ಭಾರತೀಯ ಚಿತ್ರರಂಗದ ಬಹುನಿರೀಕ್ಷಿತ ಚಿತ್ರ 'ಜೈಲರ್' ಥಿಯೇಟರ್ಗಳಲ್ಲಿ ಧೂಳೆಬ್ಬಿಸುತ್ತಿದೆ. ಕಾಲಿವುಡ್ ಸೂಪರ್ಸ್ಟಾರ್ ರಜನಿಕಾಂತ್ ನಟನೆಯ ಈ ಚಿತ್ರಕ್ಕೆ ಪ್ರೇಕ್ಷಕರಿಂದ ಉತ್ತಮ ರೆಸ್ಪಾನ್ಸ್ ಸಿಕ್ಕಿದೆ. ನೆಲ್ಸನ್ ದಿಲೀಪ್ ಕುಮಾರ್ ನಿರ್ದೇಶನದ ಈ ಸಿನಿಮಾವನ್ನು ನಿರೀಕ್ಷೆಗೂ ಮೀರಿ ಜನರು ವೀಕ್ಷಿಸುತ್ತಿದ್ದಾರೆ. ಕಲೆಕ್ಷನ್ ವಿಚಾರದಲ್ಲೂ ದಾಖಲೆಯ ಓಟ ಮುಂದುವರೆಸಿದೆ. ವಿಶ್ವಾದ್ಯಂತ 7000 ಸ್ಕ್ರೀನ್ಗಳಲ್ಲಿ ಆಗಸ್ಟ್ 10, ಗುರುವಾರದಂದು ಚಿತ್ರ ತೆರೆಗೆ ಅಪ್ಪಳಿಸಿತು.
ಎರಡನೇ ದಿನದ ಕಲೆಕ್ಷನ್: 200 ಕೋಟಿ ಬಜೆಟ್ನಲ್ಲಿ ತಯಾರಾದ ಈ ಸಿನಿಮಾವು ಮೊದಲ ದಿನ ಭಾರತದಲ್ಲಿ 48.35 ಕೋಟಿ ರೂಪಾಯಿಗಳನ್ನು ಗಳಿಸಿತ್ತು. ಸ್ಯಾಕ್ನಿಲ್ಕ್ನ ವರದಿ ಪ್ರಕಾರ, ಚಿತ್ರವು 2ನೇ ದಿನ 27 ಕೋಟಿ ರೂ.ಗೂ ಹೆಚ್ಚು ಕಲೆಕ್ಷನ್ ಮಾಡಿದೆ. ಈ ಮೂಲಕ ಬಿಡುಗಡೆಯಾದ ಎರಡು ದಿನಗಳಲ್ಲಿ ದೇಶಿಯ ಮಾರುಕಟ್ಟೆಯಲ್ಲಿ 'ಜೈಲರ್' ಚಿತ್ರವು ಒಟ್ಟು 75.35 ಕೋಟಿ ರೂಪಾಯಿ ಗಳಿಸಿದೆ. ಮೂರನೇ ದಿನವಾದ ಇಂದು 100 ಕೋಟಿ ದಾಟುವ ಸಾಧ್ಯತೆಯಿದೆ ಎಂದು ಅಂದಾಜಿಸಲಾಗಿದೆ.
'ಜೈಲರ್'ಗೆ 3 ಸಿನಿಮಾಗಳು ಪೈಪೋಟಿ:ಜೈಲರ್ ಚಿತ್ರವು ಆಗಸ್ಟ್ 10 ರಂದು ತೆರೆ ಕಂಡಿತ್ತು. ಆ ದಿನ ಬೇರೆ ಯಾವುದೇ ಸಿನಿಮಾಗಳು ರಿಲೀಸ್ ಆಗದ ಕಾರಣ ಉತ್ತಮ ಕಲೆಕ್ಷನ್ ಮಾಡಿತು. ಆದರೆ, ಈ ಚಿತ್ರಕ್ಕೆ ಪೈಪೋಟಿ ನೀಡಲು ನಿನ್ನೆಯಷ್ಟೇ ಮೂರು ಸಿನಿಮಾಗಳು ಬಿಡುಗಡೆಯಾಗಿದೆ. ಸನ್ನಿ ಡಿಯೋಲ್ ಮತ್ತು ಅಮಿಷಾ ಪಟೇಲ್ ನಟನೆಯ ಗದರ್ 2, ಬಾಲಿವುಡ್ ಕಿಲಾಡಿ ಅಕ್ಷಯ್ ಕುಮಾರ್ ನಟನೆಯ OMG 2 ಮತ್ತು ಟಾಲಿವುಡ್ ಮೆಗಾಸ್ಟಾರ್ ಚಿರಂಜೀವಿ ನಟನೆಯ ಭೋಲಾ ಶಂಕರ್ ಒಂದೇ ದಿನ ತೆರೆ ಕಂಡಿವೆ.