ಬಾಲಿವುಡ್ನ ಖ್ಯಾತ ನಿರ್ಮಾಪಕ ಕರಣ್ ಜೋಹರ್ ನಡೆಸಿಕೊಡುವ ಜನಪ್ರಿಯ ಕಾರ್ಯಕ್ರಮ ''ಕಾಫಿ ವಿತ್ ಕರಣ್'' ಸೀಸನ್ 8ರ ಹೊಸ ಪ್ರೋಮೋವನ್ನು ಅನಾವರಣಗೊಳಿಸಲಾಗಿದೆ. ಎರಡನೇ ಸಂಚಿಕೆಯ ಪ್ರೋಮೋ ಬಿಡುಗಡೆಗೊಂಡಿದ್ದು, ಪ್ರೇಕ್ಷಕರು ಕುತೂಹಲ ವ್ಯಕ್ತಪಡಿಸಿದ್ದಾರೆ.
ಬಾಲಿವುಡ್ ಜನಪ್ರಿಯ ಸಹೋದರ ಜೋಡಿ ಸನ್ನಿ ಡಿಯೋಲ್ ಹಾಗೂ ಬಾಬಿ ಡಿಯೋಲ್ ಅವರು ಕಾಫಿ ವಿತ್ ಕರಣ್ ಸೀಸನ್ 8 ರ ಎರಡನೇ ಸಂಚಿಕೆಯ ಅತಿಥಿಗಳು. ರಣ್ವೀರ್ ಸಿಂಗ್ ಮತ್ತು ದೀಪಿಕಾ ಪಡುಕೋಣೆ ದಂಪತಿ ಆಗಮನದ ಮೂಲಕ ಗ್ರ್ಯಾಂಡ್ ಓಪನಿಂಗ್ ಪಡೆದಿರುವ ಚಾಟ್ ಶೋ ಡಿಯೋಲ್ ಬ್ರದರ್ಸ್ ಮೂಲಕ ಮತ್ತಷ್ಟು ಮನರಂಜನೆ ನೀಡಲು ಸಜ್ಜಾಗಿದೆ.
ಇದೀಗ ಬಿಡುಗಡೆಯಾಗಿರುವ ಪ್ರೋಮೋದಲ್ಲಿ, ಐಕಾನಿಕ್ ಸಹೋದರ ಜೋಡಿ ಸನ್ನಿ ಡಿಯೋಲ್ ಮತ್ತು ಬಾಬಿ ಡಿಯೋಲ್ ಕಾಣಿಸಿಕೊಂಡಿದ್ದಾರೆ. ಪ್ರೇಕ್ಷಕರು ಸಹ ಆಕರ್ಷಕ ಚರ್ಚೆಯನ್ನು ನಿರೀಕ್ಷಿಸಬಹುದಾಗಿದೆ. ಮುಂದಿನ ಸಂಚಿಕೆಯ ಸಂಭಾಷಣೆಯ ವಿಷಯಗಳು ಸನ್ನಿ ಡಿಯೋಲ್ ಅವರ ಇತ್ತೀಚಿನ ಬ್ಲಾಕ್‌ ಬಸ್ಟರ್ ಹಿಟ್ ಗದರ್ 2 ಕುರಿತಾಗಿದೆ. ಜೊತೆಗೆ ಬಾಬಿ ಡಿಯೋಲ್ ಅವರ ವೃತ್ತಿಜೀವನದಲ್ಲಿ ಸಲ್ಮಾನ್ ಖಾನ್ ಅವರ ಪ್ರಮುಖ ಪಾತ್ರದ ಕುರಿತಾಗಿಯೂ ಇದೆ. ಅಲ್ಲದೇ, ಕರಣ್ ಜೋಹರ್ ನಿರ್ದೇಶಿಸಿ, ನಿರ್ಮಾಣ ಮಾಡಿರುವ ಇತ್ತೀಚಿನ ಸೂಪರ್ ಹಿಟ್ ಸಿನಿಮಾ ರಾಕಿ ಔರ್ ರಾಣಿ ಕಿ ಪ್ರೇಮ್ ಕಹಾನಿಯಲ್ಲಿ ಡಿಯೋಲ್ ಸಹೋದರರ ತಂದೆ ಧರ್ಮೇಂದ್ರ ಅವರ ಆನ್-ಸ್ಕ್ರೀನ್ ಕಿಸ್ ಬಗ್ಗೆಯೂ ಮಾತನಾಡಿದ್ದಾರೆ.