ಬಹುನಿರೀಕ್ಷಿತ ಸಲಾರ್ ಚಿತ್ರದ ಅದ್ಧೂರಿ ಟೀಸರ್ ಇಂದು ಬೆಳಗ್ಗೆ 5.12ಕ್ಕೆ ರಿಲೀಸ್ ಆಗಿದೆ. ಹೊಂಬಾಳೆ ನಿರ್ಮಾಣದಲ್ಲಿ, ಕೆಜಿಎಫ್ ರೂವಾರಿ ಪ್ರಶಾಂತ್ ನೀಲ್ ನಿರ್ದೇಶನದಲ್ಲಿ ಬಾಹುಬಲಿ ಖ್ಯಾತಿಯ ನಟ ಪ್ರಭಾಸ್ ಅಭಿನಯಿಸಿರುವ ಸಿನಿಮಾದ ಟೀಸರ್ ಅದ್ಧೂರಿಯಾಗಿದೆ. ಸಲಾರ್ ಚಿತ್ರ ಎರಡು ಭಾಗಗಳಲ್ಲಿ ರಿಲೀಸ್ ಆಗಲಿದೆ ಎಂಬುದನ್ನೂ ಕೂಡ ಚಿತ್ರ ತಂಡ ಖಚಿತಪಡಿಸಿದೆ.
ಸೆಪ್ಟಂಬರ್ 28ರಂದು ಸಲಾರ್ ಚಿತ್ರ ವಿಶ್ವದಾದ್ಯಂತ ತೆರೆಗಪ್ಪಳಿಸಲಿದೆ. ಟೀಸರ್ ರಿಲೀಸ್ ಬಳಿಕ ಚಿತ್ರದ ಮೇಲಿನ ಅಭಿಮಾನಿಗಳ ನಿರೀಕ್ಷೆ ದುಪ್ಪಟ್ಟಾಗಿದೆ. ಉಗ್ರಂ ಹಾಗೂ ಕೆಜಿಎಫ್ 1 ಹಾಗೂ ಕೆಜಿಎಫ್ 2 ಚಿತ್ರದ ಮೂಲಕ ಭಾರತೀಯ ಸಿನಿಮಾರಂಗದಲ್ಲಿ ಪ್ರಶಾಂತ್ ನೀಲ್ ಬೇಡಿಕೆಯಲ್ಲಿರುವ ಡೈರೆಕ್ಟರ್. ಕೆಜಿಎಫ್ ಚಿತ್ರ ವಿಶ್ವದಾದ್ಯಂತ ಭಾರಿ ಗಳಿಕೆ ಕಂಡ ಹಿನ್ನೆಲೆಯಲ್ಲಿ ಸಲಾರ್ ಮೇಲೆ ಸಿನಿಮಾ ರಸಿಕರ ಕಣ್ಣು ನೆಟ್ಟಿದೆ. ಸಲಾರ್ ಹೇಗೆ ಮೂಡಿಬಂದಿರಬಹುದು ಎಂಬುದಕ್ಕೆ ಸದ್ಯದ ಟೀಸರ್ ಒಂದು ಸಣ್ಣ ಝಲಕ್ ನೀಡಿದೆ.
ಸದ್ಯ ರಿಲೀಸ್ ಆಗಿರುವ ಟೀಸರ್ ನೋಡಿದಾಗ ಕೆಜಿಎಫ್, ಉಗ್ರಂ ರೀತಿಯೇ ಮಾಸ್ ದೃಶ್ಯಗಳಿರುವುದು ಪಕ್ಕಾ ಆಗಿದೆ. ಇದಕ್ಕೂ ಮೊದಲು ಅನಾವರಣಗೊಂಡಿರುವ ಪೋಸ್ಟರ್ನಲ್ಲಿ ಯಂಗ್ ರೆಬೆಲ್ ಸ್ಟಾರ್ ಪ್ರಭಾಸ್ ಎಕೆ-47 ಗನ್ ಹಿಡಿದುಕೊಂಡು ಮಾಸ್ ಲುಕ್‍ನಲ್ಲಿ ಕಾಣಿಸಿಕೊಂಡಿದ್ದರು. ಜೊತೆಗೆ ಅತ್ಯಂತ ಹಿಂಸಾತ್ಮಕ ಮನುಷ್ಯ, ಆತ ಒಬ್ಬನೇ, ಆದರೆ ಆತ ಬಹಳ ವೈಲೆಂಟ್ ಅಂತಾ ಬರೆಯಲಾಗಿತ್ತು. ಇದರಿಂದಾಗಿ ಚಿತ್ರ ಸಿಕ್ಕಾಪಟ್ಟೆ ಮಾಸ್ ಆಗಿರುತ್ತೆ ಎಂಬ ಸುಳಿವು ಸಿಕ್ಕಿತ್ತು.