ಮಾಜಿ ಸ್ಪೀಕರ್ ಕಾಗೋಡು ತಿಮ್ಮಪ್ಪಗೆ ಸಿಗದ ಕೋವಿಡ್​ ಲಸಿಕೆ: ಸರ್ಕಾರದ ವಿರುದ್ಧ ಆಕ್ರೋಶ

ಸಾಗರದ ದೇವರಾಜ ಅರಸ್ ಭವನದಲ್ಲಿ ಲಸಿಕಾ ಅಭಿಯಾನ ನಡೆಸಲಾಗುತ್ತಿದ್ದು, ಈ ವೇಳೆ ಕೊರೊನಾ ವ್ಯಾಕ್ಸಿನ್ ಎರಡನೇ ಡೋಸ್​ ಪಡೆಯಲು ಹೋದ ಮಾಜಿ ಸ್ಪೀಕರ್ ಕಾಗೋಡು ತಿಮ್ಮಪ್ಪ ಅವರಿಗೆ ಲಸಿಕೆ ಸಿಗದ ಹಿನ್ನೆಲೆ ವಾಪಸ್ ಆಗಿದ್ದಾರೆ.

ಶಿವಮೊಗ್ಗ: ಮಾಜಿ ಸ್ಪೀಕರ್ ಹಾಗೂ ಹಿರಿಯ ರಾಜಕಾರಣಿ ಕಾಗೋಡು ತಿಮ್ಮಪ್ಪ ನಿನ್ನೆ ಕೊರೊನಾ ವ್ಯಾಕ್ಸಿನ್ ಎರಡನೇ ಡೋಸ್​ ಪಡೆಯಲು ಹೋಗಿದ್ದರು. ಆದರೆ, ಲಸಿಕೆ ಲಭ್ಯವಾಗದ ಹಿನ್ನೆಲೆಯಲ್ಲಿ ಅವರು ನಿರಾಶರಾಗಿ ವಾಪಸ್ ಆಗಬೇಕಾಯಿತು.

ಸಾಗರದ ದೇವರಾಜ ಅರಸ್ ಭವನದಲ್ಲಿ ಲಸಿಕಾ ಅಭಿಯಾನ ನಡೆಸಲಾಗುತ್ತಿದೆ. ಕೊರೊನಾ ವ್ಯಾಕ್ಸಿನ್ ಎರಡನೇ ಡೋಸ್ ತೆಗೆದುಕೊಳ್ಳುವಂತೆ ಮೆಸೇಜ್​​ ಬಂದ ಹಿನ್ನೆಲೆ ಕಾಗೋಡು ತಿಮ್ಮಪ್ಪ ಲಸಿಕೆ ಪಡೆಯಲು ಹೋದಾಗ ಲಸಿಕೆ ಖಾಲಿಯಾಗಿದೆ ಎಂದು ಸಿಬ್ಬಂದಿ ತಿಳಿಸಿದೆ. ಇದರಿಂದಾಗಿ ಆಕ್ರೋಶಗೊಂಡ ತಿಮ್ಮಪ್ಪ ವಾಪಸ್ ಬಂದಿದ್ದಾರೆ.

ನಂತರ ಮಾತನಡಿದ ಅವರು, ಕೋವಿಡ್ ಲಸಿಕೆ ಪಡೆಯಲು ಹೋದಾಗ ನನಗೆ ಲಸಿಕೆ ಸಿಕ್ಕಿಲ್ಲ. ಸಾಗರದಂತಹ ಪಟ್ಟಣದಲ್ಲಿ ಈ ರೀತಿಯ ವ್ಯವಸ್ಥೆಯಿದೆ. ಇನ್ನು ಗ್ರಾಮಾಂತರ ಭಾಗದ ಕಥೆ ಏನು ಎಂದು ಸರ್ಕಾರದ ವಿರುದ್ಧ ಕಾಗೋಡು ತಿಮ್ಮಪ್ಪ ಆಕ್ರೋಶ ವ್ಯಕ್ತಪಡಿಸಿದರು.