ಸಲ್ಮಾನ್​​ ನನ್ನ ಭಾಯಿಜಾನ್​ ಆಗಿ; ಸಾಜಿದ್​ ಖಾನ್​​ರನ್ನು ಮನೆಯಿಂದ ಹೊರಹಾಕಿ: ಶೆರ್ಲಿನ್ ಚೋಪ್ರಾ

ಚಲನಚಿತ್ರ ನಿರ್ಮಾಪಕ, ನಿರ್ದೇಶಕ ಸಾಜಿದ್​ ಖಾನ್ ಅವರನ್ನು ಬಿಗ್​ಬಾಸ್​​ ಮನೆಯಿಂದ ಹೊರ ಹಾಕುವಂತೆ ಒತ್ತಾಯ ಹೇರಲಾಗುತ್ತಿದೆ. ಇದೀಗ ನಟಿ ಶೆರ್ಲಿನ್ ಚೋಪ್ರಾ ಧ್ವನಿ ಎತ್ತಿದ್ದಾರೆ.

ಮೀ ಟೂ ಅಭಿಯಾನದಲ್ಲಿ ಸದ್ದಾಗಿದ್ದ ಚಲನಚಿತ್ರ ನಿರ್ಮಾಪಕ, ನಿರ್ದೇಶಕ ಸಾಜಿದ್​ ಖಾನ್ ಈಗ ಹಿಂದಿ ಬಿಗ್​​ ಬಾಸ್​ 16ರ ಸ್ಪರ್ಧಿ. ಬಾಲಿವುಡ್​​ ಸೂಪರ್​ ಸ್ಟಾರ್ ಸಲ್ಮಾನ್​ ಖಾನ್​​ ನಿರೂಪಣೆಯಲ್ಲಿ ಮೂಡಿ ಬರುತ್ತಿರುವ ಈ ಶೋನಲ್ಲಿ ಸಾಜಿದ್​ ಖಾನ್​​ ಭಾಗಿಯಾಗುತ್ತಾರೆಂದು ಕೇಳಿ ಬಂದಾಗಿನಿಂದಲೂ ವಿರೋಧ ವ್ಯಕ್ತವಾಗಿತ್ತು. ಬಿಗ್​​ ಬಾಸ್​ ಎಂಟ್ರಿ ಆದ ಮೇಲೊಂತೂ ಬಿಗ್​​ ಬಾಸ್​ ತಯಾರಕರ ವಿರುದ್ಧ ಆಕ್ರೋಶ ವ್ಯಕ್ತವಾಗುತ್ತಿದೆ. ಸಾಜಿದ್​ ಖಾನ್ ಅವರನ್ನು ಮನೆಯಿಂದ ಹೊರ ಹಾಕುವಂತೆ ಒತ್ತಾಯ ಹೇರಲಾಗುತ್ತಿದೆ. ಇದೀಗ ನಟಿ ಶೆರ್ಲಿನ್ ಚೋಪ್ರಾ ಧ್ವನಿ ಎತ್ತಿದ್ದಾರೆ.

ಮೀ ಟೂ ಅಭಿಯಾನದಲ್ಲಿ ನಿರ್ದೇಶಕ ಮತ್ತು ಬಿಗ್​ಬಾಸ್ ಸ್ಪರ್ಧಿ ಸಾಜಿದ್ ಖಾನ್ ವಿರುದ್ಧ ಹತ್ತು ಮಹಿಳೆಯರು ಲೈಂಗಿಕ ಕಿರುಕುಳ ಆರೋಪಗಳನ್ನು ಮಾಡಿದ್ದರು. ಇದೀಗ ಇವರನ್ನು ಬಿಗ್​​ ಬಾಸ್​ ಮನೆಯಲ್ಲಿರಿಸಿರುವುದು ಕೋಲಾಹಲವನ್ನು ಉಂಟುಮಾಡಿದೆ. ಈ ಬಗ್ಗೆ ನಟಿ ಶೆರ್ಲಿನ್ ಚೋಪ್ರಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಸಾಜಿದ್ ಖಾನ್​ರನ್ನು ಏಕೆ ಮನೆಯಲ್ಲಿಟ್ಟಿದ್ದೀರಿ ಎಂದು ನಿರೂಪಕ ಸಲ್ಮಾನ್​​ ಖಾನ್​ಗೆ ಪ್ರಶ್ನೆ ಮಾಡಿದ್ದಾರೆ.

