್ಜಾಗಿದ್ದಾರೆ. ಸಿನಿಮಾ ಬಿಡುಗಡೆಗೆ ಕೇವಲ ನಾಲ್ಕು ದಿನಗಳು ಬಾಕಿ ಇದ್ದು ಮೊದಲ ದಿನದ ಟಿಕೆಟ್ ಬಹುತೇಕ ಕಡೆಗಳಲ್ಲಿ ಸೋಲ್ಡ್ ಔಟ್ ಆಗಿದೆ.

​ನಟ ಶಾರುಖ್​ ಖಾನ್​ ತಮ್ಮ ಅಮೋಘ ಅಭಿನಯದ ಮೂಲಕ ದೊಡ್ಡ ಸಂಖ್ಯೆಯ ಅಭಿಮಾನಿ ಬಳಗವನ್ನು ಹೊಂದಿದ್ದಾರೆ. ದೇಶದಲ್ಲಿ ಮಾತ್ರವಲ್ಲದೇ ವಿದೇಶದಲ್ಲಿಯೂ ಅವರನ್ನು ಪ್ರೀತಿಸುವ ಕೋಟ್ಯಂತರ ಅಭಿಮಾನಿಗಳಿದ್ದಾರೆ. ಮುಂಬೈನ ಶಾರುಖ್​​ ಅಭಿಮಾನಿಗಳ ಸಂಘವು ಇಡೀ ಥಿಯೇಟರ್​ ಟಿಕೆಟ್​ ಖರೀದಿ ಮಾಡುವ ಮೂಲಕ ಕಿಂಗ್​ ಖಾನ್​ ಮೇಲಿನ ತಮ್ಮ ಅಭಿಮಾನ ವ್ಯಕ್ತಪಡಿಸಿದ್ದಾರೆ. ಹೌದು, ಈ ವಿಷಯ ಕೇಳಿದವರು ಹುಬ್ಬೇರಿಸಿದ್ದಾರೆ. ಸಿನಿಮಾ ತೆರೆ ಕಾಣಲು ಕೇವಲ ನಾಲ್ಕು ದಿನ ಬಾಕಿ ಇದೆ. ಈ ಹೊತ್ತಿನಲ್ಲಿ ಮುಂಬೈನ ಶಾರುಖ್ ಅಭಿಮಾನಿಗಳು ಗೈಟಿ ಗ್ಯಾಲಕ್ಸಿ ಥಿಯೇಟರ್​ (Mumbai's Gaiety Galaxy Theater)ನ ಮೊದಲ 9 ಗಂಟೆಯ ಶೋನ ಎಲ್ಲ ಟಿಕೆಟ್​ಗಳನ್ನು ಬುಕ್​ ಮಾಡಿದ್ದಾರೆ.

ಖಾರುಖ್​ ಖಾನ್​ ಅಭಿಮಾನಿಗಳ ಸಂಘ: ಜಿ7 ಮಲ್ಟಿಫ್ಲೆಕ್ಸ್ ಮತ್ತು ಮರಾಠಾ ಮಂದಿರ್​ ಸಿನಿಮಾ ಚಿತ್ರಮಂದಿರದದ ಕಾರ್ಯ ನಿರ್ವಾಹಕ ನಿರ್ದೇಶಕ ಮನೋಜ್​ ದೇಸಾಯಿ ಮಾಹಿತಿ ನೀಡಿದ್ದು, ಖಾರುಖ್​ ಖಾನ್​ ಅಭಿಮಾನಿಗಳ ಸಂಘ ಒಂದು ಇಡೀ ಥಿಯೇಟರ್​ ಟಿಕೆಟ್​ಗಳನ್ನು ಕೊಂಡುಕೊಂಡಿದೆ. ಜನವರಿ 25ರಂದು ಬೆಳಗ್ಗೆ 9 ಗಂಟೆಗೆ ಈ ಅಭಿಮಾನಿಗಳು ಸಿನಿಮಾ ವೀಕ್ಷಣೆ ಮಾಡಲಿದ್ದಾರೆ ಎಂದು ತಿಳಿಸಿತು.

ಮುಂಬೈನ ಗೈಟಿ ಗ್ಯಾಲಕ್ಸಿ ಚಿತ್ರಮಂದಿರವನ್ನು 1972ರಲ್ಲಿ ಸ್ಥಾಪಿಸಲಾಯಿತು. ಮೊದಲ ಬಾರಿಗೆ ಇಲ್ಲಿ ಬೆಳಗ್ಗೆ 9 ಗಂಟೆಗೆ ಚಲನಚಿತ್ರ ಬಿಡುಗಡೆ ಆಗುತ್ತಿದೆ. ಶಾರುಖ್​ ಅಭಿನಯದ ಪಠಾಣ್​​ ಚಿತ್ರ ಈ ಸಾಧನೆ ಮಾಡಿದ ಮೊದಲ ಚಿತ್ರ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಥಿಯೇಟರ್​ ಮೊದಲ ಬಾರಿಗೆ ತನ್ನ ನೀತಿಯನ್ನು ಬದಲಾಯಿಸಿಕೊಂಡಿದೆ.

