ಗ್ಲೋಬಲ್ ಐಕಾನ್ ಪ್ರಿಯಾಂಕಾ ಚೋಪ್ರಾ ಅವರು ಕಳೆದ ಕೆಲ ದಿನಗಳ ಹಿಂದೆ ಬಾಲಿವುಡ್ ಬಗ್ಗೆ ಮಾತನಾಡಿ ಸಖತ್ ಸುದ್ದಿಯಾಗಿದ್ದರು. ಹಿಂದಿ ಚಿತ್ರರಂಗದಲ್ಲಿ ಕೆಲಸ ಮಾಡಿದ ಅನುಭವಗಳ ಬಗ್ಗೆ ಸಂದರ್ಶನವೊಂದರಲ್ಲಿ ಸಾಕಷ್ಟು ಹಂಚಿಕೊಂಡಿದ್ದರು. ಅವರ ಹೇಳಿಕೆಗಳು ಸಾಕಷ್ಟು ಸಂಚಲನ ಸೃಷ್ಟಿಸಿತ್ತು.
ಸದ್ಯ ಚಲನಚಿತ್ರ ನಿರ್ಮಾಪಕ, ನಿರೂಪಕ ಕರಣ್ ಜೋಹರ್ ಅವರ ಚಾಟ್ ಶೋ 'ಕಾಫಿ ವಿತ್ ಕರಣ್' ಸೀಸನ್ 6ರಲ್ಲಿ ಪ್ರಿಯಾಂಕಾ ಅವರು ಕೊನೆಯ ಬಾರಿಗೆ ಕಾಣಿಸಿಕೊಂಡ ವಿಡಿಯೋ ಕ್ಲಿಪ್ ಸಾಮಾಜಿಕ ಮಾಧ್ಯಮದಲ್ಲಿ ಸದ್ದು ಮಾಡುತ್ತಿದೆ. ಈ ವಿಡಿಯೋ ಕ್ಲಿಪ್‌ನಲ್ಲಿ, ಕರಣ್ ಜೋಹರ್, ಮದುವೆಗೆ ಆಹ್ವಾನಿಸದ ಬಗ್ಗೆ ಪ್ರಿಯಾಂಕಾರನ್ನು ಪ್ರಶ್ನಿಸಿದ್ದಾರೆ. ಅದಕ್ಕೆ ನಟಿ ಕೊಟ್ಟ ಉತ್ತರ ನೆಟ್ಟಿಗರ ಗಮನ ಸೆಳೆದಿದೆ.
ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ವಿಡಿಯೋದಲ್ಲಿ, 2018ರಲ್ಲಿ ಅಮೆರಿಕನ್ ಗಾಯಕ ನಿಕ್ ಜೋನಾಸ್ ಜೊತೆ ಮದುವೆಯಾದ ಬಗ್ಗೆ ನಟಿ ಪ್ರಿಯಾಂಕಾ ಚೋಪ್ರಾ ಮಾತನಾಡಿದ್ದಾರೆ. ತನ್ನ ಹಾಗೂ ನಿಕ್ ಅವರ ಸಂಬಂಧಿಕರು ಮತ್ತು ಸ್ನೇಹಿತರಿಗೆ ಆಹ್ವಾನದ ಸಂಖ್ಯೆಯನ್ನು ಏಕೆ ಸೀಮಿತಗೊಳಿಸಲು ನಿರ್ಧರಿಸಿದೆ ಎಂಬ ಬಗ್ಗೆ ಅವರು ವಿವರಿಸಿದ್ದಾರೆ. "ನಮ್ಮ ಮದುವೆಯು ತುಂಬಾ ಮೋಜಿನ ಮದುವೆಯಾಗಿತ್ತು. ಏಕೆಂದರೆ ಅದು ಕೇವಲ ಕುಟುಂಬಸ್ಥರ ನಡುವೆ ನಡೆಯಿತು" ಎಂದು ಪ್ರಿಯಾಂಕಾ ತಿಳಿಸಿದ್ದಾರೆ. ಕರಣ್ ಅವರು ನಟಿಯ ಮಾತಿಗೆ ಅಡ್ಡಿಪಡಿಸಿ ಪ್ರಶ್ನಿಸಿದರು. "ನೀವು ನಮ್ಮಲ್ಲಿ (ಬಾಲಿವುಡ್) ಯಾರನ್ನೂ ಕರೆಯಲಿಲ್ಲ" ಎಂದು ಕೇಳಿದ್ದಾರೆ. ಅದಕ್ಕೆ ಉತ್ತರಿಸಿದ ಪ್ರಿಯಾಂಕಾ ಚೋಪ್ರಾ, "ನಿಮ್ಮ ಬಹಳಷ್ಟು ಕೆಲಸಗಳಿಗೆ / ಈವೆಂಟ್ಗಳಿಗೆ ನನಗೂ ಆಹ್ವಾನ ಬಂದಿರಲಿಲ್ಲ" ಎಂದು ನಗುತ್ತಲೇ ತಿಳಿಸಿದ್ದಾರೆ.