ನೀವು ಭಾಯಿಜಾನ್ ಅಲ್ವಾ, ಎಲ್ಲರೂ ನಿಮ್ಮನ್ನು ಭಾಯಿಜಾನ್​ ಎನ್ನುತ್ತಾರಲ್ವಾ?, ನನ್ನ ಭಾಯಿ ಆಗಿ,​ ಸಾಜಿದ್​ ಖಾನ್​ರನ್ನು ಮನೆಯಿಂದ ಹೊರಹಾಕಿ ಎಂದು ಮನವಿ ಮಾಡಿದ್ದಾರೆ. ಅಲ್ಲದೇ ಏನಿದು ನಾಟಕ, ಆ ವ್ಯಕ್ತಿಯಿಂದ ಆಟ ಆಡಿಸುತ್ತಿದ್ದೀರಾ? ನಮ್ಮನ್ನೂ ಕರೆಯಿರಿ ಹಾಗಾದ್ರೆ, ನಮಗೂ ಅವಕಾಶ ಕೊಡಿ ಎಂದಿದ್ದಾರೆ. ಅವರ ತಪ್ಪುಗಳಿಗೆ ಪರದೆ ಹಾಕುವ ಕೆಲಸ ಆಗುತ್ತಿದೆ. ನಿಮ್ಮ ತಂಗಿಯನ್ನು (ಶೆರ್ಲಿನ್ ಚೋಪ್ರಾ) ಕರೆಸಿಕೊಂಡು ಸಮಸ್ಯೆ ಆಲಿಸಿ, ಆತನನ್ನು ಹೊರಹಾಕಿ, ಇದು ನಿಮ್ಮ ತಂಗಿಯ ಮನವಿ ಎಂದಿದ್ದಾರೆ.

ಇದನ್ನೂ ಓದಿ:ಆಡಿಷನ್​ಗಳಲ್ಲಿ ಅಪ್ರಾಪ್ತೆಯರಿಗೆ ಬೆತ್ತಲಾಗಲು ಹೇಳಿದ್ದ ಬಿಗ್​ಬಾಸ್​ ಸ್ಪರ್ಧಿ ಸಾಜಿದ್​ ಖಾನ್: ಸ್ವಾತಿ ಮಲಿವಾಲ್

ಇನ್ನೂ ಸಲ್ಮಾನ್ ಮನಸ್ಸು ಮಾಡಿದ್ದರೆ ಸಾಜಿದ್​ಗೆ ಬಿಗ್​​ಬಾಸ್​ಗೆ ಎಂಟ್ರಿಯೇ ಸಿಗುತ್ತಿರಲಿಲ್ಲ ಆದರೆ, ಸಲ್ಮಾನ್ ಹಾಗೆ ಮಾಡಿಲ್ಲ ಎಂದು ಅಸಮಧಾನ ಹೊರಹಾಕಿದ್ದಾರೆ. ಸಾಜಿದ್ ಖಾನ್ ವಿರುದ್ಧ ಲೈಂಗಿಕ ಕಿರುಕುಳ ಆರೋಪಗಳನ್ನು ಮಾಡಿದ್ದ ಮಹಿಳೆಯರ ಪಟ್ಟಿಯಲ್ಲಿ ನಟಿ ಶೆರ್ಲಿನ್ ಚೋಪ್ರಾ ಕೂಡ ಒಬ್ಬರು.