ಪಠಾಣ್ ಸಿನಿಮಾ ಮುಂಗಡ ಬುಕ್ಕಿಂಗ್ ದಾಖಲೆ​:ಇನ್ನು ಬಹು ನಿರೀಕ್ಷಿತ ಪಠಾಣ್ ಸಿನಿಮಾ ಮುಂಗಡ ಬುಕ್ಕಿಂಗ್​ನಲ್ಲಿ ಸಾಕಷ್ಟು ಗಳಿಕೆ ಮಾಡುತ್ತಿದೆ. ಆರಂಭಿಕ ಅಂಕಿ - ಅಂಶದ ಪ್ರಕಾರ, ಸಿನಿಮಾವು ಮುಂಗಡ ಬುಕ್ಕಿಂಗ್​ನಲ್ಲಿ 3.68 ಕೋಟಿ ರೂಪಾಯಿಗೂ ಅಧಿಕ ಗಳಿಸಿದೆ. 1,17,000ಕ್ಕೂ ಹೆಚ್ಚು ಟಿಕೆಟ್​ಗಳು ಸೇಲ್ ಆಗಿವೆ. ಭಾರತೀಯ ಬಾಕ್ಸ್​ ಆಫೀಸ್ ಮಾಹಿತಿ ಪ್ರಕಾರ, ಸಿನಿಮಾ ಟಿಕೆಟ್ ಮುಂಗಡ ಬುಕ್ಕಿಂಗ್ ರೇಸ್​ನಲ್ಲಿ 9 ಕೋಟಿಗೂ ಅಧಿಕ ಸಂಪಾದನೆ ಮಾಡಿದೆ.

ಶಾರುಖ್ ದೀಪಿಕಾ ನಾಲ್ಕನೇ ಚಿತ್ರ:ಓಂ ಶಾಂತಿ ಓಂ, ಚೆನ್ನೈ ಎಕ್ಸ್‌ಪ್ರೆಸ್ ಮತ್ತು ಹ್ಯಾಪಿ ನ್ಯೂ ಇಯರ್ ಸಿನಿಮಾಗಳಲ್ಲಿ ಮುಖ್ಯಭೂಮಿಕೆಯಲ್ಲಿ ಅಭಿನಯಿಸಿರುವ ಶಾರುಖ್ ಖಾನ್​ ಮತ್ತು ದೀಪಿಕಾ ಪಡುಕೋಣೆ ತಮ್ಮ ನಾಲ್ಕನೇ ಚಿತ್ರದ ಬಿಡುಗಡೆಗೆ ಸಜ್ಜಾಗಿದ್ದಾರೆ. ಆ ಮೂರೂ ಸಿನಿಮಾಗಳಲ್ಲಿಯೂ ಅತ್ಯುತ್ತಮ ಜೋಡಿ ಎಂದು ಕರೆಸಿಕೊಂಡಿದೆ. ಈ ಚಿತ್ರದ ಮೇಲೂ ಅವರ ಅಭಿಮಾನಿಗಳು ಭಾರೀ ನಿರೀಕ್ಷೆ ಇಟ್ಟುಕೊಂಡಿದ್ದಾರೆ.

ಇದನ್ನೂ ಓದಿ:32 ವರ್ಷಗಳ ಸುದೀರ್ಘ ಕನಸು ಇಂದು ನನಸು: ಪಠಾಣ್​ ಚಿತ್ರವನ್ನು ಸಿನಿ ಜರ್ನಿಯ ಹೊಸ ಅಧ್ಯಾಯಕ್ಕೆ ಸೇರಿಸಿದ ಶಾರುಖ್ ಖಾನ್

250 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣ ಆಗಿರುವ ಪಠಾಣ್​ ಜನವರಿ 25 ರಂದು ರಿಲೀಸ್​ ಆಗಲಿದೆ. ಸಿದ್ಧಾರ್ಥ್ ಆನಂದ್ ಆ್ಯಕ್ಷನ್​ ಕಟ್​ ಹೇಳಿರುವ ಈ ಸಿನಿಮಾದಲ್ಲಿ ಶಾರುಖ್​ ಖಾನ್​ ಮತ್ತು ದೀಪಿಕಾ ಪಡುಕೋಣೆ ಜೊತೆ ಜಾನ್​ ಅಬ್ರಹಾಂ, ಡಿಂಪಲ್ ಕಪಾಡಿಯಾ ನಟಿಸಿದ್ದಾರೆ. ಆದಿತ್ಯ ಚೋಪ್ರಾ ಮತ್ತು ಅಲೆಕ್ಸಾಂಡರ್ ದೋಸ್ಟಲ್ ನಿರ್ಮಾಣ ಮಾಡಿದ್ದಾರೆ.