ಭಾಷಾ ವಿವಾದದ ನಡುವೆ 'ಕೆಜಿಎಫ್​-2' ದಾಖಲೆ; ಹಿಂದಿಯಲ್ಲೇ ಅತಿ ಹೆಚ್ಚು ಗಳಿಸಿದ 3ನೇ ಸಿನಿಮಾ!

ಹಿಂದಿ ಭಾಷೆ ವಿಚಾರವಾಗಿ ನಿನ್ನೆಯಿಂದಲೂ ವಾದ-ವಿವಾದ ನಡೆಯುತ್ತಿದೆ. ಇದರ ಮಧ್ಯೆ ನಟ ಯಶ್​ ಅಭಿನಯದ ಕೆಜಿಎಫ್​ ಚಾಪ್ಟರ್ 2 ಸಿನಿಮಾ ಹಿಂದಿ ಅವತರಣಿಕೆಯಲ್ಲೇ ಹೊಸ ದಾಖಲೆ ಬರೆದಿದೆ.

ಮುಂಬೈ:ನಿನ್ನೆಯಿಂದ ಹಿಂದಿ ಭಾಷೆ ವಿಚಾರವಾಗಿ ವಿವಾದ ಉದ್ಬವವಾಗಿದ್ದು, ಬಾಲಿವುಡ್ ನಟ ಅಜಯ್ ದೇವಗನ್​​ ಟ್ವೀಟ್‌ಗೆ ಇನ್ನಿಲ್ಲದ ಆಕ್ರೋಶ ವ್ಯಕ್ತವಾಗ್ತಿದೆ. ಇದರ ಮಧ್ಯೆ ಸ್ಯಾಂಡಲ್​ವುಡ್ ನಟ ಯಶ್ ನಟಿಸಿರುವ ಕೆಜಿಎಫ್​​ ಚಾಪ್ಟರ್​- 2 ಹಿಂದಿ ಚಿತ್ರರಂಗದಲ್ಲೇ ವಿನೂತನ ದಾಖಲೆ ನಿರ್ಮಿಸಿದೆ. ಪ್ರಭಾಸ್​ ಅಭಿನಯದ ಬಾಹುಬಲಿ 2 ಮತ್ತು ಅಮೀರ್ ಖಾನ್ ನಟನೆಯ ದಂಗಲ್​ ಚಿತ್ರದ ಬಳಿಕ ಹಿಂದಿ ಅವತರಣಿಕೆಯಲ್ಲಿ ಅತಿ ಹೆಚ್ಚು ಹಣ ಗಳಿಕೆ ಮಾಡಿರುವ ಸಿನಿಮಾ ಆಗಿ ಹೊರಹೊಮ್ಮಿದೆ.

ವಿಶ್ವದಾದ್ಯಂತ ಏಪ್ರಿಲ್​ 14ರಂದು ರಿಲೀಸ್​ ಆಗಿರುವ ಈ ಸಿನಿಮಾ ಈಗಾಗಲೇ ಸಾವಿರ ಕೋಟಿಗೂ ಅಧಿಕ ಹಣ ಗಳಿಸಿದೆ. ಇದರಲ್ಲಿ ಹಿಂದಿ ಅವತರಣಿಕೆಯಲ್ಲೇ 343.13 ಕೋಟಿ ರೂಪಾಯಿ ಸಂಪಾದಿಸಿದೆ ಎಂದು ತಿಳಿದು ಬಂದಿದೆ. ಪ್ರಭಾಸ್ ನಟನೆಯ ಬಾಹುಬಲಿ 2 ಹಿಂದಿಯಲ್ಲಿ 510.99 ಕೋಟಿ ರೂ. ಹಾಗೂ ಅಮೀರ್ ಖಾನ್ ನಟನೆಯ ದಂಗಲ್​​ 387.38 ಕೋಟಿ ರೂಪಾಯಿ ಗಳಿಕೆ ಮಾಡಿತ್ತು. ಇದೀಗ ಕೆಜಿಎಫ್​ ಚಾಪ್ಟರ್​ 2 ಅನೇಕ ದಾಖಲೆಗಳನ್ನು ಬರೆಯುತ್ತಿದ್ದು, ಟೈಗರ್ ಜಿಂದಾ ಹೈ, ಪಿಕೆ ಹಾಗೂ ಸಂಜು ಚಿತ್ರ ನಿರ್ಮಿಸಿದ್ದ ದಾಖಲೆಗಳನ್ನು ಪುಡಿಗಟ್ಟಿದೆ.

ಸಲ್ಮಾನ್ ಖಾನ್ ನಟನೆಯ ಟೈಗರ್ ಜಿಂದಾ ಹೈ ಚಿತ್ರ 339.16 ಕೋಟಿ ರೂ. ಅಮೀರ್ ಖಾನ್ ನಟನೆಯ ಪಿಕೆ 340.08 ಕೋಟಿ ರೂ ಹಾಗೂ ರಣಬೀರ್ ಕಪೂರ್​ ನಟನೆಯ ಸಂಜು ಚಿತ್ರ 342.53 ಕೋಟಿ ರೂ. ಗಳಿಕೆ ಮಾಡಿದ್ದವು. ಆದರೆ, ಇದೀಗ ಈ ದಾಖಲೆಗಳು ಕೆಜಿಎಫ್​​ 2 ಎದುರು ಬ್ರೇಕ್​ ಆಗಿವೆ.

ಇದಕ್ಕೆ ಸಂಬಂಧಿಸಿದಂತೆ ಸಿನಿಮಾ ವಿಶ್ಲೇಷಕ ತಾರಕ್​ ಆದರ್ಶ್​ ಎಂಬುವವರು ಟ್ವೀಟ್ ಸಹ ಮಾಡಿದ್ದು, ಹಿಂದಿಯಲ್ಲಿ ಅತಿ ಹೆಚ್ಚು ಹಣ ಗಳಿಕೆ ಮಾಡಿರುವ 3ನೇ ಚಿತ್ರವಾಗಿ ಕೆಜಿಎಫ್​​ 2 ಹೊರಹೊಮ್ಮಿದೆ ಎಂದು ತಿಳಿಸಿದ್ದಾರೆ. ಏಪ್ರಿಲ್ 14ರಂದು ಕನ್ನಡ, ಹಿಂದಿ, ಮಲಯಾಳಂ, ತಮಿಳು ಹಾಗೂ ತೆಲುಗು ಭಾಷೆಗಳಲ್ಲಿ ಕೆಜಿಎಫ್​ ಚಾಪ್ಟರ್ 2 ಚಿತ್ರ ರಿಲೀಸ್​ ಆಗಿದ್ದು ಸಂಜಯ್​ ದತ್​, ರವೀನಾ ಟಂಡನ್​, ಶ್ರೀನಿಧಿ ಶೆಟ್ಟಿ, ಪ್ರಕಾಶ್ ರಾಜ್​​ ಸೇರಿದಂತೆ ಅನೇಕರು ನಟನೆ ಮಾಡಿದ್ದಾರೆ.